ކޮވިޑް-19ގެ އަލާމާތްތައް ފެނިގެން ހަނިމާދޫއިން މީހަކު އެކަހެރިކޮށްފި
ކުޅުދުއްފުއްޓާއި މާލެއާ ދެމެދު ދަތުރުކުރާ ސީކުއީން ބޯޓުގައި ދަތުރުކުރި ހަނިމާދޫ މީހެއްގެ ފަރާތުން ކޮވިޑް-19ގެ އަލާތްތައް ފެނުމުން އެމީހާ އެރަށުގައި އެކަހެރިކޮށް، ޓެސްޓުކުރުމުގެ މަސައްކަތް ފަށައިފި އެވެ.
ސީކުއީން ނަމަކަށް ކިޔާ ބޯޓެއްގައި އެމީހާ އެންމެ ފުރަތަމަ ދަތުރުކުރީ މާލެއިން ކުޅުދުއްފުއްޓަށެވެ. އެ ދަތުރުގައި އެ ބޯޓުގައި 337 މީހަކު ދަތުރުކަމަށް ރަސްމީ ހިސާބުތަކުން އެންގެ އެވެ.
ކުޅުދުއްފުށީ ރީޖަނަލް ހޮސްޕިޓަލުގެ މެނޭޖަރު އަހުމަދު ދާއޫދު މިކަން "ކުޅުދުއްފުށި އޮންލައިން" އަށް ކަށަވަރުކޮށްދެއްވަމުން ވިދާޅުވީ، އެ ބޯޓުން ދަތުރު ކުރި އެންމެން ފަރުދީ ޒިންމާ ނަގައި ހޯމް އައިސޮލޭޝަން ދިޔުމަށް އެދޭ ކަމަށެވެ.
ހަނިމާދޫ ކައުންސިލްގެ ނައިބު ރައީސް ހަސަން ސަލީމް "ކުޅުދުއްފުށި އޮންލައިން"އަށް ވިދާޅުވީ، އެ މީހާ އެކަހެރިކޮށްފައިވަނީ ޕަބުލިކް ހެލްތުން އެދިގެން ކައުންސިލްގެ ބެލުމުގެ ދަށުގައި ހުރި ތަނެއްގައި ކަމަށެވެ. އަދި އެކަމާ ގުޅިގެން އެ މީހާއާ ގުޅުން ހުރި ދެ ގެޔަކަށް މީހުން ވަދެ ނިކުމެ އުޅުންވެސް މަނާކޮށްފައިވާ ކަމަށެވެ. އެ ދެ ގެޔަކީ އެރަށު، ފިނިހަނދުވަރުގެ އާއި ނިއުމަތް ގެ އެވެ.
ހަނިމާދޫ ކައުންސިލުން ބުނީ އެ ދެ ގެޔަށް ވަދެ ނިކުމެ އުޅުން މަނާކޮށްފައިވަނީ ކޮވިޑް-19 އިން ރައްކާތެރިވުމުގެ ގޮތުން އަޅާ ފިޔަވަޅެއްގެ ގޮތުން ކަމަށެވެ.
