ތާޕްސީ ވެސް ރާއްޖެއަށް ހިތްދީފައި އެނބުރި އިންޑިއާއަށް ހިނގައްޖެ
ބޮލީވުޑްގެ އެކްޓްރެސް ތާޕްސީ ޕައްނޫ ރާއްޖޭގައި ޗުއްޓީ ހޭދަ ކުރުމަށްފަހު އެނބުރި އިންޑިއާ އަށް ހިނގައްޖެއެވެ.
ތާޕްސީ ރާއްޖެ އައިސްފައި ވަނީ އޭނަގެ އާއިލާގެ ބައެއް މީހުންނާއި ލޯބިވެރިޔާ މޭތިއަސް ބޯއީއާ އެކުގައެވެ. އެނގިފައިވާ ގޮތުގައި އެމީހުން މަޑުކޮށްފައި ވަނީ ތާޖް އެކްޒިޓިކާ ރިސޯޓު އެންޑް ސްޕާ ގައެވެ.
އަނެއްކާ ވެސް މަސައްކަތުގެ މައިދާނަށް ނިކުތުމަށް ތައްޔާރުވެފައިވާ ތާޕްސީ ރާއްޖޭގައި ހަފްތާއެއް ވަންދެން މަޑުކޮށްފައިވެއެވެ. އަދި އެނބުރި މުމްބައި އަށް ގޮސްފައިވަނީ މިއަދު ހެނދުނުގެ ވަގުތެއްގައެވެ.
ރާއްޖޭގައި ހޭދަ ކުރި ވަގުތުތައް އަބަދު ވެސް ހަނދާންވާނެ ކަމަށް އިންޑިއާގެ ނޫހަކަށް މައުލޫމާތު ދެމުން ތާޕްސީ ބުނެފައިވާއިރު، ރާއްޖޭގެ ގުދުރަތީ ރީތި ކަމަށް ވެސް ތާޕްސީ ވަނީ ތައުރީފު ކޮށްފައެވެ. އޭނާ ބުނި ގޮތުގައި ރާއްޖޭގައި ހޭދަކުރި ޗުއްޓީގެ ސަބަބުން، މިއަހަރުގެ މިހާތަނަށް ކުރިމަތިވީ ހުރިހާ ކަންބޮޑުވުންތަކެއް ފިލައިގެން ގޮސްފިއެވެ.
ތާޕްސީ ކުޅުމަށް ހަމަޖެހިފައިވާ "ހަސީނާ ދިލްރުބާ" ގެ ޝޫޓިންގ މާދަމާ ފެށުމަށް ވަނީ ހަމަޖެހިފައެވެ. މިފިލްމުގައި އޭނާއާއެކު މަސައްކަތް ކުރާނީ ވިކްރާންތު މެސޭ އާއި ހަރްޝްވަރްދަން ރާނޭ އެވެ.
ރާއްޖެ އައުމުގެ ކުރިން ތާޕްސީ ވަނީ ޓަމިލް ފިލްމެއް ވެސް ކުޅެފައެވެ.
