މިހާރުގެ އުއްމީދަކީ އައްޑޫއާ ކޮޗިން ގުޅާލެވުން: އަހުމަދު ރަޝީދު
އިންޑިއާގެ ކޮޗިންއާއި ކުޅުދުއްފުށި އަދި މާލެއާ ދެމެދު ފެށި ފެރީގެ ދަތުރުތަކަށް ފަހު މިހާރު ކުރެވޭ އުއްމީދަކީ ކޮޗިންއާ އައްޑޫ ސިޓީ ގުޅާލެވުން ކަމަށް ރައްޔިތުން މަޖިލީހުގެ ހިތަދޫ މެދު ދާއިރާގެ މެމްބަރު އަޙުމަދު ރަޝީދު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ އިއްޔެ ކުރެއްވި ޓްވީޓެއްގައެވެ. އެމަނިކުފާނު ސިފަ ކުރައްވާ ގޮތުގައި ކޮޗިންއާ އައްޑޫ ސިޓީ ގުޅުވާލެވުމަކީ އެފްރިކާ ބައްރާ ދިވެހިރާއްޖެ ގުޅުވާލަދޭ އިގްތިސާދީ މަންޒިލަކަށް އައްޑޫ ސިޓީ ވެގެން ދާނެ ކަމެކެވެ.
"މިހާރު ކުރެވޭ އުއްމީދަކީ ތާވަލް ކުރެވިފައިވާ ދަތުރުފަތުރުގެ ނިޒާމަކުން އިންޑިއާގެ ކޮޗިންއާއި އައްޑޫ ސިޓީ ގުޅުވާލެވި ، އައްޑޫ ސިޓީއަކީ އެފްރިކާ ބައްރާ ދިވެހިރާއްޖެ ގުޅުވާލަދޭ އިގްތިސާދީ މަންޒިލަކަށް ވެގެން ދިޔުން" އަހުމަދު ރަޝީދު ލިޔުއްވާފައި ވެއެވެ.
އެމަނިކުފާނުގެ މި ޓްވީޓާ ގުޅިގެން ގިނަ ބަޔަކު ވަނީ ފާޑު ކިޔާފައެވެ. އެގޮތުން އިކޮނޮމިކް މިނިސްޓަރ ފައްޔާޒު އިސްމާއީލްގެ އިތުބާރު ނެތް ކަމުގެ ވޯޓް ނެގުމަށް ރައީސް ނަޝީދު ކުރައްވާ މަސައްކަތުގައި އެމަނިކުފާނު އަމަލު ކުރެއްވި ގޮތަށް ވެސް ފާޑު ކިޔުން އަމާޒު ވެފައިވެއެވެ. ފައްޔާޒުގެ އިތުބާރު ނެތްކަމަށް އެމަނިކުފާނު ސޮއި ކުރެއްވި ނަމަވެސް ފަހުން ވަނީ ސޮއި އަނބުރާ ނަންގަވާފައެވެ. އަދި ސަންގު ޓީވީގެ ޕްރޮގްރާމެއްގައި އެ ސުވާލު ކުރުމުން އެމަނިކުފާނު ވަނީ ސީދާ ޖަވާބު ނުދެއްވާ ވާހަކަ މުޅީން އޮޅުވާލައްވާފައެވެ.
