ލޮކްޑައުން އަދިވެސް އިތުރުކުރަން ޖެހިދާނެ: އަމީން
ލޮކްޑައުން ނެގޭނެ ހާލަތެއް އަދި ނެތް ކަމަށާއި އެ ލޮކްޑައުން އަދިވެސް އިތުރުކުރަން ޖެހިދާނެ ކަމަށް ހެލްތު މިނިސްޓަރު އަބްދުﷲ އަމީން ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު އަމީން ވިދާޅުވީ މިހާރު އަޅާފައިވާ ފިޔަވަޅުތަކުގެ ސަބަބުން މިދިޔަ ދުވަސްތަކުގެ ތެރޭގައި ކްލަސްޓާތަކާއި ސަރަހައްދުތައް ވެސް ފާހަގަކުރެވެމުން އަންނަ ކަމަށާއި ކްލަސްޓާތައް ފާހަގަކުރެވުމުން ދެން އަޅަންޖެހޭ ފިޔަވަޅުތައް އެޅުމަށް ވެސް ފަސޭހަތައް ވެގެންދާ ކަމަށެވެ.
ލޮކްޑައުންގެ ހާލަތުގެ ސަބަބުން މިދިޔަ 10 ދުވަހު ޕޮޒިޓިވްވާ މީހުން ފެންނަ ސަރަހައްދުތައް ވެސް ފާހަގަކުރެވެމުންދާ ކަމަށާއި ނަމަވެސް އެ ސަރަހައްދުތައް ވެސް މުޅިން ފާހަގަކޮށް ނުނިމޭ ކަމަށް މިނިސްޓަރު ވިދާޅުވިއެވެ.
"މިވަގުތުގެ ހާލަތު މިއޮތީކީ ލޮކްޑައުންގެ ހާލަތުން ވީއްލަންޖެހޭ ހިސާބަކު ނޫން. މިވަގުތުގެ ހާލަތު މިއޮތީކީ އާއްމު ހާލަތަށް ބަދަލުވާންޖެހޭ ހާލަތަކު ނޫން. ގަބޫލެއް ނުކުރެވޭ ކުރިއަށް އޮތް ހަތަރު ދުވަހުގެ ތެރޭގައި ލޮކްޑައުން ވީއްލަންޖެހޭ ހާލަތަށް އަޅުގަނޑުމެން އައިސްދާނެ ކަމަށް، އަދި އާއްމު ހާލަތަށް ކަންކަން ބަދަލުވެދާނެ ކަމަށް" އަމީން ވިދާޅުވިއެވެ.
މާލެ އިން ގިނަ އަދަދަކަށް މީހުން ކޮވިޑް-19 އަށް ޕޮޒިޓިވްވާން ފެށުމުން ސަރުކާރުން ވަނީ 14 ދުވަހަށް މާލެ ސަރަހައްދު ލޮކްޑައުންގެ ހާލަތަށް ގެނެސްފައެވެ.
ރާއްޖެއިން މިހާތަނަށް 137 މީހަކު ވަނީ ކޮވިޑަށް ފައްސިވެފައެވެ.
