މުސާރައިގެ އޮނިގަނޑު އެއްހަމަކުރުމުގައި ހުރި މައްސަލަތައް ހައްލުކޮށް، އަންނަ މަހު މުސާރަތައް ބޮޑުކުރައްވަނީ
ސިވިލް ސަރވިސް އަދި ޝަރުޢީ ދާއިރާގެ މުސާރައިގެ އޮނިގަނޑު އެއްހަމަކުރުމުގެ ތެރެއިން ދިމާވި މައްސަލަތައް ނޭޝަނަލް ޕޭ ކޮމިޝަނުން ހައްލުކޮށްފައިވާކަމަށާއި، އަންނަ މަހުގެ މުސާރައާއެކު އޭގެ ހެޔޮ ބަދަލު މުވައްޒަފުންނަށް ލިބިގެންދާނެކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު އިޢުލާނުކުރައްވައިފިއެވެ.
ރައީސުލްޖުމްހޫރިއްޔާގެ އޮފީހުގައި ކުރިއަށްގެންދިޔަ ސިލްސިލާ ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން އެމަނިކުފާނު ވިދާޅުވީ، ދައުލަތުގެ މުވައްޒަފުންގެ އުޖޫރަ ބޮޑުކުރުމަކީ ސަރުކާރުގެ ވަޢުދެއް ނަމަވެސް، އޮނިގަނޑަށް ގެނެވުނު ބަދަލުތަކާ ގުޅިގެން ބައެއް ފަރާތްތަކުގެ މުސާރައަށް ކުރިއެރުން ނުލިބުމުގެ އިތުރުން، އަނެއްބައި މުވައްޒަފުންގެ މުސާރަ ކުޑަވެފައިވާކަން ފާހަގަކުރެއްވުނު ކަމަށެވެ. އެހެންކަމުން، އެކަން އިސްލާޙުކުރުމަށް ޕޭ ކޮމިޝަނަށް އެންގެވުމުން، މުޅި ޖުމްލަ މައްސަލައަށް މިހާރު ފަރުވާއެއް ހޯދިފައިވާކަމަށް ރައީސް ކަށަވަރުކޮށްދެއްވިއެވެ.
އައު އޮނިގަނޑަށް އަމަލުކުރަން ފެށުމުން އެންމެ ބޮޑަށް ދަތިތަކާ ކުރިމަތިލާންޖެހުނީ، އޮފީސްތަކުގެ އިންސާނީ ވަސީލަތްތަކާބެހޭ ގޮފިތަކުގައި މަސައްކަތްކުރާ މީހުންނާއި، ޤާނޫނީ ދާއިރާގެ އިތުރުން ލޯކަލް ކައުންސިލްތަކުގެ ބައެއް މުވައްޒަފުންނަށެވެ. ރައީސް ބަޔާންކުރެއްވި ގޮތުގައި، މި އުނިކަންތައްތައް ކުރިމަތިވީ އެތައް އަހަރެއް ވަންދެން ބޭނުންކުރަމުން އައި ތަފާތު އޮނިގަނޑުތަކެއް އެއް ނިޒާމެއްގެ ދަށަށް ގެނެސް ހާމަނައިޒްކުރުމުގެ ތެރޭގައެވެ.
މީގެ އިތުރުން، އަންނަ މަހުގެ މުސާރަ ޖަމާވާއިރު އާންމުކޮށް ހުރިހާ މައްސަލަތަކެއް ހައްލުވެފައި އޮތް ނަމަވެސް، ވަކިވަކި މުވައްޒަފަކަށް މިފަދަ ހާލަތެއް ދިމާވެފައިވާނަމަ، އެކަމަށްވެސް އަވަސް ފުރުޞަތެއްގައި ހައްލު ހޯދައިދެއްވާނެކަމުގެ ޔަޤީންކަން އެމަނިކުފާނު ދެއްވިއެވެ. ޚާއްޞަކޮށް ގިނަ ދުވަހު ޚިދުމަތްކޮށްފައިވާ މުވައްޒަފުންގެ މައްސަލަތައް ވަކިން ބަލައި، ޕޭ ކޮމިޝަން މެދުވެރިކޮށް އިންސާފުވެރި ގޮތެއް ހަމަޖައްސަވައިދެއްވާނެކަމަށްވެސް ރައީސް ވިދާޅުވިއެވެ.
