ފަތުރުވެރިކަން ކުރިއަރުވާނީ އިންޑިއާ އާއި ރާއްޖެ ގުޅިގެން: ސަފީރު
އިންޑިއާއާއި ރާއްޖެއަކީ ވަރަށް ގާތް ދެ ގައުމު ކަމަށާއި ރާއްޖޭގެ ފަތުރުވެރިކަން ކުރި އަރުވާނީ މި ދެ ގައުމު ގުޅިގެން ކަމުގައި އިންޑިއާ އިން ރާއްޖެ އަށް ކަނޑައަޅުއްވާފައި ހުންނަވާ ސަފީރު ސަންޖޭ ސުދީރު މިއަދު ވިދާޅުވެއްޖެއެވެ.
ސަފީރު މިހެން ވިދާޅުވީ ރާއްޖޭގައި އިންޑިއާ ފަތުރުވެރިކަމުގެ މާކެޓު ފުޅާކުރުމަށް ކުރަމުން އަންނަ މަސައްކަތުގެ ތެރެއިން އިންޑިއާގެ ޓްރެވަލް އެޖެންޓުންނާއެކު ބޭއްވި ވެބިނާގައި ވާހަކަ ދައްކަވަމުންނެވެ.
އެގޮތުން ސަންޖޭ ވިދާޅުވި ރާއްޖެއާއި އިންޑިއާ އަކީ ޒަމާނުއްސުރެ ވަރަށް ގާތް ގުޅުމެއް އޮންނަ ދެ ގައުމު ކަމަށެވެ.
އިންޑިއާގެ ހަތް ސަރަހައްދަކަށް ރާއްޖެއިން ސީދާ ދަތުރުތައް ކުރާ ކަން ފާހަގަކުރައްވާ ސަންޖޭ ވިދާޅުވީ މަސައްކަތް ކުރަމުން އަންނަނީ ކުރިއަށް އޮތް ތަނުގައި މި އަދަދު އިތުރު ކުރުމަށް ކަމަށެވެ.
މީގެ އިތުރުން، ސަފީރު ވަނީ އިންޑިއާއަކީ ރާއްޖެއަށް އެންމެ ގިނަ ފަތުރުވެރިން ޒިޔާރަަތް ކުރާ ގައުމަށް ހެދުމަށް ބޭނުންވާ ކަމަށް ވިދާޅުވެފައެވެ. އަދި ދެ ގައުމު ގުޅިގެން މަސައްކަތް ކޮށްފިނަމަ މިކަން ކާމިޔާބުވާނެ ކަމުގައި ވެސް އޭނާ ވިދާޅުވިއެވެ.
