ބަންގްލަދޭޝްގެ ޝަރުޢީ ދާއިރާގެ އައު އައްޔަންކުރުންތަކުގައި މައިނޯރިޓީ ތަމްސީލު ނެތުމާމެދު ކަންބޮޑުވުން ފާޅުކޮށްފި
ބަންގްލަދޭޝްގެ ހައިކޯޓުގެ އިތުރު ފަނޑިޔާރުންގެ ގޮތުގައި އައްޔަންކުރެވުނު 25 ފަނޑިޔާރުންގެ ތެރޭގައި މައިނޯރިޓީ މުޖުތަމަޢުތަކުގެ އެއްވެސް ތަމްސީލެއް ނެތުމާމެދު ބަންގްލަދޭޝް ހިންދޫ ބުދިސްޓް ކްރިސްޓިއަން ޔުނިޓީ ކައުންސިލް (ބީއެޗްބީސީޔޫސީ) އިން ވަނީ ހިތާމަ ފާޅުކޮށްފައެވެ.
އައްޔަންކުރެވުނު 25 ފަނޑިޔާރުންގެ ތެރޭގައި ހިމެނެނީ 9 ޝަރުޢީ އޮފިސަރުންނާއި، 9 ވަކީލުންނާއި، 7 ޤާނޫނީ އޮފިސަރުންނެވެ. ބަންގްލަދޭޝްގެ އާބާދީގެ 10 އިންސައްތައަކީ މައިނޯރިޓީ މުޖުތަމަޢުތަކުގެ މީހުން ކަމުގައި ވީނަމަވެސް، މި އައްޔަންކުރުންތަކުގައި އެ މުޖުތަމަޢުތަކުގެ އެއްވެސް މީހަކު ހިމެނިފައި ނުވާކަން ކައުންސިލުން ފާހަގަކޮށްފައިވެއެވެ.
މި މައްސަލައާ ގުޅިގެން ކައުންސިލްގެ ރައީސް ނިމް ޗަންދްރަ ބޯމިކް، އެގްޒެކެޓިވް ރައީސް އުޝަތަން ތަލުކްދަރ، ސީނިއަރ ނައިބު ރައީސް ނިރްމަލް ރޮޒާރިއޯ އަދި އެކްޓިންގ ޖެނެރަލް ސެކްރެޓަރީ މޮނިންދްރަ ކުމާރް ނާތް ވަނީ ބޮޑު ކަންބޮޑުވުމާއި ކުށްވެރިކުރުން ފާޅުކޮށްފައެވެ.
ބަންގްލަދޭޝްގެ ރައީސް މުޙައްމަދު ޝަހާބުއްދީން، އުއްތަމަ ފަނޑިޔާރު ސައްޔިދް ރިފާޢަތް އަހްމަދުގެ މަޝްވަރާއާއެކު މި އައްޔަންކުރުންތައް ހަދާފައިވާކަމަށް ލޯކަލް މީޑިއާތަކުން ރިޕޯޓުކޮށްފައިވެއެވެ. މި އައްޔަންކުރުންތަކާއެކު ހައިކޯޓުގެ ފަނޑިޔާރުންގެ އަދަދު 113 އަށް އިތުރުވެފައިވެއެވެ.
މި އައްޔަންކުރުންތަކަކީ މުޙައްމަދު ޔޫނުސްގެ އިންތިގާލީ ސަރުކާރުގެ އެޖެންޑާ ކުރިއަށް ގެންދިއުމަށް ކުރެވިފައިވާ ސިޔާސީ މަސައްކަތެއްކަމަށް ތަޖުރިބާކާރުން ދެކެއެވެ. ޝެއިޚް ހަސީނާގެ އަވާމީ ލީގު ސަރުކާރު ވައްޓާލުމަށްފަހު، އޭނާގެ ވެރިކަމުގައި މަސައްކަތްކުރި އެތައް ފަނޑިޔާރުންނަކާއި ވަކީލުންނެއް ހަދާފައިވާ ދޮގު ތުހުމަތުތަކެއްގެ ދަށުން ހައްޔަރުކޮށްފައިވެއެވެ.
