ދަތިކަމަކީ ﷲއަށް ކުއްތަންވާން ލިބޭ ފުރުސަތެއްކަމަށް ދެކި ، މި ރަމަޟާން މަހުގައި ގެތައް އީމާންކަމުގެ ނޫރުން އަލިވިލާތޯ މަސައްކަތް ކުރަން ޖެހޭނެ: ޑރ.ޝަހީމް
ދަތިކަމަކީ ﷲ ތަޢާލާއަށް އިތުރަށް ކުއްތަން ވާން ލިބޭ ފުރުސަތެއް ކަމަށް ދެކި މި ރަމަޟާންމަހުގައި ގެތައް އީމާނުގެ ނޫރުން އަލިކޮށްލުމަށް ޑރ.މުޙައްމަދު ޝަހީމް ޢަލީ ސަޢީދު ނަސޭހަތްތެރިވެއްޖެއެއެވެ.
''މި ޙާލަތުގައި ރަމަޟާން މަހުގެ ބަރަކާތްތެރިކަން ޙާޞިލް ކުރާނީ ކިހިނެއް؟'' މި މައުޟޫއުގައި މި ނޫހުން ގެނެސްދިން ދަރުސެއްގައި ވާހަކަފުޅު ދައްކަވަމުން ޝަހީމް ވިދާޅުވީ މި ޙާލަތަކީ އިސްލާމީ އުއްމަތަށާއި މުޅި ދުނިޔެއަށް ވެސް ހިތާމަވެރި އަދި ގޮންޖެހުން ބޮޑު ވަގުތެއް ކަމަށާއި އެހެން ނަމަވެސް ކުރިމަތިވަމުން އަންނަ ރަމަޟާންމަހުގެ މަތިވެރިކަން ދަނެ ، ސާފު ހެޔޮ ހިތަކައިގެން އެމަހާއި ބައްދަލުކޮށް އީމާންކަމުގެ ނޫރުން ގެތައް އަލިކޮށްލަން ޖެހޭ ކަމަށެވެ.
''އަޅުގަނޑުމެން ރަމަޟާންމަހާއި މި ބައްދަލު ކުރަނީ މީގެ ކުރިން ރަމަޟާން މަހެއްގައި ދިމާވެފައިނުވާ ވަރުގެ ގޮންޖެހުންތަކާއެކުގައި ، އަޅުގަނޑުމެންނަށް މިފަހަރު ތަރާވީޙް ނަމާދުތަކެއް މިސްކިތްތަކުގައި ނުކުރެވޭ، ކެއިންބުއިމުގެ ކަންތައް އަޅުގަނޑުމެންނަށް ދަތިވެފައި ، އެހެން ނަމަވެސް މިއިން ކޮންމެ ކަމަކީ ﷲ ރައްބުލްޢާލަމީންއަށް އިތުރަށް ކުއްތަންވާން ލިބޭ ފުރުސަތެއް''ޑރ.ޝަހީމް ވިދާޅުވިއެވެ.
ޑރ.ޝަހީމް ވިދާޅުވީ ކޮވިޑް19 އާއި ގުޅިގެން މިސްކިތްތަކުގެ ޖަމާޢަތްތައް ހުއްޓާލާފައި ވީނަމަވެސް އާއިލާތައް އެކުގައި ގޭގައި ނަމާދުކޮށް ، އީމާނުގެ ނޫރުން ގެތައް އަލިކޮށްލަން ވާނެ ކަމަށެވެ. އަދި ރާއްޖޭގައި ރީއްޗަށް ޤުރުއާން ކިޔަވާ އެތައް ކުދިންނެއް އެބަތިބި ކަމަށާއި އެކުދިންނަށް ގޭގެ ޖަމާޢަތްތަކުގައި އިމާމުވެ ފަރުޟު ނަމާދުތަކާއި ތަރާވީޙް ނަމާދު ކުރެވިދާނެ ކަމަށެވެ.
''މިފަހަރު އަޅުގަނޑުމެންނަށް މިސްކިތްތަކުގައި ތަރާވީޙް ނަމާދެއް ނުކުރެވޭ ، އެހެން ނަމަވެސް އަހަރެމެން މަސައްކަތް ކުރަންޖެހޭނެ އަޅުގަނޑުމެންގެ ގެތައް ބާއްޖަވެރި ކުރެވޭތޯ، އަޅުގަނޑުމެންގެ ގެތަކަށް އީމާންކަމުގެ ނޫރުން އަލިވިލާތޯ މަސައްކަތް ކުރަންޖެހޭނެ، ރީތިކޮށް ކިޔަވާ ކުދިން އަޅުގަނޑުމެންގެ އާއިލާތަކުގައި އެބަތިބި ، އެކުދިންނަށް އެކުދިންގެ މަންމައާއި ބައްޕައާއި އާއިލާ އެންމެން ގޮވައިގެން ފަރުޟު ނަމާދާއި ތަރާވީޙް ނަމާދު ކުރަންވީ ، ގޭގެ ސިޓިންގ ރޫމްގައި ، ކިތަންމެ ކުޑަ ޖަމާޢަތެއް ނަމަވެސް ﷲ ރައްބުލް ޢާލަމީންގެ ތަނަވަސް ރަޙުމަތް ، އެގެއަކަށް އޮއްސަވާނެ'' ،''ޑރ.ޝަހީމް ވިދާޅުވިއެވެ.
މި ދަރުސްގައި ޑރ.ޝަހީމް ވަނީ ރަމަޟާންމަހުގެ މާތްކަމަށް އަލި އަޅުވާލައްވާ ދަންވަރުގެ ވަގުތުގެ މާތްކަން ވެސް ބަޔާން ކޮށްދެއްވާފައެވެ. އެގޮތުން ދަންވަރުގެ ވަގުތުގައި ނިދިން ތެދުވެ އަޅުކަމުގައި ވަގުތުތައް ހޭދަ ކުރާ މީހާއަށް ހުރި ހެޔޮކަން ބަޔާން ކުރަމުންދިމާވެފައިވާ ކޮވިޑް19 އިން ސަލާމަތް ކޮށްދެއްވާތޯ އެވަގުތުގައި ގިނަގިނައިން ދުޢާ ކުރުމަށް އެމަނިކުފާނު ގޮވާލެއްވިއެވެ.
