ކޮން ބައެއް ކޮކީލާ މިސް ވަނީ؟ "ސާތު ނިބާނާ ސާތިޔާ" ސީޒަން 2 އިން ވެސް ފެންނާނެ!
ސްޓާ ޕްލަސް އިން ދައްކަމުން ދިޔަ ކާމިޔާބު ޓީވީ ސީރީޒް، "ސާތު ނިބާނާ ސާތިޔާ" ގެ ދެވަނަ ސީޒަނެއް ވެސް އުފައްދަމުންދާ ކަމުގެ އުފާވެރި ޚަބަރު އެސީރީޒްގެ ޕްރޮޑިއުސަރުން ވަނީ ދީފައެވެ.
ނަމަވެސް އެއުފާވެެރި ޚަބަރާއެކު އެއިރު ފެތުރުނު ހިތާމަވެރި ޚަބަރަކީ، އެސީރީޒްގައި ހަރުކަށި މައިދައިތައެއްގެ ރޯލު އަދާކުރި ރުޕަލް ޕަޓޭލް (ކޯކީލާ މޯދީ) ގެ ރޯލު އެހެން މީހަކަށް ދިނުމަށް ހަމަޖެއްސި ކަމެވެ. ކޯކީލާ ނުވަތަ ރުޕަލް އަކީ ވަރަށް ގިނަ ބެލުންތެރިންގެ ތަރުޙީބު ލިބިފައިވާ މީހެކެވެ. އެހެންކަމުން އޭނާ އެސީރީޒްގައި ނެތުން ގިނަ މީހުންނަކަށް ކަމަކު ނުދިޔައެވެ. އަދި އޭނަގެ ރޯލު އެހެން މީހަކު ކުޅެން ވެސް ހިތްހަމައެއް ނުޖެހުނެވެ.
"ސާތު ނިބާނާ ސާތިޔާ" އިން މިހާރު ވަނީ، އެސީރީޒްގެ ދެވަނަ ސީޒަން ގައި ވެސް "ކޯކީލާ" ގެ ރޯލު ކުޅޭނީ ރުޕަލް ކަން ހާމަ ކޮށްފައެވެ.
އާއްމުގޮތެއްގައި ޓީވީން ދައްކާ ޑްރާމާ ތަކުގައި އުޅޭ މައިދައިތަމެން ދައްކާފައިވަނީ ދެ ގޮތަކަށެވެ. އެއީ ވަރަށް ރަނގަޅު މައިދައިތައެއްގެ ގޮތުގައި ނުވަތަ ވަރަށް ޒީލަގަދަ މައިދައިތައެއްގެ ގޮތުގައެވެ. ނަމަވެސް "ކޯކީލާ" ތަފާތެވެ. އޭނާއަކީ އޭނާގެ ޅީދަރިންނާއި މެދު އެއްވެސް ތަފާތު ކުރުމެއް ނުގެންގުޅޭ، ވަކި އުސޫލެއް ގެންގުޅޭ މީހެކެވެ.
"ކޯކީލާ" ގެ ރޯލު އެންމެ ފުރިހަމައަށް އަދާކޮށްފައިވާ ރުޕަލް، މިހާރު އަންނަނީ ތަޖަން ޝާހީ ގެ "ޔޭ ރިޝްތޭ ހޭ ޕިޔާރް ކޭ" ގައި ވެސް ހަރަކާތްތެރި ވަމުންނެވެ. ރުޕަލް ބުނި ގޮތުގައި ކޮވިޑްގެ މިބަލިމަޑު ކަމުގައި އެއްފަހަރާ ދެ ޝޯގެ މަސައްކަތް ކުރުން އޭނާއަށް އުނދަގޫ ނަމަވެސް، ބެލުންތެރިންނަށް ޓަކައި އޭނާ ދަނީ ގަޑިތައް ބަހާލައިގެން މަސައްކަތް ކުރަމުންނެވެ.
