ރައީސްގެ 10 ރިސޯޓު ހެދުމުގެ ތަަސަވުރަށް، ޗަމްޕާ އަފީފުގެ ތާއީދު
ރައީސް ޑރ. މުހައްމަދު މުއިއްޒު އިއުލާނު ކުރައްވާފައިވާ ދިވެހި އާއްމު ރައްޔިތުން ހިއްސާވާ 10 ރިސޯޓު ތަރައްގީ ކުރުމުގެ މަޝްރޫއަށް، މަޝްހޫރު ވިޔަފާރިވެރިޔާ ހުސެއިން އަފީފު ތާއީދު ކުރާކަން ފާޅުކުރައްވައިފިއެވެ.
ގައުމީ ޓޫރިޒަމް ދުވަސް ފާހަގަ ކުރަން ބާސެލާސް ނަސްނަދުރަ ހޮޓެލްގައި ވާހަކަ ދައްކަވަމުން ރާއްޖޭގެ ޓޫރިޒަމްގެ އެއް ބާނީ ކަމަށްވާ އަފީފު ވިދާޅުވީ މިއީ ޓޫރިޒަމަށް އަންނާނެ ވަރަށް ބޮޑު ބަދަލެއް ކަމަށާއި، މި މަޝްރޫޢު ކާމިޔާބުވާނެކަމަށް އުންމީދުކުރައްވައެވެ. އަދި މިކަމުގައި ބައިވެރިވެވަޑައިގަންނަވަން ބޭނުންފުޅުވާކަން ވެސް އޭނާ ހާމަކުރެއްވިއެވެ.
އަފީފު ވިދާޅުވީ ރާއްޖޭގެ ފަތުރުވެރިކަން މިހާ ހިސާބަށް އައީ ސަރުކާރާއި އަމިއްލަ ފަރާތްތަކާ ގުޅިގެން ކުރި މަސައްކަތުން ކަމަށާއި، ކުރިއަށް އޮތް ތަނުގައި ވެސް ދާއިރާ ކުރިއަރާނީ އެގޮތަށް މަސައްކަތްކޮށްގެން ކަމަށް އޭނާ ފާހަގަކުރެއްވިއެވެ.
ރައީސް ޑރ. މުއިއްޒު ވަނީ ކުރިއަށް އޮތް 3 އަހަރު ތެރޭގައި ސަރުކާރު ކުންފުންޏަކުން 10 ރިސޯޓު ތަރައްޤީކޮށް، އޭގެ ފައިދާއިން ކޮންމެ ދިވެއްސަކަށް އަހަރަކު 400 ޑޮލަރު ދިނުމަށް ނިންމަވާފައެވެ. އަދި މި ރިސޯޓުތަކުގެ ހިއްސާދާރުންނަކީ ދިވެހިން ކަމަށް ގާނޫނަކުން ކަނޑައަޅާނެއެވެ.
