ހަގީގީ ހާދިސާ: “ލޯބިވާ މަންމާއެވެ. ދުނިޔޭގެ ލަދަށްވުރެ މަންމައަށް އަހަރެން މުހިންމެއް ނުވިިއެވެ”
އަޅުގަނޑުމެންގެ މި ކުޑަކުޑަ މުޖުތަމައުުގައި މަސްތުވާތަކެތީގެ އަވައިގައި ޖެހިފައިވާ އެތައް ޒުވާނުންނެއް އެބަ އުޅެއެވެ. މަސްތުވާތަކެތީގެ އަވައިގައި ޖެހި ކޮންމެ ދުވަހަކުމެ އެތައް ޒުވާނުންނެއް މަގު ގެއްލެމުން އެބަދެއެވެ.
އެ ޒުވާނުން މަގު ގެއްލުމުގެ ޒިންމާ މިއަދު ނަގަން ޖެހެނީ ކޮން ބައެއް ބާވައެެވެ؟ އެ ޒުވާނުންގެ މައިންބަފައިން ބާވައެވެ؟ ޓީޗަރުން ބާވައެވެ؟ ނުވަތަ މުޅި މުޖުތަމައު ބާވައެވެ؟ މި މައުޟޫއު އަކީ ގިނަ ބަހުސްތަކެއް މިހާރުވެސް ކުރެވިފައިވާ މައުޟޫއު އެކެވެ. ހަގީގަތަށް ދަންނަވާނަމަ އެކި ފަހަރު އެކި ޒުވާނުން މަގު ގެއްލި ދިއުމުގައި ޒިންމާ ނަގަން ޖެހެނީ އެކި ފަރާތްތަކުންނެވެ. ބައެއް ފަހަރަށް މައިންބަފައިންނާއި އާއިލާއެެވެ. އަދި ބައެއް ފަހަރަށް މުޖުތަމައުއެވެ.
މިއީ ދިވެހި މަންމައަކު ހިއްސާކުރި ވާހަަކައެކެވެ. ދިވެހި މަންމައެއްގެ ލޯ ދިިރިއުޅުމަށް ހުޅުވިގެންދިޔަ ގޮތުގެ ވާހަކައެވެ. ދަރިއަކު ތަރުބިއްޔަތު ކުރުމުގައި އިހުމާލު ވެވިއްޖެކަން އެ މަންމައަށް އިހްސާސްވި ގޮތުގެ ވާހަކައެވެ. އެ މަންމަ މިވާހަކަ "ދެން"އާ ހިއްސާ ކުރީ ކަރުނުން ދެލޯ ފުރިފައިވާ ހާލުގައެވެ. މި ވާހަކަ މި ގެނެސްދެނީ އަސްލު ނުގެއްލޭ ގޮތަށް ބައެއް ބަދަލުތަކާ އެކުގައެވެ.
"އަހަރެންނަކީ މާލޭ މީހަކީމެވެ. މާލޭގައި ގެދޮރު ހުރި ފުދުންތެރިއަކީމެވެ. އަހަރެންނަކީ އަހަރެންގެ މަންމަ އާއި ތަނަވަސް ބައްޕައެއްގެ ހުރި ހަމައެކަނި އަންހެން ދަރިފުޅެވެ. އެހެންކަމުން އަބަދުވެސް އަހަރެމެން އުޅެމުން އައީ ނުހަނު ތަނަވަސްކަން މަތީގައެވެ. ފޯރާ ދިރިއުޅުމެކެވެ.
އަހަރެން އަލަތު ކައިވެންޏެއް ކުރީ އުމުރުން 21 އަހަަރުގައެވެ. އަހަރެންގެ ކައިވެނީގެ ހަފްލާ ވަރަށް ކުލަގަދަކޮށް ދަރުބާރުގޭގައި ބައްޕަ ބާއްވައިދިނެވެ. އަހަރެން ކައިވެނި ކުރީ ދެކުނު އަތޮޅަކަށް ނިސްބަތްވާ މީހަކާ އެވެ.
އަހަރެމެންގެ ކައިވެންޏަށް މާގިނަ ދުވަސްތަކެއް ނުވެ އަހަރެމެންގެ އަލަތު ދަރިފުޅު ލިބެން ތައްޔާރު ވިއެވެ. އެ އުފާވެރި ހަބަރުވީ މުޅި ގޭތެރެއަށް ބަހާރު މޫސުން ގެނުވި ހަބަރަކަށެވެ. އަހަރެންގެ މަންމަ އާއި ބައްޕަވެސް ތިބީ އުފަލުން ފޮޅިފައެވެ. ވާނީވެސް އެހެންތާއެވެ. މާމަ، ކާފަ ކިޔާނެ ކުއްޖަކު އުފަންވާން ތައްޔާރުވީ އަލަށް ވިއްޔާއެވެ.
