މިދުވަސް ވަރު މާބަނޑުވުން ރަނގަޅެއް ނޫން: ޑރ އަސީލް
މިދުވަސްވަރު މާބަނޑުވުމަކީ އެންމެ ރަނގަޅުކަމެއް ނޫންކަމަށް ގައިނަކޮލޮޖިސްޓް، ޑރ. އަސީލް ޖަލީލް ވިދާޅުވެއްޖެ އެވެ.
ކޮވިޑްއާ ގުޅޭ ގޮތުން އެންމެ ފަހުގެ މައުލޫމާތު ދިނުމަށް ރޭ ބޭއްވި ނޫސްވެރިންގެ ބައްދަލުވުމުގައި ޑރ. އަސީލް ވިދާޅުވީ، ގޮތް ނޭނގޭ ބައްޔެއްގެ ތެރޭގައި އުޅޭއިރު، އާއިލާ ރޭވުމަކީ، އަދި ނުރޭވި މާބަނޑުވުމަކީ އެންމެ އެދެވިގެންވާ ގޮތް ކަމުގައި ނުވާނެ ކަމަށެވެ.
"ދެން އޭގެ އިތުރުން އަޅުގަނޑު ފާހަގަކޮށްލަން ބޭނުންވާ އަނެއް ކަމަކީ އަޅުގަނޑުމެންގެ ކްލިނިކްތައް ރަންކުރަމުން ގެންދާއިރު އާއިލާ ރޭވުމުގެ މުހިންމުކަންވެސް ވަރަށް މުހިންމޭ. އަޅުގަނޑުމެންނަށް ގޮތްނޭނގޭ ބައްޔެއްގެ ތެރޭގައި އުޅޭއިރު، އާއިލާ ރޭވުމަކީ، އަދި ނުރޭވި މާބަނޑު ވުމަކީ، އެންމެ އެދެވިގެންވާ ކަމަކަށް ނުވާނެ ކަންވެސް ފާހަގަކޮށްލަން ބޭނުންވޭ،" ޑރ. އަސީް ވިދާޅުވި އެވެ.
ޑރ. އަސީލް އިތުރަށް ވިދާޅުވީ ޖުލައި މަހަށް އައިޖީއެމްއެޗްއަށް ދައްކަން އަންނަ މީހުންނާއި ވިހާ މީހުންގެ ޑިއުޑޭޓް މިހާރު ތަރުތީބުން ލިޔެފައިވާ ކަމަށެވެ. އަދި އެ ކަރުދާސްތަކުގައި އެ މާބަނޑުމީހުން ތިބޭ ގެއާއި ފްލެޓްތަކުގެ ނަންބަރަށް ދަންދަން ހިމަނާފައިވާކަމަށް އޭނާ ވިދާޅުވި އެވެ. އަދި އޭގައި ވާ ތަރުތީބުން ޕޭޝަންޓުންނަށް ގުޅަމުން ގެންދާނެކަަމަށް އޭނާ ވިދާޅުވި އެވެ.
"ކަންތައްތައް އެންމެ ރަަނގަޅަށް ގެންދިއުމަށްޓަކައި މިހާރު ކްލިނިކްތައް ވާނީ އޮންލައިން ކްލިނިކްތަކަކަށް ބަދަލުކޮށްފައި. ވޭތުވެދިޔަ ހަފްތާގައި އަޅުގަނޑުމެންވާނީ ކޮންމެ ދުވަހަކަުވެސް 9-12 އާ ދެމެދު ޕޭޝަންޓުންނަށް ގުޅާ ޕޭޝަންޓުންގެ ލަފާ ހޯދާ އަދި އެ ބޭފުޅުންގެ ލިޔެކިޔުން ހުންނާނީ ބަހައްޓާފައި އޭރުން އެ ޕޭޝަނުންޓުން އިމަޖެންސީ ހާލަތެއްގައިވެސް އަޔަސް އަޅުގަނޑުމެންނަށް އެ މައުލޫމާތުތައް ލިބެން ހުންނާނެ ގޮތަށް ހުންނާނީ ރައްކާކުރެވިފައި" އަސީލް ވިދާޅުވި އެވެ.
ކޮންމެހެން ސްކޭންކުރަން ޖެހޭ ހާލަތެއްގައި ނޫނީ ސްކޭން ނުކުރަން އިލްތިމާސްކޮށްފައިވާ ކަމަށާއި އަދި ސްކޭންކުރުމަށްޓަކައި އަލްޓްރާ ސައުންޑް އަދި ރޭޑިއޮލޮޖީ ޑީޕާޓްމަންޓާ ގުޅިގެން އިންތިޒާމްތައް ހަމަޖައްސަމުންގެންދާ ކަމަށް އޭނާ ވިދާޅުވި އެވެ.
އަސީލް ވިދާޅުވީ ކުރިއަށް އޮތް ހަފްތާއިން ފެށިގެން އޮންލައިން ކޮންސަލްޓޭޝަންތައް ކުރިއަށްގެންދާނީ ހަފްތާއަކު ތިން ދުވަހު ކަމށެވެ.
Ads by STO
