ދިވެހި ޒުވާނެއް ދިރިއުޅުމުގައި ދިމާވާ އަޑިގުޑަންތަކާއި ކުރިމަތިލާން ދަސްކުރި ގޮތުގެ ވާހަކަ، އަސަރުން ފުރިފައި
ދުވަސް ފަށަނީ ވަރަށް ހިތްހަމަޖެހިގެންނެވެ. ދުވަހުގެ ކުރިއަށް އޮތް ވަގުތުތަކަކީ އުފާވެރި ވަގުތުތަކަކަށް ހެދުމުގެ އުއްމީދުގައެވެ. މާޒީގައި ވެފައިވާ އެއްވެސް ކަމެއް އަލުން ހަނދާން ނުކުރަން އަޒުމު ކަނޑައަޅަމުންނެވެ. އެހެންނަމަވެސް އިރުއަރައި އިރުއޮއްސުމާއި ހަމައަށް އަހަރެންގެ މި އަޒުމާއި، އުއްމީދުތައް ކޮންމެ ދުވަހަކު ފަނޑުވަމުންދެއެވެ. އާޚިރުގައި ކޮންމެ ދުވަހަކު ނިދަން އަރާ އޮންނަ ދުވަހަކީ ނުވިސްނާން ބޭނުންވާ ކޮންމެ ކަމަކާއި ވިސްނި އެކަމާ ހިތާމަކޮށް ރޮވެއެވެ.
ކައިރީގައި ކޮންމެސް މީހަކު ހުރުމަށް ކިތަންމެ ހިތް އެދުނު ކަމުގައިވީ ނަމަވެސް އެވަގުތު ކައިރީގައި އެއްވެސް މީހަކު ނުހުރެއެވެ. އަދި ކައިރީގައި ހުރި ނަމަވެސް ހިތުގެ އުދާސްތައް ބޭރުކުރަން ބޭނުމެއް ނުވެއެވެ. އަދި އެހާ ހިތްވަރެއް ވެސް ނުހުރެއެވެ. މިއީ ހާލަތެވެ. ވީއިރު މިކަންކަން އަހަރެން ރަނގަޅުކުރަމަށް މަސައްކަތް ކުރާ މިންވަރު ރަނގަޅަށް އެނގޭނެ ފަރާތެއް އެބަ ވެއެވެ،
އަހަރެން ދިރިއުޅުމުން ފިލާވަޅެއް ދަސްކޮށްފީމެވެ. ޙަޔާތުގެ އެއްވެސް ކަމެއްގައި އެއްވެސް މީހަކު ގާތުގައި ނެތި ތިމާ ކިތަންމެ އެކަނިވެރި ވީނަމަވެސް މާތްﷲ އަބަދުވެސް އެމީހަކާއި އެކު ވާނެކަމެވެ. ކަމަކާއި ހިތްދަތިވެ، މާޔޫސްވެ އަދި ރޯން ބޭނުންނަމަ އެކަލާނގެ ޙަޟްރަތުން ވާގިފުޅަށް އެދި ދުޢާ ދަންނަވާށެވެ. ރޯން ބޭނުންނަމަ މިސްކިތަށް ގޮސް 2 ރަކުޢަތުގެ ސުންނަތް ނަމާދެއްގެ ތެރެއިން ސަޖިދާގައި އޮވެ ރޯށެވެ. ހަމަގައިމުވެސް ހިތަށް ހަމަޖެހުން ލިބޭނެ ކަމެއްކަން ގައިމެވެ.
ދުވަހުގެ ފެށުމާއިއެކު ވަޒީފާއަށް ދަނީ ވަރަށް ދާ ހިތުންނެވެ. މަސައްކަތް ފަށަނީވެސް ހަމަ އެހާމެ ކުރާހިތުންނެވެ. އެހެންނަމަވެސް މަސައްކަތަށް ބޭނުންވާ ލެޕްޓޮޕް ނުވަތަ ފޯނު ހުޅުވާލުމުން އެފެންނަ މާޒީގެ ހަނދާންތަކެއްގެ ސަބަބުން މުޅި ދުވަސްވެސް އަދި މަސައްކަތް ކުރުމަށް އެއައި ޖޯޝްވެސް ގެއްލުނީއެވެ. މާޒިގެ ފުން ކަނޑުގެ ތެރެއަށް އަމިއްލަ ނަފްސު ޣަރަގުވި ފަދައެވެ. އެހެންމީހަކާއި ވާހަކަދައްކަން ބޭނުމެއް ނުވެއެވެ. އެކަން ހަނދާން ނެތޭތޯ ވަރަށް މަސައްކަތް ކުރެވޭނެއެވެ.
