އިނގިރޭސިވިލާތުން އައުމުން ކަރަންޓީން ކުރުމަށްފަހު ދޫކޮށްލި މީހަކު ފައްސި ވެއްޖެ
އިނގިރޭސިވިލާތުން އައުމުން ކަރަންޓީން ކުރުމަށްފަހު ދޫކޮށްލި މީހަކު ފައްސި ވެއްޖެއެވެ.
މިރޭ ބޭއްވި ނޫސްވެރިންގެ ބައްދަލުވުމުގައި އެޗްޕީއޭގެ މެޑިކަލް އޮފިސަރު ޑރ. ނަޒްލާ ރަފީގް ވިދާޅުވީ ރާއްޖެއިން ބޭރުން އައުމުން ކަރަންޓީނު ކުރި މީހަކު ކަރަންޓީނު މުއްދަތު ހަމަވުމުން ދޫކޮށްލާފައިވަނިކޮށް، އޭނާ ބައްޔަށް ފައްސި ވެފައިވާކަމަށެވެ.
ނަޒްލާ ވިދާޅުވީ އެ މީހާ ރާއްޖެ އައީ މިދިޔަ މަހުގެ 23 ވަނަ ދުވަހު އޭނާ ކަރަންޓީނަށް ގެންދިޔުމަށްފަހު މިދިޔަ މަހުގެ 28 ވަނަ ދުވަހު ކުރި ޓެސްޓުން ބައްޔަށް ނައްސި ވެފައިވާ ކަމަށެވެ. އަދި ކަރަންޓީނުން ދޫކޮށްލުމުގެ ކުރިން އޭނާގެ ޓެސްޓު ހެދި ކަމަށާއި އެގޮތުން މިމަހުގެ ހަ ވަނަ ދުވަހު ހެދި ޓެސްޓުންވެސް ނައްސި ވެފައިވާކަމަށް ޑޮކްޓަރު ވިދާޅުވިއެވެ.
ދެ ޓެސްޓުން ވެސް ނައްސިވުމުން އޭނާ ދޫކޮށްލީ މިމަހުގެ ހަތްވަނަ ދުވަހު ކަމަށާއި ނަމަވެސް ބަލި ޖެހުނު މީހަކާ ކޮންޓެކްޓު ވުމުން ހައި ރިސްކު މީހަކަށް ވާތީ، އޭނާ އަނެއްކާވެސް އައިސޮލޭޓު ކުރި ކަމަށް ޑރ. ނަޒްލާ ވިދާޅުވިއެވެ. އަދި ބައްޔަށް ފައްސިވީ އައިސޮލޭޝަނަށް ގެންގޮސް ހެދި ޓެސްޓުން ކަމަށް ނަޒްލާ ވިދާޅުވިއެވެ.
ޑރ. ނަޒްލާ ވިދާޅުވީ އޭނާ ފައްސިވީ ބޭރުން އައިސް ކަރަންޓީނުގައި ހުއްޓާ ކަމަށް ނުބެލެވޭ ކަމަށާއި އޭނާ އަށް ބަލިޖެހުނީ ރާއްޖެއިން ފައްސިވި މީހަކާ ކޮންޓެކްޓު ވުމުން ކަމަށް ބެލެވޭ ކަމަށެވެ. އަދި ބޭރުން އައި މީހާގެ ފަރާތުން އެހެން މީހަކަށް ކުރިން ބަލި އަރާފައިވާކަމަށް ނުބެލެވޭ ކަމަށް ޑރ. ވިދާޅުވިއެވެ.
Ads by STO
