މީހެއްގެ ގައިގައި ސައިކަލުން ޖެއްސުމަށްފަހު ފިލި މައްސަލައެއްގައި މީހަކު ހޯދަނީ
މާލޭގެ މަޖީދީމަގު، އަތަމާ ޕެލަސް ކައިރިން މަގު ހުރަސްކުރަން އުޅުނު އަންހެނެއްގެ ގައިގައި ސައިކަލަކުން ޖެއްސުމަށްފަހު މަޑުނުކޮށް ފިލާފައިވާ މައްސަލައަކާ ގުޅިގެން، އެ އުޅަނދު ދުއްވަން އިން މީހާ ހޯދުމުގެ މަސައްކަތް ފަށައިފިއެވެ.
ދިވެހި ފުލުހުންގެ ޚިދުމަތުން ބުނީ، ޓްރެފިކް އިންވެސްޓިގޭޝަން ޑިޕާޓްމަންޓުން ތަހުގީގުކުރަމުންދާ މި މައްސަލައިގައި ހިމެނޭ ފަރާތަކީ ކާކުކަން މިހާތަނަށް ދެނެގަނެވިފައި ނުވާކަމަށެވެ.
އެހެންކަމުން އެ އިދާރާއިން ވަނީ މި ހާދިސާއާ ގުޅުންހުރި ވީޑިއޯ ފުޓޭޖެއް އާންމުކޮށް، އޭގައި ފެންނަ ފަރާތް ދެނެގަތުމަށް އާންމުންގެ އެހީތެރިކަމަށް އެދިފައެވެ.
މި އެކްސިޑެންޓް ހިނގި މަންޒަރު ދުށް އެއްވެސް ފަރާތެއް ވާނަމަ، ނުވަތަ ފުލުހުން އާންމުކޮށްފައިވާ ވީޑިއޯއިން ފެންނަ ފަރުދާއާ ގުޅޭ އެއްވެސް މައުލޫމާތެއް ލިބިފައިވާނަމަ، ލަސްނުކޮށް ޓްރެފިކް އިންވެސްޓިގޭޝަންގެ ނަންބަރު 9444880 އަށް ގުޅުއްވައި އެކަން ހިއްސާކޮށްދެއްވުމަށް ފުލުހުން ވަނީ އިލްތިމާސްކުރައްވާފައެވެ.
ކުށްކުރާ ފަރާތްތައް ހޯދައި ފިޔަވަޅު އެޅުމުގައި އާންމު ރައްޔިތުންގެ ފަރާތުން ކެނޑިނޭޅި ލިބެމުންދާ ފުރިހަމަ އެއްބާރުލުމަށް ފުލުހުން ވަނީ ޚާއްސަ ޝުކުރެއް އަދާކޮށްފައެވެ.
