ވަރަށް އަވަހަށް ކެންސަރުން ސަލާމަތްވާނަން: ސަންޖޭ ދަތު
ވަރަށް އަވަހަށް ކެންސަރު ބަލިން ސަލާމަތްވާނެ ކަމުގައި ފުއްޕާމޭގެ ކެންސަރަށް ފަރުވާ ހޯދަމުން އަންނަ ބޮލީވުޑު ތަރި ސަންޖޭދަތު ބުނެފިއެވެ.
ސަންޖޭއަށް ކެންސަރު ޖެހިފައި ހުރި ކަން އެނގިފައިވަނީ މިދިޔަ އޮގަސްޓު މަހުގެ ތެރޭގައި ނޭވާލާން އުނދަގޫވެގެން ހޮސްޕިޓަލުގައި އެޑްމިޓު ކުރުމުން ހެދި ޓެސްޓުތަކުންނެވެ.
ސަންޖޭދަތު ކެންސަރު ސަލާމަތްވާނެ ކަމަށް ބުނެފައިވަނީ އޭނާ ބޮލުގައިވާ ލަކުނު އާންމުންނަށް ފުރަތަމަ ފަހަރަށް ދައްކާލަމުންނެވެ. ސަންޖޭ އޭނާގެ ލަކުނު ޕަޕަރާޒީންނަށް ދައްކާލާފައިވާއިރު، ސަންޖޭ ވަނީ ނޫސްތަކުގައި އޭނާ ބަލި ވާހަކަ ނުޖެހުމަށް އެދިފައެވެ.
އެގޮތުން ސަންޖޭ ބުނީ މިއީ އެންމެ ފަހުން އޭނާގެ ހަށިގަނޑުގައި ލާފައިވާ ލަކުނު ކަމަށާއި، ކެންސަރާއި ހަނގުރާމަ ކޮށް، ކުރި ހޯދާނެ ކަމަށެވެ.
ސަންޖޭ ވަނީ ކެންސަރަށް ފަރުވާ ހޯދުމުގެ ކުރިން އޭނާ ސޮއި ކޮށްފައިވާ ބައެއް ފިލްމުތަކުގެ ޝޫޓިން ނިންމާފައެވެ. އެގޮތުން މިހާރު އޭނާ ކުރަމުން އަންނަނީ "ކޭޖީއެފް ޗެޕްޓަރ 2" ގެ އެންމެ ފަހުގެ މަންޒަރުތައް ނެގުމުގެ މަސައްކަތް ކަމުގައި ރިޕޯޓުތައް ބުނެއެވެ.
