މިއަދުގެ ޢަޞްރު ނަމާދަށް ހުކުރު މިސްކިތް އަލުން ހުޅުވަނީ، ރިހި ހަނދުވަރެއް ފަދަ ނަލަ ކަމެއް
މާލޭ ހުކުރު މިސްކިތް އާބާތުރަ ފިލުވުމަށްފަހު މިއަދުގެ އަޞްރު ނަމާދަށް ހުޅުވަން ނިންމައިފިއެވެ. މިސްކިތް ހުޅުވަން ނިންމާފައިވާއިރު މިސްކިތުން ފެންނަނީ ރިހި ހަނދުވަރެއް ފަދަ ނަލަ ކަމެކެވެ.
މާލޭ ހުކުރު މިސްކިތަކީ ދިވެހިރާއްޖޭގައި މިހާރު ހުރި އާސާރީ ބިނާތަކުގެ ތެރެއިން އެންމެ ދުވަސްވީ އެއް ބިނާއެވެ.މި މިސްކިތް ބިނާ ކުރެވުނީ މީލާދީން 1656 ވަނަ އަހަރުގައެވެ. މި މިސްކިތަށް މިހާރު 364 އަހަރު ވެފައިވާއިރު އަދިވެސް މި މިސްކިތުގެ ރީތިކަމާއި ފުރިހަމަ ކަމަށް ކުޑަ ނަމަވެސް ބަދަލެއް އައިސްފައެއް ނުވެއެވެ. ދިވެހީންގެ ހުނަރުވެރިކަމާއި ދިވެހި ވަޑީންގެ އަތްތެރިކަމުގެ ރީތި، ޗާލޫ މަސައްކަތްތައް މި މިސްކިތުން ކިތަންމެހާ ވެސް ރީއްޗަށް ދައްކުވައިދެއެވެ. ދިވެހީންނަކީ މަސައްކަތް ކުރަން ކެރޭ، ކަވި މަސައްކަތްތައް ވެސް ފޫހި ކަމެއްނެތި ކުރި ބައެއްކަން މި މިސްކިތަށް ގޮސް ބަލާލައިފި ނަމަ ހާމަވެގެން ދާނެކަން ގައިމެވެ. މި މިސްކިތަކީ އިސްކަންދަރު ރަސްގެފާނު ބިނާ ކުރައްވާފައިވާ މިސްކިތެކެވެ. އެއީ މީގެ 3 ގަރުނު ކުރިންނެވެ.
މިސްކިތުން ފެންނަ ގަލުވަޑާމާއި ލިޔެ ލާފެންކޮށްފައިވާ ލަކުޑީގެ މަސައްކަތަކީ އެ މަސައްކަތުގައި ދިވެހިންނަން ލިބިފައިވާ ހުނަރާއި ކުޅަދާނަކަމަށް މިސާލު ދައްކުވައިދޭ ދިވެހި އާދަކާދައިގެ ފުރިހަމަ ނަމޫނާއެކެވެ. މިއަދުގެ ޒުވާނުން އެމިސްކިތަށް ޒިޔާރާތްކޮށް އަޅުގަނޑުމެންގެ ކާބަފައިންގެ ފަންނުވެރި މަސައްކަތްތައް ބަލައި ނުލާންވީ އެއްވެސް ސަބަބެއް ނެތެވެ. އެއީ މިއަދު އަަޅުގަނޑުމެންގެ ތާރީޚުގެ އެންމެ މުހިނުމު އެއް ބިނާއެވެ. ނަމަވެސް މިސްކިތުގެ ބައެއް ތަންތަނުގައި ކަތުރުފަނި އަޅާ އެތަންތަން ހަލާކުވާން ފަށައިފައިވާ ތަން ވެސް ފެނެއެވެ. އަދި އެ މިސްކިތް ވަށައިގެން ގިނަ އުސް އިމާރާތްތަކެއް ބިނާ ކޮށްފައިވާއިރު، މި އިމާރާތްތައް ބިނާކުރުމުގެ ތެރޭގައިވެސް މި މިސްކިތަށް ގުޑުން އަރާ އަސަރު ކޮށްފައިވާ ކަމަށް ވެއެވެ.
