ދުވާފަރު ދާއިރާ މެންބަރުގެ މަހު މުސާރައިގެ 55 އިންސައްތަ ރައްޔިތުންނަށް
ރައްޔިތުންގެ މަޖިލީހުގެ ދުވާފަރު ދާއިރާގެ މެންބަރު އިސްމާއިލް އަހުމަދު، އޭނާގެ މުސާރައިން ދުވާފަރު ރައްޔިތުންނަށް ޙާއްސަކުރައްވާފައިވާ 33 އިންސައްތަ، 55 އިންސައްތަ އަށް ބޮޑުކުރައްވަން ނިންމަވައިފިއެވެ. މިގޮތަށް މި އިންސައްތަ ބޮޑުކުރަން ނިންމީ ރަމަޟާން މަހު ރަމަޟާން މަސް ކަމުގައި ވާތީ ދުވާފަރު ރައްޔިތުންނަށް އިތުރު އެހީތެރިކަން ފޯރުކޮށްދިނުމުގެ ގޮތުން ކަމުގައި މައުލޫމާތު ލިބެއެވެ.
އަދި ކޮވިޑް19 އާއި ގުޅިގެން ރައްޔިތުންނަށް ކުރިމަތި ވެފައިވާ ދަތިތަކާއި ގޮންޖެހުން ތަކުން އަރައިގަތުމަށް އެހީ ވުމަށްޓަކައިވެސް މެއެވެ.
އިސްމާއިލް އަހުމަދު، އޭނާގެ މުސާރައިން ދާއިރާ ރައްޔިތުންނަށް 33 އިންސައްތަ ހާއްސަ ކުރެއްވި މަޖިލިސް ހުވާކުރެއްވުމަށް ފަހުގައެވެ. މި އިންސައްތައިގެ ދަށުން އޭނާ ވަނީ ބޭސް ފަރުވާއަށާއި އެކި ޒަރޫރީ ބޭނުންތަކަށް މާލެއަށް ދަތުރުކުރާ ދުވާފަރު ރައްޔިތުންނަށް އެހީތެރިވެލެއްވުމުގެ ގޮތުން އަމިއްލަ ހަރަދުގައި 2 ކޮޓަރީގެ އެޕާޓްމަންޓެއް މާލެއިން ކުއްޔަށް ހިފާފައެވެ.
މީގެ އިތުރު ވެސް ބޭސްފަރުވާއަށް ދަތުރު ކުރުމުގައި އެންސްޕާއިން ފުރިހަމަ ކުރަންޖެހޭ ހުރިހާ ކަމެއް ފުރިހަމަ ކުރުމަށް އެހީތެރިވުމަށްޓަކައި ދުވާފަރުގައި އޮފީހެއް ގާއިމްކޮށް އެ އޮފީހަށް މުވައްޒަފަކު ވެސް ވަނީ ހަމަޖައްސަވާފައެވެ.
ކޮންމެ ރޯދަ މަހަކާއި ގުޅިގެން ކައުންސިލް ތަކުންނާއި މަޖިލިސް މެންބަރުން ދާއިރާ ރައްޔިތުންނަށް އެހީ ވަމުން އަންނައިރު މިއަހަރުގެ ރޯދަ މަހާއި ގުޅިގެން ދަނގެތި މެންބަރު މުހައްމަދު ނާޒިމް ވެސް ވަނީ ރޯދަ ހަދިޔާ އެއްގެ ގޮތުން ދާއިރާ ގެ ކޮންމެ ގެއަކަށް ބިސް ކޭހަކާއި އަލުވި ބަސްތާއެއް ހަދިޔާކޮށްފައެވެ.
