އެމްޑީޕީ މެންބަރުންގެ އަދަދު ދަށްވެ، ޕީޕީއެމް މެންބަރުންގެ އަދަދު އިތުރުވެއްޖެ
ވެރިކަން ކުރާ މައި ޕާޓީ އެމްޑީޕީގެ މެންބަރުންގެ އަދަދު ދަށްވެ، އިދިކޮޅު ޕީޕީއެމް މެންބަރުންގެ އަދަދު އިތުރުވެއްޖެއެވެ.
އިލެކްޝަންސް ކޮމިޝަން އިން އެންމެ ފަހުން އާންމުކުރި ތަފާސް ހިސާބުތަކަށް ބަލާއިރު އެންމެ ގިނަ މެންބަރުން ހިމެނޭ އެމްޑީޕީގައި މިވަގުތު ތިބީ 52،952 މެންބަރުންނެވެ. މިދިޔަ އަހަރާ އަޅާބަލާއިރު 796 މެމްބަރުން ވަނީ އެމްޑީޕީން ވަކި ވެފައެވެ. މިދިޔަ އަހަރު އެމްޑީޕީ މެންބަރުންގެ އަދަދު ހުރީ 53،748 ގައެވެ.
އިދިކޮޅު ޕީޕީއެމް ދެވަނައިގައި އޮތްއިރު ޕީޕީއެމްގައި 37،144 މެމްބަރުން އެބަ ތިއްބެވެ. މިއީ މިދިޔަ އަހަރާ އަޅާ ބަލާއިރު 1090 މެމްބަރުންގެ އިތުރުވުމެކެވެ. މިދިޔަ އަހަރު އެޕާޓިގައި ތިބީ 36،054 މެމްބަރުންނެވެ.
ޕީޕީއެމް އާއެކު ކޯލިޝަން ހަދާފައިވާ ޕީއެންސީގައި ތިބީ އެންމެ 4004 މެންބަރުންނެވެ.
މާމިގިލީ ދާއިރާގެ މެންބަރު ގާސިމް އިބްރާހިމް ހިންގަވާ ޖުމްހޫރީ ޕާޓީއިން ވެސް ވަނީ މެންބަރުން އިތުރުވެފައެވެ. އެގޮތުން އަލަށް ގުޅުނު 1697 މީހުންނާއެކު އެ ޕާޓީގައި މިވަގުތު 13،825 މީހުން އެބަތިއްބެވެ.
ކުރީގެ ރައީސް، މައުމޫން އަބްދުލްގައްޔޫމްގެ މޯލްޑިވްސް ރިފޯމް މޫވްމަންޓް (އެމްއާރްއެމް)ގައި ތިބީ އެންމެ 3023 މެމްބަރުންނެވެ.
މީގެ އިތުރުން، އެމްޑީއޭގައި 8178 މެމްބަރުން، އަދާލަތު ޕާޓީގައި 6640 މެމްބަރުން، އެމްޓީޑީގައި 3171 މެމްބަރުން، ޑީއާރްޕީގައި 2902 މެމްބަރުން އަދި މޯލްޑިވްސް ލޭބާ އެންޑް ސޯޝަލް ޑިމޮކްރެޓިކް ޕާޓީގައި 2881 މެމްބަރުން އެބަ ތިބިއެވެ.