އަހަރެން އިންތިޒާރު ކުރަމުން ދިޔައީ އަހަރެންގެ ލޯބިވާ ދަރިފުޅު ދުނިޔެއަށް އުފަންވާނެ ވަގުތަކަށެވެ. ކެތްތެރިކަމާއެކު އަހަރެން ދުވަސްތައް ގުނަމުން ދިޔައީމެވެ. ކޮންމެ ދުވަހެއްވެސް ވޭތުވެގެން ދަނީ އުފާވެރިކަމާއެކުގައެވެ. ފިރިމީހާ އާއި ބައްޕަގެ ފަރާތުން ލިބެމުން ދިޔަ ލޯތްބާ އަޅާލުމުގެ ސަބަބުން އަހަރެންގެ ހިތް އުފަލުން ފޮޅިފައިވިއެވެ.
އަަހަރެންގެ ދަރިފުޅު ދުނިޔެއަށް އުފަންވި ދުވަހަކީ އަހަރެން އަދިވެސް އިއްޔެވީ ކަމެއްހެން ހަނދާން ހުންނަ ދުވަހެކެވެ. އަހަރެން އެދުވަހެއްގެ މަތިން އަބަދުމެ ހަނދާން ކުރާނޭ ދުވަހެކެވެ. އެދުވަހަށްފަހު އަހަރެންގެ ހުރިހާ ވަގުތެއް އަހަރެންގެ ދަރިފުޅަށްޓަކައި ހުސްކުރީމެވެ.
ދަރިފުޅު ހެދި ބޮޑުވަމުން އާދެއެވެ. ދުވަސްތައް އެއް ދުވަސް އަނެއް ދުވަހާއި ގުޅި މާޒީ ވަމުންދެއެވެ. އަހަރެންގެ ދިރިއުޅުމަށް އައިސްފައިވާ ބަހާރު މޫސުމަށް ނިމުމެއް އަންނަން އުޅޭ ކަމުގެ އިހްސާސެއް އަހަންނަކަށް އެއް ގޮތަކަށްވެސް ކުރެވިފައެއް ނެތެވެ. ނަމަވެސް އަހަރެންގެ ހަޔާތް ބަަނަކޮށްލި ރާޅު ނެގީ އަހަރެންނަށް ނުވެސް އެނގި ހުއްޓައެވެ.
ބައްޕަގެ ބަލި ހާލަތު ގޯސްވެ ޖެހުނު ހާރޓް އެޓޭކެއްގައި ބައްޕަ މި ދުނިޔެ ދޫކުރީއެވެ. ބައްޕަގެ ވިޔަފާރިއާ ހަވާލުވާން ޖެހުނީ އަހަރެންނާއި އަހަރެންގެ ބޭބެ އަށެވެ. ބޭބެ އަކީ އަމިއްލަ ވިޔަފާރިއެއް ފަަށައިގެން އުޅޭ މީހެއް ކަމުން ބައްޕަގެ ވިޔަފާރީގެ ހުރިހާ ކަމަކާ ހަވާލުވާން ޖެހުނީ އަހަރެންނަށެވެ.
ބައްޕަ ނިޔާވުމުން އަހަރެންގެ މުޅި ދިރިއުޅުން ބަނަވިއެވެ. ނަމަވެސް ބައްޕަގެ ވިޔަފާރި ކުރިއެރުވުމަކީ ބައްޕަ އަހަންނަށް ކުރި ވަސިއްޔަތަކަށް ވާތީ އަހަރެން ހިތްވަރާއެކު އެކަން ކުރެވޭތޯ ބެލީމެވެ.
އަހަރެން ބައްޕަގެ ވިޔަފާރީގެ މަސައްކަތްތަކުގައި އަވަދިނެތި އުޅެން ފެށީމެވެ. އަހަރެންގެ ފިރިމީހާ ވެސް އަހަރެންނަށް އެހީތެރިވެދިނުމުގައި ދެމިހުރެއެވެ، އަހަރެންނަކީ ވެސް މަތީ ތައުލީމް ހާސިލްކޮށްގެން ހުރި މީހަކަށް ވާތީ ވިޔަފާރީގެ ހިސާބު ކިތާބު ބަލަހައްޓަނީ އަހަރެންނެވެ. އެހެންކަމުން އެހުރިހާ ވިޔަފާރިއެއް ބެލެހެއްޓުމުގެ މަސްއޫލިއްޔަތު ވީ ވަރަށްވެސް ބޮޑު މަސްއޫލިއްޔަތަކަށެވެ.