ކަތުރުފަނި އަޅާފައިވާތީ ފަރުވާދީފައި... ދެން އިމޭޖްސް:އިބްރާހިމް ޝަމްވީލް
ހުކުރު މިސްކިތް އާބާތުރަ ފިލުވުމަށްޓަކައި ބަންދުކޮށްފައި ހުންނަތާ މިހާރު ދުވަސްގަނޑެއް ވެއްޖެއެވެ. މި މިސްކިތް ބަންދު ކުރީ މި މިސްކިތުގައި ކޮންމެހެން ކުރަން ޖެހޭ މަރާމާތުތަކެއް ކުރުމުގެ ގޮތުންނެވެ. ފާއިތުވެދިޔަ ހަފްތާގައި ދައުލަތުގެ މީޑިއާ "ޕީއެސްއެމް" އަށް ދެއްވި އިންޓަވިއުއެއްގައި ހެރިޓޭޖް މިނިސްޓްރީގެ މީޑިއާ އޮފިޝަލް އިސްމާޢިލް ނާއިލް ނަޝީދު ވަނީ، ހުކުރު މިސްކިތުގެ އާބާތުރަ ފިލުވައި ނިންމައި މިސްކިތް އަލުން ހުޅުވުމުގެ މަސައްކަތް ކުރަމުން އަންނަ ކަަމަށް ވިދާޅުވެފައެވެ.
ހުކުރު މިސްކިތުގެ އެތެރޭގެ ފޮޓޯއެއް... ދެން އިމޭޖްސް:އިބްރާހިމް ޝަމްވީލް
މިސްކިތް އާބާތުރަ ފިލުވައި އަލުން ހުޅުވަން ތައްޔާރުވެފައިވާއިރު، މިސްކިތް މިހާރު ވަރަށް ޗާލެވެ. އެގޮތުން މިސްކިތު ތެރެއިން ވެސް ތަފާތު ކަންތައްތަކެއް ފާހަގަ ވެގެން ދިޔައެވެ. އެގޮތުން ކުރިން މި މިސްކިތުގައި އަޅާފައި އޮންނަނީ "ތުނިތުނި" ކާޕެޓެކެވެ. އެ ކާޕެޓަށް ވަރަށް ބޮޑަށް އޮތީ ހިރަފުސް އަޅާފައެވެ. ނަމަވެސް މިހާރު ވަނީ ތަރަފާލެއް އަޅާ މިސްކިތުގެ ތަޅުން ނުހަނު ރީތި ކޮށްލާފައެވެ. އެތަނުގައި ފައި ޖެހުމުން ވެސް ކުރެވުނީ ބުނެދޭން ނޭނގޭ ފަދަ އިހްސާސް ތަކެކެވެ.
މިސްކިތް އާބާތުރަ ފިލުވުމުގައި އެންމެ އިސްކޮށް އުޅުއްވި ބޭފުޅެއް ކަމުގައިވާ ހެރިޓޭޖް މިނިސްޓްރީގެ ސީނިއާރ އެގްޒެކެޓިވް ޑިރެކްޓަރ މުހައްމަދު ނާޒިމް ވަނީ "ދެން" އަށް މި މިސްކިތުގެ މަރާމާތުގެ މަސައްކަތްތައް ދިޔަގޮތް ކިޔައިދެއްވާފައެވެ. ނާޒިމް ވިދާޅުވީ، މިސްކިތުގެ ކުދި މަރާމާތުތައް މިހާރު ކުރެވިފައިވާ ކަމަށެވެ. އެގޮތުން ހުކުރު މިސްކިތުގެ ބައެއް ބެރިތައް ބިންދައިގެން ގޮސްފައި ހުރި ކަމަށާއި، އެ ބެރިތައް މިހާރު ބަދަލުކުރެވި އެ ބެރި އަލުން އެތަންތަނަށް ލައްވާފައިވާކަމަށް ނާޒިމް ފާހަގަ ކުރެއްވިއެވެ.
ހަމައެހެންމެ މިސްކިތުގެ އެތެރެ އާއި ބޭރު ފެންޖަހާ އެއްކޮށް ވަނީ ސާފު ކުރެވިފައިވާ ކަމަށާއި، އެގޮތުން ލަކުޑިތައް ވެސް ފެންފޮތި ލައިގެން ފޮހެ ސާފްކޮށްފައިވާ ކަމަށް ނާޒިމް ވިދާޅުވިއެވެ. އަދި ކަތުުރު ފަނި އަޅައިގެން ބޮއެފައި ހުރި ބެރިތަކަށް ވެސް މިވަގުތު ދެވެން ހުރި އެންމެ ރަނގަޅު ފަރުވާއެއް ވަނީ ދީފައިކަން ނާޒިމް ފާހަގަ ކުރެއްވިއެވެ.
