މިފަހަރު އާ ޗެލެންޖެއް: މަދަހަ
މި ދުވަސްވަރަކީ ކޮވިޑް19 އާއި ގުޅިގެން ގިނަ ބަޔަކު ގޭގައި ތިބެން ޖެހި މީސް މީޑިއާގައި އެކި އެކި ޗެލެންޖުތައް ބާއްވަމުން ގެންދާ ދުވަސްވަރެކެވެ. ޓޮއިލެޓު ޕޭޕަރ ޗެލެންޖާއެކު ގިނަ ބައެއްގެ ފާޑުކިޔުންތައް އަމާޒުވެފައި ވަނިކޮށް މިހާރު ދިވެހިންގެ ތެރޭގައި އެންމެ ވައިހިފާފައިވަނީ ޤުރުއާން ކިޔެވުމުގެ ޗެލެންޖެވެ. ކުރީގެ އިސްލާމިކް މިނިސްޓަރ އަދި މަޝްހޫރު ދީނީ އިލްމުވެރިޔާ ޑރ. މުހައްމަދު ޝަހީމް އަލީ ސައީދު ފައްޓަވައިދެއްވި މި ޗެލެންޖާއެކު މިވަނީ މިފަދަ އިތުރު ޗެލެންޖެއް އަނެއްކާ ވެސް މީސް މީޑިއާގައި ފަށާފައެވެ.
އަހަންނަށް ވެސް މަދަހަ ކިޔޭނެ، މި ނަމުގައި އޭޕްރިލް އެއް ވަނަ ދުވަހު ފޭސްބުކު ޕޭޖަކުން ފެށި މި ޗެލެންޖަކީ މަދަހަ ކިޔައިގެން ތިބާގެ ހުނަރު ދައްކާލުމަަށް ލިބޭ ފުރުސަތެކެވެ. މި ޗެލެންޖަކީ ޕޯސްޓު ޝެއާ ކޮށް 30 ރިއެކްޓާއި 500 ކޮމެންޓު ލިބުމުން މަދަހައެއް ކިޔައި އަޕްލޯޑުކުރަން ޖެހޭ ޗެލެންޖެކެވެ. ރިއެކްޓާއި ކޮމެންޓު ހަމަވާތާ 48 ގަޑިއިރު ތެރޭގައި މަދަހަ ކިޔައި އަޕްލޯޑުކުރަން ޖެހެއެވެ.
މި ޗެލެންޖު ފަށައިދިން ފަރާތުން ހާމަކުރާ ގޮތުގައި މި ޗެލެންޖަކީ ރޯދަ މަސް ކައިރިވެފައިވުމާއެކުގައި ފެށި ޗެލެންޖެކެވެ. އަދި މީގެ ބޭނުމަކީ ގޭގައި ތިބެން ޖެހޭ މި ވަގުތުގެ ބޭނުން އެންމެ ރަނގަޅުގޮތުގައި ހިފުން ކަމަށް ވެސް އެފަރާތުން ހާމަކުރެއެވެ.
މި ޗެލެންޖު ހުރިހާ ދިވެހިންނަށް ވެސް ވަނީ ހުޅުވާލެވިފައެވެ.
ކޮރޯނާ ވައިރަހުގެ ނުރައްކާތެރިކަން ރާއްޖެއަށް ވެސް ކުރިމަތިވެފައި ވާއިރު ވައިރަހުގެ 19 ކޭސް އެއް ވަނީ ފެނިފައެވެ. މީގެ ތެރެއިން 4 މީހުންނަކީ ދިވެހިންނެވެ. އަދި މިވަގުތު ބަލި ރަނގަޅުނުވެ ތިބީ ވެސް މި ހަތަރު މީހުންނެވެ. ވައިރަސް ކޮންޓްރޯލު ކުރުމަށްޓަކައި ސަރުކާރުން ގިނަ ފިޔަވަޅުތަކެއް އަޅަމުން އަންނައިރު ހުރިހާ ރައްޔިތުންވެސް ގޭގައި ތިބުމަށް ސިއްހީ މާހިރުން ލަފާދެއްވައެވެ.