އަހަރެން ވިޔަފާރީގެ ކަންކަމުގައި މަސްއޫލުވެ އުޅެން ޖެހުމުން ދަރިފުޅު ، އަހަދު(އަސްލު ނަމެއް ނޫން)ގެ ކަންކަމުގައި ފަރުވާ ކުޑަ ކުރެވެން ފެށިއެވެ. އަހަރެންނަކީ އަހަދު ސުކޫލަށް ލާން އަދި ބަލައި ބަރާބަރަށް ދާ މީހެއް ނަމަވެސް އެކަމުގައި ވެސް ފަރުވާ ކުޑަ ކުރެވެން ފެށިއެވެ. އަހަދުގެ ފިލާވަޅުތައް ދުވަހުން ދުވަހަށް ނިންމާތޯ އަހަރެން ބަލަމެވެ. ނަމަވެސް މިހާރު އަހަރެން ގިނަ ވަގުތު އުޅެން ޖެހެނީ ގެއިން ބޭރުގައެވެ. ފިރިމީހާ ގިނައިން އުޅެން ޖެހެނީ ރަށުން ބޭރުގައެވެ.
ވިޔަފާރި މަޑުމަޑުން ފުޅާވަމުން ދިޔައެވެ. ދުވަހަކަށްވުރެ ދުވަހެއް ލިބެމުން ދިޔަ ފައިދާ އިތުރުވަމުން ދިޔައެވެ، އެކަމާ އަހަރެން ހުރީ ނުހަނު އުފަލުންނެވެ. އަދި ފަހުރުވެރިވެސް ވެފައެވެ. ނަމަވެސް އަހަރެންގެ ހިތް ނުތަނަވަސްވީ އެހެން ސަބަބަކަށް ޓަކައެވެ. އަހަރެންގެ ލޯބިވާ ދަރިފުޅު އަހަދުގެ އުޅުމަށް ބަދަލުތަކެއް އަންނަމުންދާ މަންޒަރު އަހަންނަށް ފެންނާތީއެވެ.
ދުވަސްތައް ފާއިތުވަމުން ދެއެވެ. އަހަދުގެ އުޅުމަށް ބޮޑެތި ބަދަލުތަކެއް އަންނަން ފެށިއެވެ. އެއް ދުވަހަކު އަހަރެން އަހަަދު ބަލައި ސުކޫލް ދޮށަށް ދިޔައީމެވެ، ނަމަވެސް އެދުވަހު ސުކޫލަށް އަހަދު ނާންނަ ކަމުގައި އޭނާގެ ޓީޗަރުން ބުންޏެވެ. ހާސްވެފައިވާ ހާލު އަހަރެން އަނބުރާ ގެއަށް އައީމެވެ. ސުކޫލަށް ނުދާނަމަ ޔުނީފޯމް އަޅައިގެން އަހަދު އެދިޔައީ ކޮންތާކަށްތޯ ހިތުގައި ސުވާލު އުފެދިފައިވާ ހާލުގައެވެ. އަހަރެން ގެއަށް އައިސް އަހަރެންގެ ފިރިމީހާއަށް ގުޅީމެވެ. އަހަދު ގެއްލިގެން އުޅޭ ވާހަކަ ބުނީމެެވެ.
އަހަރެން އަހަދުގެ ހުރިހާ އެކުވެރިންނަށް ވެސް ގުޅީމެެވެ. ނަމަވެސް އެއިން އެއްވެސް ކުއްޖެއްގެ ގެއަކަށް އަހަދުއެއް ނުދެއެވެ. އަހަދުއާ މިއަދު ސުކޫލުންވެސް އެކުދިންނާ ދިމައެއްް ނުވެއެވެ. އަހަރެންގެ ފިރިމީހާ އޭރު ގެއަށް އައިސްފިއެވެ. އޭނާވެސް ހުރީ ހަދާނެ ގޮތް ހުސްވެފައެވެ. ހާސްވެ ކަންބޮޑުވެފައެވެެ.
އަަހަރެމެން ދެމަފިރިން ހާސްވެ ކަންބޮޑުވެފައިވާ ހާލުގައި ތިއްބާ އަހަރެމެންގެ ދެލޯ ފަދަ ދަރިފުޅު އައިސް ގެއަށް ވަނެވެ. ނަމަވެސް އަހަރެންގެ ދެލޯ ފުރުނީ އަހަރެންގެ ދަރިފުޅު ހުރި ހާލުންނެވެ. އަހަރެމެންގެ ދަރިފުޅު ހުރީ މަސްތުގެ ހާލަތުގައެވެ. އަހަރެމެން ދެމީހުންނަށް އަޅާވެސް ނުލާ ދިޔަގޮތަށް ގޮސް ކޮޓަރިއަށް ވަދެ އޭނާ ދޮރު ލައްޕައިފިއެވެ.
