އިންޑިއާގެ 40 މަސައްކަތްތެރިން ރާއްޖޭގައި ހާލުގައި ޖެހިފައި
އިންޑިއާގެ 40 މީހުން މަސައްކަތް ކުރަން ރާއްޖެ ގެނެސް، މުސާރަ ނުދީ ހާލުގައި ޖައްސާފަައިވާ ކަމަށް ބުނާ މައްސަލައެއް ފެންމަތި ވެއްޖެ އެވެ.
އިއްޔެ އެ މީހުން ވަނީ ރާއްޖޭގައި މިވަގުތު އެމީހުން ދިރިއުޅެމުންދަނީ ދަތި ހާލުގައި ކަމަށް ބުނެ، އަނބުރާ ގައުމަށް ގެންގޮސްދިނުމަށް އެދި ވީޑިއޯއެއް ސޯޝަލް މީޑިއާގައި ޕޯސްޓުކޮށްފަ އެވެ.
އެ ވީޑިއޯގައި ބުނެފައިވާ ގޮތުން އެމީހުން ރާއްޖެ އައިސްފައިވަނީ އިންޑިއާގެ އެޖެންޓެއް މެދުވެރި ކޮށެވެ. އަދި ރާއްޖެ އައިސްފައިވަނީ ރަނގަޅު ކުންފުންޏަކުން، ރަނގަޅު މުސާރައަކާއި ހުރުމާއި ކެއުން ހަމަޖެހޭނެ ކަމަށް އެޖެންޓް ދިން ޔަގީންކަމަށް އިތުބާރު ކޮށްފަ އެވެ.
އިންޑިއާގެ ނޫސްތަކުން ބުނާގޮތުން އެ މީހުން މަސައްކަތް ކުރަމުންދަނީ ކޮންސްޓްރަކްޝަން ކުންފުންޏެއްގަ އެވެ. ނަމަވެސް، އެއީ ކޮން ކުންފުންޏެއްކަން ކަށަވަރެއް ނުވެ އެވެ.
ރާއްޖެއިން ވަޒީފާ ހަމަޖައްސައި ދިނުމަށް ކޮންމެ މަސައްކަތްތެރިއަކު 40،000 އިންޑިއަން ރުޕީސް އެޖެންޓަށް ދައްކާފައިވާ ކަމަށްވެ އެވެ.
އަދި މުސާރާއިގެ ގޮތުން މަހަކު 25،000 އާއި 30،000 އިންޑިއަން ރުޕީސް މުސާރައިގެ ގޮތުގައި ދޭނެ ކަމުގެ ޔަގީންކަން ވެސް އެޖެންޓް ދިނެވެ. އެއީ ރުފިޔާއިން ބަލާނަމަ، 5000 އެއްހާ ރުފިޔާ އެވެ.
އެ މަސައްކަތްތެރިން ރާއްޖެ އައިސްފައިވަނީ މިދިޔަ ޖޫން މަހު އެވެ. ޖޫން މަހު މަސައްކަތް ކުރަން ފެށި ނަމަވެސް، މުސާރަ ނުލިބޭތާ އެތައް ދުވަހެއް ވެއްޖެ ކަމަށް އެ މީހުން ބުންޏެވެ.
އެ މީހުން ބުނީ ފުލް މުސާރަ ލިބިފައިވަނީ އެންމެ ފުރަތަމަ މަހު އެކަނި ކަމަށެވެ. އޭގެ ފަހުން، ދިނީ މުސާރައިގެ ދެބައިކުޅަ އެއްބައި ކަމަށް ބުނެ އެވެ.
މުސާރައިގެ ނުލިބިގެން މުޒާހަރާ ކުރުމުން އެ ކުންފުނިން ބިރުދައްކާ ކަމަށް ވެސް މަސައްކަތްތެރިން ތުހުމަތު ކުރެެ އެވެ. އަދި އެމީހުން ދިރިއުޅޭ ތަންތަނުގެ ކަރަންޓް ވެސް ކަނޑާލާފައިވާ ކަމަށް އެ މީހުން ބުނެފައިވެ އެވެ.
ރާއްޖެ އައިސް ހާލުގައި ޖެހިފައި ހުރިތަނުން މަސައްކަތްތެރިއެއްގެ މަންމަ ޓައިމްސް އޮފް އިންޑިއާއަށް ދިން އިންޓަވިއު އެއްގައި ބުނީ، މީގެ ހަ މަސް ކުރިން އޭނާގެ ދަރިފުޅު ރާއްޖެ ފޮނުވި ރަނގަޅު ވަޒީފާއެއް ލިބިގެން ފޮނި އުންމީދުތަކަކާ އެކު ކަަމަށެވެ.
""ފުރަތަމަ މަހުގެ މުސާރަ ލިބުނު ނަމަވެސް އޭގެ ފަހުން އެއްވެސް ފައިސާއެއް ނުލިބޭ. އެމީހުން މިހާރު ތިބީ ގައުމަށް އަންނަން ފައިސާ ނެތި ތާށިވެފައި،" އެ މީހާ ބުންޏެވެ.
އިންޑިއާ ސަރުކާރުން ދަނީ އެ މަސައްކަތްތެރިން އަނބުރާ ގައުމަށް ގެންދިއުމުގެ މަސައްކަތް ކުރަމުންނެވެ. މި ފަހުން އިންޑިއާ މީހަކު ވަޒީފާއަށް ރާއްޖެ ގެނެސް، މުސާރަ ނުދީ ހާލުގައި ޖެހިފައި ހުއްޓާ، އަނބުރާ ގައުމަށް ގެންގޮސްފައިވެ އެވެ.
އިންޑިއާ ސަރުކާރުން ވަނީ ބޭރު ގައުމުތަކުގެ ވަޒީފާގެ ހުށަހެޅުންތަކަށް ނުހެއްލުމަށް އިލްތިމާސް ކޮށްފަ އެވެ.