މި މިސްކިތް ހަގީގަތުގައި ބަންދު ކުރީ މި މިސްކިތުގައި މައްސަލަތަކެއް ހުރިކަން ފާހަގަވެގެން މަރާމާތަށް ކަމުގައި ނާޒިމް ވިދާޅުވިއެވެ. އެހެން ނަމަވެސް ކޮވިޑް-19ގެ ހާލަތުގެ ސަބަބުން މަސައްކަތް ކުރިއަށް ނުގެންދެވި މަސައްކަތް މަޑުޖެހި، މަަސައްކަތް ކުރަން އައި މީހުން ވެސް އެބުރި ގައުމަށް ދާން ޖެހުނު ކަމަށް ނާޒިމް ވިދާޅުވިއެވެ.
ހުކުރު މިސްކިތުގެ އާބާތުރަ ފިލުވުމުގެ މަސައްކަތަކީ އިންޑިއާ ސަރުކާރުގެ ދީލަތި އެހީގައި ހިންގާފައިވާ މަސައްކަތެކެވެ.
"އިންޑިއާ ސަރުކާރުގެ ދީލަތި އެހީގައި ކުރާ ކަމެއް ކަމަކީ. ދެން އެ ބޭފުޅުން (އިންޑިއާއިން މަސައްކަތް ކުރަން އައި ބޭފުޅުން) އެކޮޅަށް ވަޑައިގެންނެވުމާއި ގުޅިގެން އަޅުގަނޑުމެން އަވަސްވެގަތީ މިތަނުގައި މިހާރު ހުރީ ކޮންކޮން ކަންތައްތަކެއްތޯ އަޅުގަނޑުމެންނަށް ކުރެވެން"
ނާޒިމް
މިސްކިތް ބަންދު ކޮށްފައި ހުންނާތީ ރައްޔިތުންގެ ގިނަ ޝަކުވާތަކެއް ވެސް އަންނަ ކަމުގައި ނާޒިމް ފާހަގަ ކުރެއްވިއެވެ. އެހެންނަމަވެސް ބުނެދެވޭ ވަރަށްވުރެ ވެސް ބޮޑަށް މިސްކިތަށް ހުރީ ގެއްލުން ލިބިފައިކަން ނާޒިމް ފާހަގަ ކުރެއްވިއެވެ. ނާޒިމް ވިދާޅުވީ އަދި އެވާހަކަތައް ދެއްކެވުމުން ގިނަ ބަޔަކު އެވާހަކަތައް ގަބޫލު ނުކުރާ ކަމަށެވެ.
މިނިސްޓްރީގެ އިސްވެރިންގެ މެދުގައި މަޝްވަރާތަކެއް ކުރެވި މިދުވަސްކޮޅު އަނެއްކާ ވެސް މިސްކިތް ހުޅުވާލުމަށް ނިންމިފައިވާކަމަށް ނާޒިމް ފާހަގަ ކުރެއްވިއެވެ.
"އިރާދަކުރެއްވިއްޔާ ބުރާސްފަތި ދުވަހުގެ އަސްރު ނަމާދަށް ހުކުރު މިސްކިތް ހުޅުވިގެން ދާނެ"
ނާޒިމް
ހުކުރު މިސްކިތަކީ މާލޭގައި މިހާރު ހުރި އެންމެ ގިނަ ދުވަސްވީ އެއް ބިނާއެވެ. ދިވެހި ތާރީހުގެ އެތައް ވާހަކަތަކެއް މި މިސްކިތުން ވެސް އެނގިގެން ދެއެވެ. އެތައް ދުވަހަކަށްފަހު ހުކުުރު މިސްކިތް ހުޅުވުމަށް އަނެއްކާވެސް އެހުރީ ތައްޔާރު ވެފައެވެ. މިސްކިތް ވަރަށް ވެސް ޗާލެވެ. އެހާމެ ހިތްގައިމެވެ. މިސްކިތް ހީވަނީ ރިހި ހަނދުވަރެއްގެ ނަލަ އަލިކަމެއް އެޅިފައިވާ ހެންނެވެ.
Ads by STO
