ފުލުހުންގެ ޔުނިފޯމަކީ ވާޖިބެއްގެ ނިޝާން: ސީޕީ
ފުލުހުންގެ ޔުނިފޯމަކީ ހަމައެކަނި ބޭރުފުށުން ފެންނަ ސިފައެއް ނޫން ކަމަށް ޕޮލިސް ކޮމިޝަނަރު އިސްމާލް ނަވީން ވިދާޅުވެއްޖެ އެވެ.
ރޭ ދ. ވާނީގައި ބޭއްވި ފުލުހުންގެ 40 ވަނަ އަސާސީ ތަމްރީން ކޯހުގެ ދަސްވެނިވެ ހިނގާލުމުގެ ރަސްމިއްޔާތުގައި އޭނަ ވިދާޅުވީ ފުލުހުންގެ ޔުނިފޯމަކީ ހަމައެކަނި ބޭރުފުށުން ފެންނަ ސިފައެއް ނޫން ކަމަށާއި ފުލުހުންގެ ޔުނީފޯމަކީ މަސްއޫލިއްޔަތާއި ޒިންމާތަކާއެކު ކޮނޑުގައި އެޅިފައިވާ ވާޖިބެއްގެ ނިޝާން ކަމަށެވެ.
"މީހުންނަށް ބޯލަނބައި، ގަޑިއަށް ފަރުވާތެރިވުމާއި ހެދުން އެޅުމުގައި ގެންގުޅޭ ރީތި ސިފަތަކަކީ ދިވެހި ފުލުހުންގެ ޚިދުމަތުގެ ސިފަ ދައްކުވައިދޭ ކަންތައްތަކެއް. ހަގީގީ ދުނިޔޭގައި ފުލުހުންގެ ގޮންޖެހުންތަކަށް ތިޔަ ފުލުހުން މިހާރު ވަނީ ތައްޔާރުކުރެވިފައި،" ނަވީން ވިދާޅުވި އެވެ. "ކުށްކުރުމާއި މަސްތުވާތަކެއްޗާ، އިޖުތިމާޢީ މައްސަލަތަކާއި، އަދި ކުއްލި ހާލަތްތަކާ ކުރިމަތިލާން ޖެހޭނެ. ބައިވެރިން ވާން ވާނީ ފުލުހުންގެ އިއްޒަތާއި ގަދަރު ހިފަހައްޓާ ބަޔަކަށް. އެކަންކުރާނެކަމުގެ ޔަގީންކަން އެބައޮތް."
އޭނަ ވިދާޅުވީ ފުލުހުންނަކީ މުޖުތަޢުގެ ބަލަދުވެރިން ކަމަށާއި ރައްޔިތުންގެ އިޙްތިރާމް ހޯދުމަށް ފުލުހުން އަބަދުވެސް މަސައްކަތް ކުރަންވާނެ ކަމަށެވެ. އަދި އިންސާފުވެރިކަމާއި ލޯތްބާ އެކު ޚިދުމަތް ކުރުމަކީ ވެސް ފުލުހުންގެ ވާޖިބެއް ކަމަށް ވިދާޅުވި އެވެ.
ސީޕީ ވިދާޅުވީ ގްރެޖުއޭޓްވުމަކީ ދަތުރެއްގެ ނިމުން ނޫން ކަމަށާއި އަދި އެއީ ދަތުރެއްގެ ފެށުން ކަމަށެވެ. އެގޮތުން ރާއްޖޭގެ ކޮންމެ ސަރަހައްދެއްގައި މަސައްކަތް ކުރަން ޖެހުނު ކަމަށް ވިޔަސް ފުލުހުން ތިބީ ފުރިހަމައަށް ތައްޔާރުވެފައި ކަމަށް ވިދާޅުވި އެވެ.
