ލަންކާ ޓޫރިޒަމް އާމްދަނީގެ ބޮޑުބައި ބޭރުވާކަން ހާމަވެއްޖެ
ސްރީލަންކާގެ ފަތުރުވެރިކަމުގެ ސިނާއަތުން ލިބޭ އާމްދަނީގެ ތިންބައިކުޅަ އެއްބައި، އެކި ސަބަބުތަކާ ހުރެ ގައުމުގެ އިގްތިސާދުން ބޭރުވަމުންދާކަން ހާމަވެއްޖެއެވެ.
ސްރީލަންކާ ޓޫރިޒަމް ޑިވެލޮޕްމަންޓް އޮތޯރިޓީއާއި ޔޫއެން ޓޫރިޒަމް ގުޅިގެން ދާދިފަހުން ބޭއްވި 'ނޭޝަނަލް ވެލިޑޭޝަން ވޯކްޝޮޕް'ގައި ހާމަކުރި ގޮތުގައި އެ ގައުމުގެ "އިގްތިސާދީ ލީކޭޖް"ގެ އަގު އަހަރަކު ގާތްގަނޑަކަށް 1.13 ބިލިއަން އެމެރިކާ ޑޮލަރަށް އަރައެވެ.
މި ދިރާސާއިން ދައްކާގޮތުގައި ފަތުރުވެރިކަމުގެ ތިން ދާއިރާއެއް ކަމަށްވާ އެކޮމޮޑޭޝަން، ޓްރެވަލް އެޖެންޓުން އަދި ވެލްނަސް ސެކްޓާގައި މި މައްސަލަ ބޮޑެވެ. މައިގަނޑު ސަބަބުތަކުގެ ތެރޭގައި ފަތުރުވެރިންނަށް ބޭނުންވާ ކާބޯތަކެއްޗާއި، މެޝިނަރީ އަދި ފަރުނީޗަރު ފަދަ ތަކެތި އިމްޕޯޓް ކުރުމަށް އަހަރަކު 800 މިލިއަން ޑޮލަރަށް ވުރެ ގިނަ ފައިސާ ހޭދަވުން ހިމެނެއެވެ. އަދި އޮންލައިން ޓްރެވަލް އެޖެންޓުންނާއި ބޭރުގެ އޮޕަރޭޓަރުންނަށް ދައްކަންޖެހޭ ކޮމިޝަންތައް ގައުމުން ބޭރުވެއެވެ.
ދިރާސާ ދައްކާ ގޮތުން ސްޕާ އަދި ވެލްނަސް ދާއިރާގައި ބޭރުގެ ތެރަޕިސްޓުން ގެންގުޅުމާއި، ބޭރުގެ އުފެއްދުންތައް ބޭނުންކުރުމުގެ ސަބަބުން މި ދާއިރާގެ އާމްދަނީގެ 50 އިންސައްތައަށް ވުރެ ގިނަ ބައި ބޭރުވެ އެވެ.
ލަންކާއިން ވަނީ 2024ވަނަ އަހަރު ފަތުރުވެރިކަމުން 3.17 ބިލިއަން ޑޮލަރުގެ އާމްދަނީއެއް ލިބިފައިވާ އިރު، މިއީ އެ ގައުމަށް ބޭރު ފައިސާ ވަންނަ ތިންވަނައަށް އެންމެ ބޮޑު ދާއިރާއެވެ. ނަމަވެސް، ފަތުރުވެރިން އިތުރުވުމަކުން އެކަނި އިގްތިސާދަށް ފައިދާ ނުކުރާކަން ފާހަގަކޮށް، ކަމާ ބެހޭ ފަރާތްތަކުން މިހާރު އަމާޒު ހިފާފައި ވަނީ ލިބޭ އާމްދަނީގެ ބޮޑު ބައެއް ގައުމުގައި ހިފެހެއްޓޭނެ ގޮތްތަކެއް ހޯދުމަށެވެ.
މި ރާއްޖެއިން ތިކަހަލަ ދިރާސާއެެެއް ހަދާފި ނަމަ ފެންނާނީ %0.5 ވަންނަތަން،