ކެނެޑާގައި ހިނގި ކެޔަކް އެކްސިޑެންޓެއްގައި ޗައިނާގެ ޑިސިޑެންޓެއް މަރުވުމުގެ މައްސަލާގައި ކުރީގެ ޖާސޫސީ މީހެއްގެ ޝައްކު
ޗައިނާގެ ކުރީގެ އިންޓެލިޖެންސް އޮޕަރޭޓިވްއެއް ކަމަށްވާ މީހަކު ވަނީ އޭނާގެ 15 އަހަރުގެ މަސައްކަތުގައި ބޭރުގެ ޑިސިޑެންޓުންނަށް ޖާސޫސްކުރި ގޮތުގެ ސިއްރުތައް ހާމަކޮށްފައެވެ. މި މައުލޫމާތުތަކުގެ ތެރޭގައި، ބްރިޓިޝް ކޮލަމްބިއާގައި ކެޔަކް އެކްސިޑެންޓެއްގައި މަރުވި ޗައިނާގެ އެކްޓިވިސްޓެއްގެ ހަރަކާތްތައް ބެލެހެއްޓުމުގެ މައްސަލަ ހިމެނެއެވެ. “އެރިކް”ގެ ނަމުގައި ވާހަކަ ދެއްކި މި ކުރީގެ ޖާސޫސީ މީހާ ވަނީ 2008 އިން 2023 އާ ހަމައަށް ޗައިނާގެ މިނިސްޓްރީ އޮފް ޕަބްލިކް ސެކިއުރިޓީއަށް މަސައްކަތްކޮށް، ބޭރުގައި ތިބި ޗައިނާގެ ކޮމިއުނިސްޓް ޕާޓީގެ ފާޑުކިޔާ ފަރާތްތަކަށް ޓާގެޓްކޮށްފައިވާ ކަމަށް ބުނެފައެވެ.
އެރިކް ވަނީ ނޫސްވެރިންނަށް ގިނަ އަދަދެއްގެ ލިޔެކިޔުންތައް ހާމަކޮށްފައެވެ. އެއީ މާލީ ރެކޯޑުތަކާއި މުވާސަލާތީ މައުލޫމާތުތަކެވެ. މިކަމުގެ ސަބަބުން ޗައިނާގެ ބޭރުގެ ޖާސޫސީ އޮޕަރޭޝަންތަކުގެ ތަފާތު މަންޒަރެއް ފެނިގެންދެއެވެ. އޭނާ ބުނި ގޮތުގައި ކުރިން ޑިމޮކްރަސީއަށް މަސައްކަތްކުރާ އެކްޓިވިސްޓެއްގެ ގޮތުގައި ހުރި ނަމަވެސް، އޭނާއަށް ވަނީ ޖާސޫސީ މަސައްކަތް ކުރުމަށް މަޖުބޫރުކުރެވިފައެވެ. އޭނާގެ މަސައްކަތްތަކުގެ ތެރޭގައި ޗައިނާގެ ދައުލަތުގެ ކުންފުނިތަކާ ގުޅިގެން ހިންގާ ވިޔަފާރިތަކުގެ ނަމުގައި ތަފާތު ގައުމުތަކުގައި ތިބި ޑިސިޑެންޓުންގެ ހަރަކާތްތައް ބެލެހެއްޓުން ހިމެނެއެވެ.
އެރިކް ޓާގެޓްކުރި އެއް ފަރާތަކީ ޗައިނާގެ ފަންނާނެއް އަދި ސިޔާސީ އެކްޓިވިސްޓެއް ކަމަށްވާ ހުއާ ޔޮންގްއެވެ. ހުއާ ޔޮންގް ވަނީ ބޭރުގައި ހިމާޔަތް ހޯދުމުގެ ކުރިން ޗައިނާގައި ގިނަ ފަހަރު ހައްޔަރުކުރެވިފައެވެ. 2020 ވަނަ އަހަރު، ހުއާ ޔޮންގް ކެމްބޯޑިއާ ނުވަތަ ލާއޯސްއަށް ގެންދިއުމަށް އެރިކްއަށް އަންގާފައިވެއެވެ. އެއީ ޗައިނާގެ އޮފިޝަލުންނަށް އޭނާ ހައްޔަރުކުރެވޭނެ ގޮތެއް ހެދުމަށެވެ. އެރިކް ވަނީ އެންކްރިޕްޓްކޮށްފައިވާ މެސެޖިންގ އެޕްލިކޭޝަންތައް ބޭނުންކޮށްގެން “ވީ ބްރިގޭޑް” ނަމަކަށް ކިޔާ ކޮމިއުނިސްޓް ޖަމާއަތާ ދެކޮޅު ފޭކް ގްރޫޕެއް އުފައްދައި، ހުއާގެ އިތުބާރު ހޯދާފައެވެ. އޭނާ ވަނީ އޭނާގެ ސިއްރު ހާމަނުކޮށް ބެންކޮކްގައި ހުއާއާ ބައްދަލުވެސް ކޮށްފައެވެ.
