ޓްވިންކަލް ބުނަނީ ދެން ފިލްމު ނުކުޅޭނެ ކަމަށް، ކީއްވެކަން އެނގޭތަ؟
އެކްޓިންގެ ދާއިރާގައި މިހާރު މަސައްކަތް ކުރާ ހިތް ނުވާ ސަބަބު ކުރީގެ އެކްޓްރެސް ޓްވިންކަލް ކަންނާ ހާމަކޮށްފިއެވެ.
އެކްޓަރު އަކްޝޭ ކުމާރުގެ އަނބިމީހާ ޓްވިންކަލް ފާއިތުވި އަހަރުތަކުގައި ފެނިގެން ގޮސްފައިވަނީ ފިލްމުތައް ޕްރޮޑިއުސް ކުރުމުގެ އިތުރުން ލިޔުންތެރިއެއްގެ ގޮތުގައެވެ.
90ގެ އަހަރުތަކުގައި ފިލްމުތަކުން ފެނިގެން ދިޔަ ޓްވިންކަލް ބުނި ގޮތުގައި އެހާރާއި މިހާރާއި ބަލާއިރު ފިލްމު އިންޑަސްޓްރީ ވެސް ވަރަށް ބޮޑަށް ތަފާތުވެފައިވާ ކަމަށެވެ. އަދި އޭރަށް ބަލާނަމަ އަންހެނުންނަށް މާ އެކަށޭނެ ރޯލުތައް ފިލްމުތަކުގައި މަދުކަން ޓްވިންކަލް ފާހަގަކުރިއެވެ.
ނަމަވެސް ޓްވިންކަލް ބުނީ އޭނާ ފިލްމު ކުޅުން ހުއްޓާލީ ފިލްމުތަކުގައި ރަނގަޅު ރޯލު ނެތިގެން ނޫން ކަމަށެވެ. ޓްވިންކަލް ބުނީ ސްޕޮޓް ލައިޓުގައި އޭނާ މާ ބޮޑަށް ބިރުގަންނަ ކަމަށާއި އެކްޓިން އާ ދުރަށް ދިޔަ މައިގަނޑު ސަބަބަކީ އެއީ ކަމަށެވެ.
ޓްވިންކަލް އަކީ ކުޅަދާނަ ލިޔުންތެރިއެއް ވެސް މެއެވެ.ޓައިމްސް އޮފް އިންޑިއާއަށް އޭނާ ކޮންމެ ހަފުތާއަކު ލިޔާ މިސިޒް.ފަނީބޯންސް ބްލޮގަކީ ގިނަ ބަޔަކަށް ވަރަށް މަގުބޫލު ބްލޮގެކެވެ. އެ ބްލޮގްގައި އޭނާ ލިޔެފައި ހުންނަ މަޖާ ވާހަކަތަކުން އޭނާގެ ސަކަ މިޒާޖާއި ކޮންމެ އެއްޗެއް ވެސް ދިމާލަށް ބުނެލަން ކެރޭ ކަން ފާހަގަކޮށްލެވެއެވެ.
