ޕޫޓިން އިންޑިއާގެ މިނިވަން ސިޔާސަތާއި މޯދީގެ ވެރިކަމުގައި ހޯދާފައިވާ އިޤްތިޞާދީ ކުރިއެރުމަށް ތަޢުރީފު ކުރައްވައިފި
ރަޝިއާގެ ރައީސް ވްލެޑިމިއަރ ޕޫޓިން، އިންޑިއާގެ ބޮޑުވަޒީރު ނަރެންދުރަ މޯދީގެ ވެރިކަމުގެ ދަށުން އެ ޤައުމުން ގެންގުޅޭ މިނިވަން އަދި ސިޔާދަތީ ސިޔާސަތަށް ތަޢުރީފު ކުރައްވައިފިއެވެ. މިކަން އެމަނިކުފާނު ފާހަގަކުރެއްވީ ހުކުރު ދުވަހު ނިއުދިއްލީގައި ބޭއްވި އިންޑިއާ-ރަޝިއާގެ ވިޔަފާރީގެ ފޯރަމްގައި ވާހަކަފުޅު ދައްކަވަމުންނެވެ. ޕޫޓިން ވަނީ އިންޑިއާގެ އިޤްތިޞާދީ ކުރިއެރުންތަކަށް އަލިއަޅުވާލައްވައި، ދުނިޔޭގައި އެންމެ ބާރަށް ކުރިއަރަމުން އަންނަ އިޤްތިޞާދުތަކުގެ ތެރޭގައި އިންޑިއާ ހިމެނޭކަން ފާހަގަކުރައްވާފައެވެ. އެމަނިކުފާނު ވިދާޅުވީ، މި ކާމިޔާބީއަކީ ހަރުދަނާ އިޤްތިޞާދީ ސިޔާސަތުތަކާއި، ޓެކްނޮލޮޖީގެ ސިޔާދަތު އިތުރުކުރަމުންދާ ‘މޭކް އިން އިންޑިއާ’ ފަދަ ޕްރޮގްރާމްތަކުގެ ނަތީޖާކަމަށެވެ.
ރައީސް ޕޫޓިން ވިދާޅުވީ، ރަޝިއާގެ ވަފުދުގެ މި ދަތުރުފުޅަކީ ހަމައެކަނި ހަކަތަ (އެނަރޖީ) އާއި ތެލާއި ގޭހުގެ ކޮންޓްރެކްޓްތަކާ ބެހޭ މަޝްވަރާތަކަށްވުރެ ފުޅާ ދާއިރާއެއްގައި ކުރެވުނު ދަތުރެއްކަމަށެވެ. އެމަނިކުފާނު ވަނީ އިންޑިއާއާ އެކު ތަފާތު ދާއިރާތަކުން ގުޅުން ބަދަހިކުރުމުގެ މުހިންމުކަން ފާހަގަކުރައްވާފައެވެ. އަދި ދެ ޤައުމަށް ވެސް އަދި ބޭނުން ނުކުރެވި ހުރި ގިނަ ފުރުޞަތުތަކެއް އެބަހުރިކަމަށް ވިދާޅުވިއެވެ. ބޮޑުވަޒީރު މޯދީ ވަނީ އަމިއްލަ ބައްދަލުވުންތަކުގައި ވެސް އިންޑިއާގެ އިޤްތިޞާދީ ބޮޑެތި ފުރުޞަތުތަކުގެ ވާހަކަ ތަކުރާރުކޮށް ދައްކަވާފައިވާތީ، މި ފޯރަމް ބޭއްވުނީ އެ ފުރުޞަތުތައް އިތުރަށް ހޯދުމަށްކަމަށް ޕޫޓިން ވިދާޅުވިއެވެ.
ޕޫޓިން ވަނީ ދުނިޔޭގެ ފެންވަރުގައި އިންފޮމޭޝަން ޓެކްނޮލޮޖީ (އައި.ޓީ) އަދި ފާމަސޫޓިކަލްސް ދާއިރާގައި އިންޑިއާގެ އިސްދައުރާއި، އެ ޤައުމުގެ އިޤްތިޞާދީ ހީވާގިކަމާއި އީޖާދީ ގާބިލުކަން ފާހަގަކުރައްވާފައެވެ. މީގެ އިތުރުން، ރަޝިއާއާއި އިންޑިއާއާ ދެމެދު އޮތް ވަރުގަދަ ވިޔަފާރީގެ ގުޅުމަށް އަލިއަޅުވާލައްވަމުން، ފާއިތުވި ތިން އަހަރުގެ ތެރޭގައި ވިޔަފާރީގެ މިންވަރު %80 އިތުރުވެ، މިދިޔަ އަހަރު 64 ބިލިއަން ޑޮލަރަށް އަރާފައިވާކަން އެމަނިކުފާނު ހާމަކުރެއްވިއެވެ. ދެ ޤައުމުގެ ބޮޑެތި ކޮންސިއުމަރ މާކެޓްތަކަށް ބަލާއިރު، ދެ ފަރާތުގެ ވިޔަފާރިއާއި އިންވެސްޓްމެންޓް އިތުރަށް ފުޅާކުރުމަށް ބޮޑެތި ފުރުޞަތުތަކެއް އެބަހުރިކަމަށް ޕޫޓިން ޔަޤީންކަން ދެއްވިއެވެ.
ބޮޑުވަޒީރު މޯދީގެ ވެރިކަމުގެ ދަށުން އިންޑިއާގެ މިނިވަން ސިޔާސަތަށް ތަޢުރީފު ކުރައްވައި، އިޤްތިޞާދީ ގުޅުންތައް އިތުރަށް ވަރުގަދަ ކުރުމަށް ރަޝިއާ އޮތީ ތައްޔާރަށްކަމަށް ޕޫޓިން ތަކުރާރުކުރެއްވިއެވެ. އެމަނިކުފާނުގެ ދެ ދުވަހުގެ ދަތުރުފުޅުގައި ބޭއްވި ބައްދަލުވުންތަކަށް ފަހު، އިންޑިއާ-ރަޝިއާގެ އިޤްތިޞާދީ އެއްބާރުލުން އިތުރުކުރުމުގެ ލިޔުމެއް ވަނީ ފާސްކުރެވިފައެވެ. ޕޫޓިން ޔަޤީންކަން ދެއްވީ، ރަޝިއާގެ ވިޔަފާރިތައް އިންޑިއާއިން ގިނަ ޢަދަދެއްގެ މުދަލާއި ޚިދުމަތްތައް ގަންނަން ތައްޔާރަށް ތިބިކަމަށާއި، މިފަދަ ހުރިހާ އެއްބާރުލުމަކަށް ރަޝިއާ ސަރުކާރުގެ ފުރިހަމަ އެއްބާރުލުން ލިބޭނެކަމަށެވެ.
