ރޯދަ އަންނަންވާއިރަށް ކަރަންޓު ކެނޑޭ ރަށެއް ނުހުންނާނެ: ރައީސް
އިތުރު ޖަނަރޭޓަރުތައް ގެނެސް އަންނަ ރޯދަ މަހުގެ ކުރިން ރަށްރަށުގައި ކަރަންޓަށް ދިމާވާ މައްސަލަ ހައްލުކުރުމަށް ސަރުކާރުން އަމާޒު ހިފާފައިވާ ކަމަށް ރައީސް ޑރ މުހައްމަދު މުއިއްޒު މިރޭ ވިދާޅުވެއްޖެ އެވެ.
ހުވަދޫ އަތޮޅު ކުރައްވަމުން ގެންދަވާ ދަތުރުފުޅުގެ ތެރެއިން ގދ. ފިޔޯރީ ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުން ރައީސް ވިދާޅުވީ ރޯދަ މަހާ ދިމާކޮށް ކަރަންޓުގެ މައްސަލައަށް ހައްލެއް ގެނެސްދިނުމަށް ވަރަށް ބޮޑު އިސްކަމެއްދެއްވާ ކަމަށެވެ.
ރަނގަޅަށް މެއިންޓެއިން ނުކުރެވެމުގެ ސަބަބުން ފެނަކައިގެ އިންޖީނުތަކުގެ ޖަނަރޭޓަރުތައް ހުރި ހަލާކުވެފައިކަން ފާހަގަކުރައްވާ ރައީސް ވިދާޅުވީ އެ މައްސަލަ ހައްލުކުރުމަށް ފިނޭންސް މިނިސްޓްރީއާ އެސްއޯއީތައް ގުޅިގެން މަސައްކަތްތަކެއް ފަށާފައިވާ ކަމަށެވެ. އޭގެ ނަތިއްޖާ ކުރިއަށް 2 މަސް ތެރޭގައި ފެންނާނެ ކަމަށް ރައީސް ވިދާޅުވި އެވެ.
"އެންމެ ރަށެއްވެސް ދޫކޮށްނުލާ ހުރިހާ ރަށެއްގައި ޖަނަރޭޓަރުތަކުގެ މައްސަލަތައް ހައްލުކުރުމަށް ގެންނަން ޖެހޭ ޖަނަރޭޓަރުތައް ގެނެސްދީ އިންސްޓޯލްކޮށް ނިންމަން، މި ދެމަސް ތެރޭގައި ރާއްޖޭގެ ހުރިހާ ރަށެއްގައި، ރަމަޝާން މަހު ތިބޭފުޅުން ކަންބޮޑުވެޖެހިވަޑައިނުގަންނަވާ ފެންވަރަށް މި ކަރަންޓުގެ މައްސަލަ ހައްލުކުރުމަކީ އަޅުގަނޑުމެން އަމާޒު ހިފި ކަންތައް" ރައީސް މުއިއްޒު ވިދާޅުވި އެވެ.
ރަށްރަށުން ކަރަންޓު ކެނޑޭ މައްސަލަ އަކީ އަބަދުހެން ދިމާވާ މައްސަލައަކަށްވާއިރު އެކަމަށް ހައްލެއް ހޯދިފައި ނެތުމުގެ ކަންބޮޑުވުން އަބަދުވެސް އޮވެ އެވެ.
Ads by STO
