އިމިގްރޭޝަން ކަލަންޑަރު: ދައްކައިދެނީ އަލިމަސް ދަތުރުގެ ގައުމީ ހިދުމަތުގެ ސަފުހާތައް
މޯލްޑިވްސް އިމިގްރޭޝަނުގެ 75 އަހަރުގެ ގައުމީ ހިދުމަތުގެ ތާރީހަށް އަލިއަޅުވާލައި ތައްޔާރުކުރި ކަލަންޑަރު، އަލިމަސް ދަތުރު އާންމުކޮށްފި އެވެ.
އަންނަ މާޗު މަހުގެ 24 ވަނަ ދުވަހު އިމިގްރޭޝަނަށް 75 އަހަރު ފުރޭނެ އެވެ. އިމިގްރޭޝަނުން ބުނީ އަލިމަސް ޔޫބީލް ފާހަގަކުރާއިރު، މި އަހަރުގެ ކަލަންޑަރު އެކުލަވާލާފައި ވަނީ މި ދިގު މުއްދަތުގައި އެ އިދާރާއިން ހާސިލުކޮށްފައިވާ ކާމިޔާބީތަކާއި ތާރީހުގެ މުހިންމު ސަފުހާތަކުގެ މައްޗަށް ކަމަށެވެ.
އެގޮތުން 1950 ވަނަ އަހަރުން ފެށިގެން މި އަހަރާ ހަމައަށްއައިރު، ތާރީހުގެ ސަފުހާތަކުން ފާހަގަކޮށްލެވޭ ގިނަ ކަންތައްތަކެއް މި ކަލަންޑަރުގައި ހިމަނާފައިވެ އެވެ.
ކަލަންޑަރުގައި ހަމައެކަނި ރާއްޖެ އާއި ސިލޯނާ ދެމެދުގައި ކުރެވުނު ދަތުރުތަކުގައި ބޭނުންކުރި "މޯލްޑިވިއަން ޕާސް" އާއި އިނގިރޭސީންގެ ހިމާޔަތުގައި ރާއްޖެ އޮތްއިރު، ބޭނުންކުރެވުނު "ބްރިޓިޝް ޕާސްޕޯޓު" އަދި ފަހުން އައި އޭ ސީރީސްގެ ޕާސްޕޯޓާއި އިލެކްޓްރޯނިކް ޕާސްޕޯޓުތަކުގެ މައުލޫމާތު ވެސް ހިމެނެ އެވެ.
ވައިގެ ބަނދަރާއި ކަނޑުގެ ބަނދަރުގައި ހިދުމަތްތައް ފުޅާވެގެން ދިޔަ ގޮތާއި ރާއްޖޭގެ ބޯޑަރު ހިމާޔަތްކޮށް ބެލެހެއްޓުމުގައި ކޮށްފައިވާ މުހިންމު މަސައްކަތްތަކުގެ އިތުރުން ރާއްޖޭގައި އުޅޭ ބިދޭސީންގެ ކަންކަމުގައި އިމިގްރޭޝަނުން އަދާކޮށްފައިވާ މުހިންމު ރޯލު މި ކަލަންޑަރުން ދައްކުވައިދެ އެވެ.
އަދި ޒަމާނީ ބަދަލުތަކާ އެކު ހިދުމަތްތައް ލުއިފަސޭހަވެ ފުޅާވެގެންދިޔަ ގޮތާއި ކުރިމަގުގައި ހިދުމަތްތައް އިތުރަށް ލުއިފަސޭހަކޮށް، ޑިޖިޓަލައިޒް ވެގެންދާނެ ގޮތުގެ ތަސައްވުރަށް އަލިއަޅުވާލާފައިވެ އެވެ.
ތުއްތު ކުދިން ހިމަނައިގެން އިމިގްރޭޝަނުގެ ތާރީހު ދައްކުވައިދޭ ގޮތަށް ފަރުމާކޮށްފައިވާ މި ކަލަންޑަރުގެ ފަހަތުގައި މުހިންމު ތާރީހުތަކާއި ކަންކަން ފާހަގަކުރުމަށް ހާއްސަ ސްޓިކާތަކެއް ވެސް ވަނީ ހިމަނާފަ އެވެ.
މީގެކުރިން "ޕާސްޕޯޓު އޮފީސް"، އެފަހުން "ޑިޕާޓްމަންޓް އޮފް އިމިގްރޭޝަން އެންޑް އެމިގްރޭޝަން" އަދި މިހާރު ނަމަ "މޯލްޑިވްސް އިމިގްރޭޝަން" ގެ އަލިމަސް ދަތުރު، މި ކަލަންޑަރުން ފުރިހަމައަށް ފެނިގެންދާނެކަން އެ އިދާރާއިން ވަނީ ފާހަގަކޮށްފަ އެވެ.
