ރިސޯޓު މުވައްޒަފުންނަށް "ނައިޓަށް" ދެވޭ ގޮތަށް ރެސިޑެންޝަލް ތަަންތަން ހެދުމަކީ ދުރުރާސްތާ ޕްލޭނެއް: ޑރ. މައުސޫމް
ރިސޯޓުތަކުގައި މަސައްކަތް ކުރަމުން އަންނަ މުވައްޒަފުންނަށް "ނައިޓަށް" ރަށަށް ދެވޭ ގޮތް ހެދުމަށް ރެސިޑެންޝަލް ތަންތަން ހެދުމަކީ ދުރުރާސްތާ ޕްލޭނެއް ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.
އޮންލައިން ނޫސް "ވަގުތު" އަށް މައުލޫމާތު ދެއްވަމުން ޑރ. މައުސޫމް ވިދާޅުވީ ރިސޯޓް މުވައްޒަފުންނަށް "ނައިޓަށް" ދެވޭނެ ކަމަށް ސަރުކާރުން ބުނަނީ ދިރިއުޅޭ ތަނަކަށް ދިއުމުގެ ފުރުސަތު ފަހިކޮށްދޭން ވެގެން ކަމަށާއި އެ ފުރުސަތު ފަހިކޮށްދިނުމަށް މީހުން ދިރިއުޅޭ ރަށްތައް ކައިރީގައި ހުރި ރިސޯޓުތައް ތަރައްގީކޮށް އެ ރަށްރަށާއި ރިސޯޓުތަކާއި ގުޅުވާލުމުގެ މަސައްކަތް ކުރައްވާ ކަމަށެވެ.
މީގެ އިތުރުން މިނިސްޓަރ ވިދާޅުވީ، ރަށާއި ކައިރި ރިސޯޓް ނެތް މީހުންނާއި ރިސޯޓާއި ކައިރި ރަށްރަށުގައި އުޅެން ބޭނުންވާ މީހުންނަށް ޚާއްސަކޮށް ރެސިޑެންޝަލް ތަންތަން އަތޮޅު ތެރޭގައި ގާއިމްކުރުމަށް ވިސްނަވާކަމަށެވެ.
"ދިރިއުޅުމެއް ފެށުމަށް ފަހު ބޭނުން ވާނީ ކުދިން ކައިރީ އުޅެން. އެކަން ވާނީ ރަށްތަކާއި ކައިރީގައި ރިސޯޓްތައް އެޅިގެން. ރިސޯޓްތަކުގައި އާއިލާއެއްކޮށް ދިރިއުޅުން އެއީ އޮޕްޝަނެއް ނޫން. ސަރުކާރުގެ މައިގަނޑު ޕޮލިސީއަކީ މީހުން ދިިއުޅޭ ރަށްރަށާ ކައިރިން ރިސޯޓްތައް ގާއިމްކުރުން،" މިނިސްޓަރ މައުސޫމް ވިދާޅުވެފައިވެއެވެ.