ފުރަތަމަ ކަމަކަށް އެ ފޮޓޯތައް ނޫނީ މާޒީއާ ގުޅުން ހުރި އެ ހަނދާންތައް ފޯނުގައި ނުވަތަ ލެޕްޓޮޕްގައި ބަހައްޓަންވީ ކީއްވެގެން ހެއްޔެވެ؟ ސަބަބަކީ ތޯއެވެ؟ ފޮހެލަން ހިތަށް ކުޅަދާނަ ނުވާތީއެވެ. މާޒީގެ ހަނދާން ތަކަކީ އެހާމެ އުފާވެރި އަދި އެހާމެ މަޖާ ހަނދާންތަކަކަށް ވާތީއެވެ. ވީއިރު އެ ހަނދާންތައް ފޮހެލެވޭނީ ހާދަހާ ހިތްވަރެއް ހުރެގެންނެވެ. މީހަކު ގަދަކަމުން އެފޮޓޯ ފޮހެލައިފިނަމަ އަދި އެއަށްވުރެ މާ ހިތުގައި ޖެހޭނެއެވެ. ދެން މިކަމުގައި އޮޮތީ ފަހެ ކޮން ހައްލެއް ހެއްޔެވެ؟
އަޅުގެ ހާލާއިމެދު ވިސްނާފައި އަމިއްލައަށްވެސް ރޮވެއެވެ. އަމިއްލަ ނަފްސާއިމެދު ހަމްދަރުދީ ވެވެއެވެ. އަމިއްލަ ނަފްސައް އާދޭސް ކުރެވެއެވެ. ދެރަނުވުމަށް އެދިއެވެ. އެހެންނަމަވެސް އެއީ ގަސްދުގައި ކުރާ ކަމެއް ނޫނެވެ. މީހެއް ގާތުގައި މިވާހަކަތައް އަހަރެން ހިއްސާ ނުކުރަނީ ވެސް އެމީހަކަށް އަހަރެންގެ މި ވޭނީ ރުއިމުގެ އަޑު އިއްވަން ބޭނުން ނުވާތީއެވެ. މަންމައާއި ބައްޕަ އަބަދުވެސް ބުނާނެއެވެ. ދިރިއުޅުމުގައި ކަންކަމާއި ކުރިމަތިލާން ދަސްކުރާށެވެ. ހިތްވަރު ގަދަ ކުރާށެވެ. މަންމައާއި ބައްޕަ ވެސް އަދި ނުހުންނާނެ ދުވަހެއް އަންނާނެއެވެ. އެހެންވީމާ އެދުވަހުން އެކަނިމާ އެކަނި ކަންކަމާއި ކުރިމަތިލާން ދަސްކުރާށެވެ.
މިއަދު އަހަރެންނަކީ އަަހަރެންގެ މުޅި ޙަޔާތުގައިވެސް ކިތަންމެ ހިތިކޮށް ކަމެއް ހިނގިކަމުގައިވީ ނަމަވެސް އެކަމުގެ ސަބަބުން ހިތަށް ކުރާ ނޭދެވޭ އަސަރުތައް ފޮރުވަން ދަސްކޮށްފައިވާ މީހަކީމެވެ. މީހަކަށް އުނދަގޫ ކުރާކަށް އަހަރެން ދެނެއް މަގޭ ޙާލަތެއް އެހެންމީހަކަށް ހާމައެއް ނުކުރާނަމެވެ. އަދި ދިރިއުޅުމުގައި ދިމާވާ ކޮންމެ ދަތި ކަމެއްގައިވެސް އަހަރެންގެ މައިންބަފައިންގެ ނަސޭހަތުގެ ބަސް އަހަރެން އަބަދުވެސް ހަނދާން ކުރާނަމެވެ. މިއަދު އަހަރެން ބަދަލުވެފައިވާ މީހެއް ގޮތުގައި ފެންނަ ކަމުގައި ވަނީނަމަ އެއީ ހަމަ އަހަރެންގެ މައިންބަފައިން ދިން ހެޔޮލަފާ ނަސޭހަތުގެ އަސްލެވެ.
އަހަރެން ދެން އެންމެ ހިތް ދަތިވާނެ ދުވަހަކީ އެ ލޯބިވާ މައިންބަފައިން އަހަރެންނާ ވަކިވެގެންދާނެ ދުވަހެވެ. އެދުވަހުން އަހަރެން ހަގީގަތުގައި އެކަނިވެރި ވީއެވެ. އަހަރެންގެ ދިރިއުޅުމުގެ އެންމެ ބޮޑު އަސްލަކީ އަހަރެންގެ މައިންބަފައިންނެވެ. އެދުވަހުން ރައްޓެހިން އަހަރެން ގާތަށް އައިސް ތައުޒިޔާގެ ވާހަކަތައް ދައްކާނެއެވެ. ހިތްވަރު ލައިދޭނެއެވެ. ކެތްތެރިވުމަށް ނަސޭހަތްތެރި ވާނެއެވެ. ނަމަވެސް އެއީ ވަގުތުކޮޅަަކަށް ލިބޭ އެއްބާރުލުމެކެވެ. ވަގުތާއިއެކު އެމީހުންވެސް ގެއްލޭނެއެވެ. އެހެންކަމުން އަހަރެންނާއި އެކުގައި އެދުވަހުން ވާނެ ހަމަ އެކަނި އެއްޗަކީ އަހަރެންގެ މައިންބަފައިންގެ ހެޔޮ ނަސޭހަތާއި އެމީހުން އަހަރެންނަށް ދީފައިވާ ތަރުބިއްޔަތެވެ.
ރަހުމަތްތެރިންނެވެ. މިއީ އަހަރެންގެ ދިރިއުޅުން ބަދަލުވާން މެދުވެރިވި ގޮތުގެ ވާހަކައެވެ. ދެގޮތެއް ނުވެ އަބަދުމެ އަބަދަށް ތިބޭނެ ހަމައެކަނި ބަޔަކީ ތިމާގެ މައިންބަފައިންނެވެ. އެމީހުނަށް އޯގާތެރިކޮށް ހިތާށެވެ. އަދި ދިރިއުޅުމުގައި ދިމާވާ ދަތިތަކުގައި ކަންކަމާއި ކުރިމަތިލާން ދަސްކުރާށެވެ. ނޫނީ ފަހުން ތިބާ އެކަނިވެރިވާ ދުވަހުން މާ ހިތްދަތިވާނެއެވެ. މިއީ އަހަރެންގެ ނަސޭހަތެވެ.
