މައުރީން އާއި ބައްސާމް ކޮންމެ ދުވަހަކު ބޭނުން ޖެހިފައި ތިބި 5 މީހުނަށް ރޯދަ ވިއްލުން

މަޝްހޫރު ޓީވީ ހޯސްޓު މައުރީން އާއި އޭނާގެ ފިރިމީހާ ބައްސާމް ގެ ފަރާތުން މި ރޯދަމަހުގެ ކޮންމެ ދުވަަހަކު ފަސް މީހަކަށް ރޯދަ ވިއްލުން ދޭން ނިންމައިފިއެވެ.

Ads by Sosun Fihaara

މައުރީން އޭނާގެ އިންސްޓަގްރާމް ސްޓޯރީގައި ހިއްސާ ކޮށްފައިވާ ގޮތުގައި އޭނާ މިއަހަރު ރޯދަ ވިއްލުން ތައްޔާރު ކުރުމަށް ހަމަޖެހިފައިވަނީ ގޭގައެވެ. ގޭގައި މަދު އެތިކޮޅެއް ތައްޔާރު ކުރަން ނިންމާފައިވާއިރު ބޭނުން ޖެހިފައިވާ ފަރާތްތަކަށް އެހީވުމަށް ބޭނުން ވާ ކަމަށް ވެސް މައުރީން ބުނެފައިވެއެވެ.

އެގޮތުން އެހީއަށް ބޭނުން ވާ ފަދަ ދިވެއްސެއް ނުވަތަ ބިދޭސީއެއް ހުރިނަމަ މައުރީން އަށާއި އޭނާގެ ފިރިމީހާ އަށް އަންގާލަދިނުމަށް މައުރީން އެދިފައިވެއެވެ.

އަދި ﷲ ގެ އިރާދަފުޅާއެކު މި ފަދަ ފަރާތްތަކުގެ ތެރެއިން ކޮންމެ ދުވަހަކު ފަސް މީހަކަށް ނުވަތަ އެެއް އާއިލާ އަށް ރޯދަ ވީއްލާނެ ކާނާ ފޯރުކޮށްދޭނެ ކަމަށް މައުރީން ބުނެފައިވެއެވެ.

މީގެ އިތުރުންވެސް މައުރީން ވަނީ މިފަދަ ކަންކަމުގައި ގިނަ ބަޔަކު ބައިވެރިވެ އޯގާތެރިކަން އިސްކުރުމަށް އެދިފައެވެ.

ރޯދަ ވިއްލުމަކީ ހާއްސަ ކަމެއް ކަން ފާހަގަކޮށް މައުރީން ވަނީ މި ދަނޑިވަޅުގައި ދިމާވެފައިވާ ދަތިތައް ވެސް ފާހަގަ ކޮށްފައެވެ. އެގޮތުން ލޮކްޑައުން އާއި ގުޅިގެން ފިހާރަތަކަށް ނުދެވުމާއެކު އިގްތިސޯދުކުރުމުގެ މުހިންމު ކަން އޭނާ ވަނީ ފާހަގަ ކޮށްފައެވެ.

މޯލްޑިވިއަން އައިޑޮލްގެ ފުރަތަމަ ސީޒަން ހޮސްޓުގެ ގޮތުގައި މަޝްހޫރު ވެގެންދިޔަ އައިމިނަތު މައުރީން އާއި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސް ބައްސާމް އަދީލް ޖަލީލް ކައިވެނިކޮށްފައިވަނީ 2018 ވަނަ އަހަރުގެ އޮގަސްޓު މަހުގެ ތެރޭގައެވެ.