ހާލުގައި ޖެހިފައިވާ މީހުންނަށް ރޯދަމަހު އެހީވާން ކޮކާކޯލާ، މަޓާޓޯ އަދި އެންބީއޭއެމުން ނިންމައިފި
ކޮވިޑް-19 ގެ ސަބަބުން ހާލުގައި ޖެހިގެން ދައުލަތުން ބަލަހައްޓަމުން އަންނަ ދިވެހިންނާއި ބިދޭސީންނަށް ކުރިއަށް އޮތް ރޯދަމަހުގައި ކާބޯތަކެތި ފޯރުކޮށްދޭން ދެ ޖަމްއިއްޔާއަކުން ނިންމައިފި އެވެ.
އެގޮތުން އެހީވާން ނިންމި ދެ ޖަމިއްޔާ އަކީ މޯލްޑިވްސް އެސޯސީއޭޝަން އޮފް ޓްރެވަލް އެޖެންޓްސް އެންޑް ޓުއާ އޮޕްރޭޓާސް(މަޓާޓޯ) އާއި ނޭޝަނަލް ބޯޓިން އެސޯސިއޭޝަން އޮފް މޯލްޑިވްސް (އެންބީއޭއެމް) އެވެ. އެ ދެ ޖަމާއަތް އެކަން ކުރާނީ ކޮކާކޯލާއާ ގުޅިގެންނެވެ.
މަޓާޓޯ އާއި އެންބީއޭއެމުން ގުޅިގެން ނެރުނު ނޫސް ބަޔާނެއްގައި ބުނީ، ރަމަޟާން މަހާ ކުރިމަތިލާއިރު އެތައް ބަޔަކު ހިޔާވެހިކަމެއް ނެތި ކައިބޮއެ އުޅޭނެ ގޮތެއް ނެތިފައި އެބަތިބި ކަމަށާއި ދިވެހި މުޖުތަމައުގެ އެހީތެރިކަމާއި އެއްބާރުލުމާ ނުލައި އޭގެ ތެރެއިން ގިނަ ބަޔަކަށް ރަނގަޅު ކާނާ ނުލިބި، ބަލިވެ އަދި އުނދަގޫ ހިސާބަކަށް ކަންކަން ހިނގައިދާނެ ކަމުގެ ބިރު އެބައޮތް ކަމަށެވެ.
އެހެންކަމުން ކޮކާ ކޯލާ އާއި ގުޅިގެން ކުރިއަށް އޮތް 30 ދުވަހަށް 500 މީހުންނަށް ބޭނުންވާ ކާބޯތަކެތި ފޯރުކޮށްދިނުމަށް އެ ދެ ޖަމިއްޔާ އިން ނިންމާފައިިވާ ކަމަށް ބަޔާނުގައިވެ އެވެ.
އެ ބަޔާނުގައި ބުނެފައި ވަނީ ސަލްސާ ކޭޓަރިންގެ އެހީތެރިކަމާއެކު މާލޭގައި ކާބޯތަކެތި ތައްޔާރުކުރުމަށް ބަދިގެއެއް ލިބިފައިވާ ކަމަށާއި އަދި ހުޅުމާލޭގައި ކާބޯތަކެތި ތައްޔާރުކުރުމަށް ބަދިގެއެއް ހިޔާރުކުރުމުގެ މަސައްކަތް ކުރިއަށްދާ ކަމަށެވެ.
އެގޮތުން ތައްޔާރުކުރާ ކާބޯތަކެތި ވަގުތީ ހިޔާތަކުގައި އުޅޭ މީހުންނަށް ބެހުމަށް ހަމަޖެހިފައިވަނީ ކަމާބެހޭ އިދާރާތަކުގެ އެއްބާރުލުމާއެކުގައި ކަމަށާއި އަދި އެކަމުގައި ބައިވެރިވެ އެއްބާރުލުން ދޭން ބޭނުންވާ ފަރާތްތަކަށް އެ ފުރުސަތު ހުޅުވާލެވިފައިވާ ކަމަށް ބުނެފައިވެއެވެ.
ހާލުގައި ޖެހިފައިވާ މީހުންނަށް އެހީވުމަށް މަޓާޓޯ އާއި އެންބީއޭއެމުން ނިންމިއިރު ކޮވިޑް 19އާ ގުޅިގެން ރާއްޖެއަށް ދިމާވެފައިވާ ގޮންޖެހުންތަކުން އަރައިގަތުމަށް އެ ދެ ޖަމިއްޔާއިން ދަނީ ކަމާބެހޭ އިދާރާތަކާ ގުޅިގެން އެކުގައި މަސައްކަތް ކުރަމުންނެވެ.
