ސުޝާންތުގެ މަރުގެ މައްސަލައިގައި އިތުރު މީހަކު ހައްޔަރުކޮށްފި
މިއަހަރުގެ ޖޫން މަހު އަމިއްލައަށް މަރުވި ބޮލީވުޑްގެ އެކްޓަރު ސުޝާންތު ސިންގް ރާޖްޕޫތުގެ މަރުގެ މައްސަލައާއެކު ފެންމަތިވި މަސްތުވާތަކެތީގެ މައްސަލައާ ގުޅިގެން އިތުރު މީހަކު ހައްޔަރުކޮށްފިއެވެ.
މިއީ މި މައްސަލައިގައި ހައްޔަރު ކުރި 22 ވަނަ މީހާއެވެ.
މީގެ ކުރިން މި މައްސަލައިގައި ސުޝާންތުގެ ލޯބިވެރިޔާ ރިއާ ޗަކްރޮބަތީގެ އިތުރުން، ރިއާގެ ކޮއްކޮ ޝޮވިކް ޗަކްރޕބަތީ އާއި ސުޝާންތުގެ ހައުސް ކީޕިން މެނޭޖަރު ސެމިއުލް މިރަންޑާ ވެސް ވަނީ ހައްޔަރު ކޮށްފައެވެ. މީގެ ތެރެއިން ރިއާ ޗަކްރަބޮތީ ވަނީ އެއް މަސް ދުވަހު ޖަލުގައި ހޭދަކުރުމަށް ފަހު ކަފާލާތުގެ ދަށުން މިނިވަން ވެފައެވެ.
އިންޑިއާގެ ނާކޮޓިކްސް ކޮންޓްރޯލް ބިއުރޯ (އެންސީބީ) އިން މި މައްސަލައިގައި އެންމެ ފަހުން ހައްޔަރުކޮށްފައިވަނީ ޖޭ މަދޯކް ނަމަކަށް ކިޔުނު މީހެކެވެ. މަދޯކްގެ މައްޗަށް ކުރެވިފައި ވަނީ ތަކުރާރުކޮށް މަސްތުވާތަކެތި ގެންގުޅުމާއި އެތަކެތި ބޭނުން ކުރުމުގެ މައްސަލަކަމަށް ރިޕޯޓުތައް ބުނެއެވެ.
އަދި މަދޯކް އަކީ މި މައްސަލައިގައި ކުރިން ހައްޔަރުކުރެވިފައި ހުރި މީހެއް ކަމަށްވާ ކްޝިތީޖް ޕްރަޝާދު އާ ގާތް ގުޅުމަށް އޮންނަ މީހެއް ކަމަށް ވެސް ރިޕޯޓުތައް ބުނެއެވެ.
