ރައުނާގެ އާއިލާގެ އާދޭސް އެޗްޕީއޭ އަށް: އަބުރު ދަނީ ވެއްޔާ މޮޑެވެމުން، ކޭސް ނަމްބަރު ނަމަވެސް ބުނެލަދީ!
ނޯޓް: މިލިޔުމުގައި ރައުނާގެ މައުލޫމާތާއި ފޮޓޯ ހިމަނާފައި ވާނީ އޭނާ އާއި އާއިލާ އިން ހުއްދައާއި އެކު.
ކޮވިޑް-19 އަށް ފައްސިވި މީހުންގެ ތެރެއިން އެކަކު ހެލްތު ޕްރޮޓެކްޝަން އެޖެންސީ (އެޗްޕީއޭ) އަށް އެއްބާރުލުން ނުދޭ ކަމަށް އިއްޔެ އެއިދާރާއިން ބުނުމާއެކު އެއީ ރައުނާ ނަމަކަށް ކިޔާ ޒުވާނެއްގެ ވާހަކަ ކަމަށް ބުނެ އޭނާގެ އަބުރު ކަތިލުމުގެ ގިނަ މަސައްކަތްތަކެއް ބަޔަކު ގެންދަނީ މީސް މީޑިއާގައި ކޮށްފައެވެ.
ރައުނާގެ ބޭބެ މުހައްމަދު ނާޖިހް ފޭސްބުކްގައި ކުރި ޕޯސްޓެއްގައި ވަނީ ބައެއް މީހުން ރައުނާގެ އާ ބެހޭ ގޮތުން މީސް މީޑިއާގައި އެ މީހަކު ހިތަށް އެރި އެއްޗެއް ލިޔަމުން ފެނުނު އެއްޗެއް ޝެއާ ކުރަމުންދާއިރު އެކަމުގެ ތެދު ދޮގު ބަލާލީ ކިތައް މީހުންތޯ ސުވާލު އުފައްދާފައެވެ.
އޭނާ ބުނީ ރައުނާ އަށާއި އެ އާއިލާއަށް މިފަދަ ހިތްދަތިކަމެއް ލިބިފައިވާ ވަގުތު ހަގީގަތެއް ނެތް ވާހަކަތައް ނުފެތުރުމަށް އާދޭހާއެކު ހުރިހާ އެންމެންގެ ފަރާތުން އެދޭ ކަމަށެވެ.
"އަޅުގަނޑު އެޗްޕީއޭގެ ގެ ފަރާތުން އެދެނީ ކުއްޖެއްގެ އަބުރު އެގޮތައް ވެއްޔާއި މޮޑޭއިރު އެންމެ ކުޑަމިނުން ނަމަވެސް އެ އެއްބާރުލުން ނުދީ އުޅޭ ފަރާތަކީ އެކުއްޖާ ނަމަ އެކުއްޖާތޯ ނުވަތަ ނޫންތޯ ނަމަވެސް ބުނެލަ ދިނުން. ކޮއްކޮ އަކީ ކޮން ކްލަސްޓާރ އެއްގެ ނޫނީ ކިތައްވަނަ ކޭސްތޯވެސް ހާމަ ކޮށްދިނުން." ނާޖިހް ބުންޏެވެ.
ނާޖިހް ބުނީ ރައުނާއާ ސީދާ ދިމާވި 15 މީހެއްގެ ޓެސްޓް ހަދާ ނަތީޖާ ނައްސިކަމަށް އަންގާފައިވާ ކަމަށެވެ.
ރައުނާ "ވަގުތު" ނޫހަށް މައުލޫމާތު ދެމުން ބުނެފައިވާ ގޮތުގައި ކޮވިޑް-19 އަށް ފައްސި ވެފައިވާ އެއާޕޯޓްގެ ރެޕާއި އޭނާ އާއި ގުޅުވައިގެން ދައްކަމުން ގެންދަނީ އެއްވެސް ހަޤީޤަތެއް ނެތް ވާހަކައެއް ކަމަށާއި، އެއާޕޯޓްގެ ރެޕާއި އެއްވެސް ގުޅުމެއް ނޯންނާނެ ކަމަށެވެ.
