ލޮކްޑައުންގައި މަގުމަތީގައި އުޅުނު 92 މީހަކު ފުލުހުންގެ ބެލުމުގެ ދަށަށް
ލޮކްޑައުންގައި މަގުމަތީގައި އުޅުނު 92 މީހަކު ފުލުހުންގެ ބެލުމުގެ ދަށަށް ގެންގޮސްފިއެވެ.
މިރޭ ބޭއްވި ނޫސްވެރިންގެ ބައްދަލުވުމެއްގައި ކޮވިޑް-19ގެ ތަރުޖަމާނު މަބްރޫކް އަޒީޒް ވިދާޅުވީ މާލެ ސަރަހައްދު ލޮކްޑައުންކޮށްފައި އޮއްވައި މިއަދުގެ މިހާތަނަށް މަގުތަކަށް ނިކުމެ އުޅުނު 92 މީހަކު ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ.
މިއަދު 92 މީހަކު ހައްޔަރުކުރިއިރު ފުލުހުން ރޭ 8:30 އިން ފެށިގެން ވަނީ މަގުތަކުގައި އުޅޭ މީހުންނާއި މެދު ފިޔަވަޅު އަޅަން ފަށާފައެވެ. އެގޮތުން އިއްޔެ ވެސް 70 އަށް ވުރެ ގިނަ މީހުން ވަނީ ހައްޔަރުކޮށްފައެވެ.
ކޮވިޑް-19 ފެތުރުން ހުއްޓުވުމަށްޓަކައި ހުރިހާ ރައްޔިތުންގެ އެއްބާރުލުމާއި އެހީތެރިކަމަށް ބޭނުންވާ ކަމަށް ފުލުހުން ވަނީ އެދިފައެވެ.
މީގެ ކުރިން ފުލުހުން ވަނީ މަގުމަތީ އުޅޭ މީހުން 14 ދުވަހު ކަރަންޓީނަށް ގެންދާނެ ކަމަށްވެސް ބުނެފައެވެ.