2021 ވަނަ އަހަރު ހުއާ ކެނެޑާގެ ސަންޝައިން ކޯސްޓަށް ކުއްލިއަކަށް ބަދަލުވުމުން، އެރިކްގެ ހެންޑްލަރުން އޭނާއަށް އަންގާފައިވަނީ ޗައިނާއަށް އެނބުރި ގޮސް ދުރުން ހުރެ ހުއާގެ ހަރަކާތްތައް ބެލެހެއްޓުމަށެވެ. ހުއާ ވަނީ ބީ.ސީ. ގެ ގިބްސަންސްގައި ވަޒަންވެރިވެ، ކަކުނި މަސްވެރިކަމާއި ކެޔަކް ދުއްވުން ފަށާފައެވެ. 2022 ވަނަ އަހަރުގެ ނޮވެމްބަރު މަހު، ހުއާ ކެޔަކް ދަތުރަކަށް ފަހު އެނބުރި ނައުމުން، އޭނާގެ ހަށިގަނޑު ފަހުން ވަނީ ކައިރީގައި އޮތް ރަށެއްގެ އައްސޭރިފަށުން ފެނިފައެވެ.
އާރްސީއެމްޕީން ފުރަތަމަ މި މައްސަލާގައި ކުށުގެ އެއްވެސް އަމަލެއް ނުފެންނަ ކަމަށް ބެލި ނަމަވެސް، އެރިކްއާއި ޗައިނާގެ އޮޕަރޭޝަންތަކާ ބެހޭ މައުލޫމާތު ހުރި އެހެން ފަރާތްތަކުން ޝައްކުކުރަނީ މި މަރު ހިނގާފައިވަނީ ހަމައެކަނި އެކްސިޑެންޓެއްގެ ސަބަބުން ނޫން ކަމަށެވެ. “ޗައިނާގެ ފުލުހުން އާންމުކޮށް ބޭނުންކުރާ އުކުޅުތަކަށް ބަލާއިރު، އެ ޕާޓީގެ އެހެން އޭޖެންޓުން ކެނެޑާގައި ވެސް ހަރަކާތްތެރިވާނެކަން ކަށަވަރު،” އެރިކް ބުނެފައިވެއެވެ. ޗައިނާއަށް ކުރިން ކެނެޑާގެ ސަފީރަކަށް ހުންނެވި ގައީ ސެއިންޓް-ޖެކްސް ވިދާޅުވީ، “ޗައިނާގެ ވެރިކަމަށް ލަދެއް ނުގަނެއެވެ. އަދި އެ ވެރިކަމުގެ މަގްސަދުތައް ހާސިލުކުރުމަށްޓަކައި އަނިޔާވެރި ގޮތްތައް ބޭނުންކުރަން ވެސް ފަސްނުޖެހެއެވެ.”
ބީ.ސީ. ކޮރޯނާސް ސާވިސްއިން މި މައްސަލަ ބަލަމުންދާއިރު، ހުއާގެ މަރުގެ ތަހުގީގު އަދިވެސް ހުޅުވާލެވިފައިވާ ގޮތަށް އެބައޮތެވެ. އާންމުކޮށް 16 މަސް ދުވަހުގެ ތެރޭގައި ނިންމާ މިފަދަ މައްސަލަތަކަށްވުރެ މި މައްސަލަ ވަނީ ވަގުތު ނަގާފައެވެ. 2023 ވަނަ އަހަރު ޗައިނާއިން ފިލައިގެން މިހާރު އޮސްޓްރޭލިއާގައި ދިރިއުޅޭ އެރިކް ވަނީ ކެނެޑާގެ ބޭރުގެ ނުފޫޒުގެ ތަހުގީގަށް ލިޔެކިޔުންތައް ހުށަހަޅާފައެވެ. އޭނާ ބުނެފައިވަނީ “މި މައްސަލާގައި އިތުރަށް ތަހުގީގުކުރަން ޖެހޭފަދަ ބައެއް އާދަޔާ ހިލާފު ކަންތައްތައް އެބަހުރި”ކަމަށެވެ.
