އަބުރުގެ ބިލާއެކު 28 ބިލެއް ސަރުކާރުން ހުށަހަޅަނީ
އަބުރުގެ ބިލާއެކު 28 ބިލެއް ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅަން ނިންމައިފި އެވެ.
މަޖިލިހަށް މިބިލުތައް ހުށަހަޅަން ނިންމާފައިވާކަން ހާމަ ކޮށްފައި ވަނީ ބަންޑާރަ ނައިބުގެ އޮފީހުންނެވެ.
މަޖިލީހުގެ ތިން ވަނަ ދައުރަށް 28 ބިލެއް ހުށަހަޅަން ނިންމާފައިވާއިރު އޭގެ ތެރޭގައި މުޅިން އަލަށް 19 ބިލެއް ހިމެނޭ ކަމަށް ވެސް މައުލޫމާތު ލިބެއެވެ. އަބުރުގެ ބިލު ހިމެނެނީ މި 19 ބިލުގެ ތެރޭގައެވެ. އޭގައި ހިމެނެނީ އަބުރާ ބެހުމުގެ ސަބަބުން ލިބޭ ގެއްލުމުގެ ބަދަލު ނަގައި ދިނުމަށެވެ.
ކުރީގެ ރައީސް އަބްދުﷲ ޔާމީން ޢަބްދުލްޤައްޔޫމްގެ ވެރިކަމުގައި "އަބުރު ރައްކާތެރިކުރުމާއި ހިޔާލު ފާޅުކުރުމުގެ މިނިވަންކަމުގެ ގާނޫނު" ތަސްދީގުކުރިއެވެ. އެ ގާނޫނާއެކު މީޑިއާތަކަށް ބޮޑެތި ގޮންޖެހުންތަކެއް ކުރިމަތިވުމާއެކު މިސަރުކާރުން ވަނީ އެ ގާނޫނު އުވާލާފަ އެވެ.
މިބިލުތަކުގެ އިތުރުން ވެސް މިހާރު ޢަމަލު ކުރަމުންދާ 9 ބިލެއް ސަރުކާރުގެ ފަރާތުން ވަނީ ހުށަހަޅަން ނިންމާފައެވެ.
މިދައުރުގައި މަޖިލިހަށް ހުށަހަޅާ ބިލުތަަކުގެ ތެރޭގައި ކޯޓުތަކާއި ފަނޑިޔާރުންގެ ގާނޫނަށް އިސްލާހު ގެނައުމުގެ ބިލާއި ހެއްކާއި ބެހޭ ބިލު އަދި ފޮރިން އިންވެސްޓްމަންޓްގެ ބިލާއި އިލެކްޓްރޯނިކް މުއާމަލާތްތަކުގެ ބިލު ހިމެނެއެވެ.
Ads by STO
