ހުކުރު މިސްކިތް އަލުން ހުޅުވާލުން، ޢަޞްރު ނަމާދުގެ ޖަމާޢަތާއެކު!
މާލޭގެ ހުކުރު މިސްކިތް އާބާތުރަ ފިލުވުމަށް ފަހު މިއަދުގެ ޢަޞްރު ނަމާދަށްފަހު ހުޅުވާލައިފިއެވެ. އަލުން ހުކުރު މިސްކިތް ހުޅުވާލުމަށްފަހު، އެމިސްކިތުގައި ޖަމާޢަތުގައި މިއަދުގެ ޢަޞްރު ނަމާދު ވެސް ވަނީ ކޮށްފައެވެ.
ދިވެހި ރާއްޖޭގައި ހުރި އާސާރީ ބިނާތަކުގެ ތެރެއިން މާލޭ ހުކުރު މިސްކިތަކީ މިހާރު ހުރި އެންމެ އާސާރީ އެއް ބިނާއެވެ. އެމިސްކިތް ބިނާކުރެވިފައިވަނީ މީލާދީން 1656 ވަނަ އަހަރުގައެވެ.
މާލޭ ހުކުރު މިސްކިތަށް މިހާރު 364 އަހަރު ވެފައިވާއިރު އަދިވެސް މިމިސްކިތުގެ ރީތިކަމާއި ފުރިހަމަ ކަމަށް ކުޑަނަމަވެސް ބަދަލެއް އައިސްފައެއް ނުވެއެވެ.
ދިވެހީންގެ ހުނަރުވެރިކަމާއި ދިވެހި ވަޑީންގެ އަތްތެރިކަމުގެ ރީތި، ޗާލު މަސައްކަތްތައް ދައްކުވައިދޭ މި މިސްކިތުގައި މިއަދު ގާތްގަނޑަކަށް 20 ވަރަކަށް މީހުން ޖަމާޢަތުގައި ޢަޞްރު ނަމާދު ކޮށްފައިވެއެވެ.
މާލޭ ހުކުރު މިސްކިތުގެ އެތެރެއާއި ބޭރަށް ބަލާލުމުން ވެސް އެންމެ ބޮޑަށް ދޭހަވާ އެއް ކަމަކީ ދިވެހީންނަކީ މަސައްކަތް ކުރަން ކެރޭ، ކަވި މަސައްކަތްތައް ވެސް ފޫހި ކަމެއްނެތި ކުރި ބައެއް ކަމެވެ.
މި މިސްކިތަކީ މީގެ ތިން ޤަރުނު ކުރިން، އިސްކަންދަރު ރަސްގެފާނު ބިނާ ކުރައްވާފައިވާ މިސްކިތެކެވެ.
ތާރީޚާއި ސަޤާފަތް އޭގެ އެންމެ ފުރިހަމަ ގޮތުގައި ރަމްޒުކޮށްދޭ ހުކުރު މިސްކިތް އާބާތުރަ ފިލުވުމަށްޓަކައި ބަންދު ކޮށްފައި ހުންނަތާ މިހާރު ގިނަ ދުވަސްތަކެއް ވެއްޖެއެވެ. މިސްކިތް ބަންދު ކުރީ މި މިސްކިތުގައި ކޮންމެހެން ކުރަން ޖެހޭ މަރާމާތުތަކެއް ކުރުމުގެ ގޮތުންނެވެ.
