ކޮރަޕްޝަންގެ އެއްވެސް ތުހުމަތެއް ސަރުކާރުން ނުކުރޭ: މުއާޒް
ކޮރަޕްޝަންގެ އެއްވެސް ތުހުމަތެއް ފެނަކައިގެ ކުރީގެ މެނޭޖިން ޑިރެކްޓަރު މުއާޒް މުހައްމަދު ރަޝީދުގެ މައްޗަށް ސަރުކާރުން ކޮށްފައިނުވާ ކަމަށް އޭނާ ވިދާޅުވެއްޖެ އެވެ.
ފެނަކައިގެ އެމްޑީގެ މަގާމުން މުއާޒް މިއަދު އިސްތިއުފާ ދެއްވި އިރު ޕްރޮކިއުމަންޓްގެ މައްސަލަތަކާއި އާއިލީ މީހުންނަށް އިސްކަންދިނުމާއި އަދި މާލީ ކަންކަން އޮޅުވާލުމުގެ ކަންކަން މުއާޒްގެ މައްޗަށް ކުރެވިފައިވާ ކަމަށް ބުނާ ޝޯޝަލް މީޑިއާގެ ޕޯސްޓެއްދިޔައީ ދައުރުވަމުން ނެވެ.
އަދި ކޮރަޕްޝަންއާ ދެކޮޅަށް ސަރުކާާރުން ގެންގުޅޭ ޒީރޯ ޓޮލަރެންސްގެ ސިޔާސަތުގެ ދަށުން ކުރިމަތިވި ޕްރެޝަރުތަކާ ގުޅިގެން މުއާޒް އިސްތިއުފާ ދެއްވީ ކަމަށް ވެސް އެ ޕޯސްޓުގައި ބުނެފައިވެ އެވެ.
އެހެން ނަމަވެސް އެ ޕޯސްޓަށް ރައްދު ދެއްވައި މުއާޒް ވިދާޅުވީ އެއީ ކަނޑައެޅިގެން ދޮގު ކަމަށެވެ.
"މީގެ އެއްވެސް ތުހުމަތެއް ސަރުކާރުން ނުކުރޭ. ހަގީގަތް އޮޅުވާލަން ނޫޅޭ! ލައްކަ ވާހަކަ އެބަހުރި ދައްކަން ޖެހިއްޖިއްޔާ ދައްކަން" އޭނާ ވިދާޅުވި އެވެ.
މުއާޒް އިސްތިއުފާ ދެއްވީ ފެނަކައަށް ލިބޭ އާމްދަނީއަށްވުރެ ކުރަންޖެހޭ ހަރަދު ބޮޑުވުމުން ދެމެހެއްޓެނިވި ގޮތެއްގައި ހިދުމަތްތައް ފޯރުކޮށް ނުދެވޭނެ ހާލަތަކަށް ކުންފުނީގެ އޮޕަރޭޝަން ހާލަތު ވެއްޓިފައިވާތީ އެމްޑީގެ މަގާމުގައި ހުރެ, އިތުރަށް އެކަން ރަނގަޅު ކުރެވޭނެ އަލި މަގެއް ފެންނަން ނެތުމުން ކަމަށް އޭނާ މިއަދު ވަނީ ވިދާޅުވެފަ އެވެ.
މުއާޒް އިސްތިއުފާ ދެއްވުމުން ފެނަކައިގެ މެނޭޖިން ޑިރެކްޓަރުގެ މަގާމަށް މިއަދު ވަނީ މޭޖާ (ރިޓަޔަޑް) މުހައްމަދު ނަޖާހް އައްޔަނުކޮށްފަ އެވެ.
