ލޯކަލް މާރުކޭޓުގައި މިއަދުވެސް ރެއިޑެއް: 25 ބިދޭސީން އިމިގްރޭޝަންގެ ބެލުމުގެ ދަށަށް
ގަވައިދާ ހިލާފަށް އުޅެމުންދަ ބިދޭސީން ހޯދުމަށް ކުރަމުންދާ މަސައްކަތްތަކުގެ ތެރެއިން ބިދޭސީންގެ ނުފޫޒް ގަދަ ލޯކަލް މާރުކޭޓް ސަރަހައްދާއި ހީނާމާގޭ ޕާކިން ސަރަހައްދުގައި މޯލްޑިވްސް އިމިގްރޭޝަނުން މިއަދު ރެއިޑް އޮޕަރޭޝަންއެއް ކުރިއަށް ގެންގޮސްފި އެވެ.
މިއީ ލޯކަލް މާރުކޭޓްގައި އިމިގްރޭޝަނުން ރެއިޑް އޮޕަރޭޝަން ކުރިއަށްގެންދާ 2 ވަނަ ދުވަހެވެ.
އިމިގްރޭޝަނުން 'އެކްސް' ގައި މިރޭ ކުރި ޕޯސްޓެއްގައި ބުނީ ލޯކަލް މާރުކޭޓް ސަރަހައްދާއި އަދި ހީނާމާގޭ ޕާކިން ސަަރަހައްދުން 137 ބިދޭސީން ބަލައި ފާސްކޮށް، ގަވާއިދާ ހިލާފަށް އުޅެމުންދާ 25 ބިދޭސީއަކު އިމިގްރޭޝަންގެ ބެލުމުގެ ދަށަަށް ގެނައި ކަމަށެވެ.
މިއަދުގެ ރެއިޑު އޮޕަރޭޝަންގައި ކޮންޓްރޯލާ ޖެނެރަލް އޮފް އިމިގްރޭޝަން މުހައްމަދު ޝަމްއާން ވަހީދުއާއި އަދި ޑެޕިއުޓީ ކޮންޓްރޯލާ، އަހުމަދު އަޝްފާން ވެސް އަމަލީ ގޮތުން ބައިވެރިވެ ވަޑައިގެންނެވި ކަމަށް އިމިގްރޭޝަންއިން ބުންޏެވެ.
ގަވާއިދާ ހިލާފަށް އުޅޭ ބިދޭސީންނަށް އަމާޒުކޮށް މަސައްކަތް ކުރުމަށް އުފައްދާފައިވާ ޓާސްކްފޯހުން ގިނަ އޮޕަރޭޝަންތަކެއް ހުއްޓުމެއް ނެތި މިހާތަނަށް އައިއިރު ވަނީ ކުރިއަށް ގެންގޮސްފަ އެވެ. އެގޮތުން 200 އަށް ވުރެ ގިނަ އޮފިސަރުން ހިމަނައިގެން މާލެ އަދި ހުޅުމާލޭގައި މާސް އިންސްޕެކްޝަންތަކެއް ކުރިއަށް ގެންގޮސްފައިވެ އެވެ.
އޮޕަރޭޝަންތަކުގައި 1،300 އަށް ވުރެ ގިނަ ތަންތަން ބަލައި ފާސްކުރިއިރު، ޖުމްލަ 5،012 ބިދޭސީން ވަނީ ފުރުވާލާފައިވާ ކަމަށް އިމިގްރޭޝަނުން އެންމެފަހުން އާންމުކޮށްފައިވާ ތަފާސް ހިސާބުތަކުން ދައްކަ އެވެ.
Ads by STO
