"އިންޑިއާއައުޓް" ކެމްޕެއިނުގައި އައިސިސް ގެ ދިދަ ބޭނުން ކުރާ ކަމަށް ބުނެ ނަޝީދުގެ ކަންބޮޑުވުން
އިންޑިއާ އާ ދެކޮޅަށް ހިންގަމުން އަންނަ "އިންޑިއާ އައުޓް" ކެމްޕެއިނުގައި އައިސިސްގެ ދިދަ ބޭނުން ކުރާ ކަމަށް ބުނެ ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެކަމާ ކަންބޮޑުވުން ފާޅުކުރައްވައިފިއެވެ.
ނަޝީދު މިއަދު ކުރެއްވި ޓްވީޓެއްގައި ވިދާޅުވީ އިންޑިއާ އާ ދެކޮޅަށް ހިންގާ ހަރަކާތުގައި، އައިސިސްގެ ކަޅު ދިދަ ބޭނުން ކުރުމަކީ ކަންބޮޑުވާ ކަމެއް ކަމަށެވެ.
އަދި އެ ދިދައިގައިވާ ލިޔުން އައިސިސްގެ ދިދައިގައިވާ ލިޔުމަށް ބަދަލު ކުރުމަށް ރާވަމުން އަންނަ ކަމުގައި ނަޝީދު ވިދާޅުވިއެވެ. އަދި މި ބާވަތުގެ ކަންކަމަކީ މި ފަދަ މުއާމަލާތުގައި އާންމު އުކުޅެއް ކަމުގައި މާހިރުން ދެކޭ ކަމުގައި ނަޝީދު ވިދާޅުވިއެވެ.
"ދިވެހިން ވިސްނަވާތި" ޓްވީޓު ނިންމާލަމުން ނަޝީދު ވިދާޅުވިއެވެ.
ރައީސް ނަޝީދު މި މޭރުމުން ވާހަކަފުޅު ދައްކާފައިވާއިރު، އެމަނިކުފާނުވަނީ އިންޑިއާ އާ ދެކޮޅަށް ކެމްޕެއިނެއް ފަށައިގެން އުޅެނީ ދީނީ ގޮތުން ހަރުކަށި ފިކުރުގެ މީހުން ކަމަށް މީގެ ކުރިން ތުހުމަތުކޮށްފައެވެ.