އަހަރެންގެ ދެލޮލުން ހޯސްލައިފައި ކަރުނަތައް ފައިބައިގަތެވެ. ނަމަވެސް އަހަރެން ކެތްކުރީމެވެ. އަދި އަހަރެންގެ ދަރިފުޅުގެ ކޮޓަރީގެ ދޮރު ކައިރިއަށް ގޮސް ދަރިފުޅަށް ގޮވަމުން ދިޔައީމެވެ. އަދި ދަރިފުޅު ދޮރު ހުޅުވުމުން ދަރިފުޅަށް އަހަރެންނާއި ފިރިމީހާ ވެގެން ނަސޭހަތް ދިނީމެވެ. އަދި އޭގެ ފަހުން ދަރިފުޅަށް ބޭރަށް ދެވޭނީ އަހަރެމެންނާ އެކު އެކަނި ކަމަށާއި ދަރިފުޅަށް ފައިސާ ވެސް ކުރިން ދޭ ގޮތަށް ނުދޭނެ ކަމުގައި އަހަރެން ބުނީމެވެ.
ދުވަސް ކޮޅަކަށް ދަރިފުޅުގެ އުޅުމަށް ރަނގަޅު ބަދަލުތަކެއް އަންނަން ފެށިއެވެ. ނަމަވެސް އެެއް ރެޔަކު ދަރިފުޅު ޓިއުޝަނަށް ގޮސް އުޅެނިކޮށް، އަހަރެންގެ ފޯނަށް މީހަކު ގުޅިއެވެ. އޮފީސް ނަންބަރަކުންނެވެ. ފޯނު ނަގައި ވާހަކަ ދެއްކުމުން ގުޅީ ފުލުހުންކަން އެނގުނެވެ. އަހަރެންގެ ގާތުގައި ފުލުސް އޮފީހަށް އައިސްދިނުމަށް އެދުނެވެ. އަހަރެން އަވަހަށް ތައްޔާރުވެލައިގެން މާފަންނު ހުންނަ ފުުލުހުންގެ އިދާރާއަށް ގޮސްފީމެވެ.
ކަންވީގޮތް އޮޅުންފިލި އިރު އަހަރެންނަށް އެނގުނީ އަހަރެންގެ ދަރިފުޅު ފިހާރައަކުން ވައްކަން ކުރީ ކަމެވެ. އަހަރެން މިހާރު ދަރިފުޅަށް ރުފިޔާ ނުދޭތީ މަސްތުވާތަކެތި ގަންނަން ރުފިޔާ ނުހުންނާތީއެވެ. ކުޑަކުއްޖަކަށް ވާތީއާއެކުގައެވެ. އަހަރެންގެ ދަރިފުޅު ވައްކަން ކޮށްގެން އުޅޭ ވާހަކަ އިސާހިތަކު މުޅި ހިސާބުގަނޑުގައި ވައިގައި ހިފައިފިއެވެ. އަހަރެން ވަރަށް ލަދުގަނެ ދެރަ ވެސް ވިއެވެ.
އަހަރެން އަހަަދުގެ ގާތުގައި ބުނީމެވެ. ތާކުން ދެން ވެސް ވައްކަން ނުކުރައްޗެވެ. ބުނުމަށްފަހު އަހަރެން އަހަދުގެ އަތަށް ކޮންމެ ދުވަހަކުވެސް 500 ރުފިޔާ ދޭނެ ކަމަށް ބުނީމެވެ. އަދި އެވަރުން ނުވާނަމަ އަހަރެންގެ ގާތުގައި ބުނުމަށް އަހަރެން އެދުނީމެވެ. ވައްކަން ކޮށްގެން ފުލުސް އޮފީހަށް އަހަދު ގެންދިއުމުން އާއިލާގެ އަގު ވެއްޓޭތީއެވެ.
އަހަރެންގެ ދަރިފުޅު އޭނާގެ ދިރިއުޅުން އުޅެމުން ގެންދެއެވެ. އަހަރެންނަށް ފަހުން ވެސް އޭނާއާ މާބޮޑަށް އަޅައެއް ނުލެވެއެވެ. އަހަރެންނަށް އެދުވަހު އަހަރެންގެ ވިޔަފާރި މާ މުހިއްމު ވީއެވެ. ގިނައިން ފައިސާ ލިބޭ ވަރަކަށް އެއަށްވުރެ އިތުރަށް ހޯދަން އަހަރެން ބޭނުންވީއެވެ. އަހަރެންގެ އަގު ވެއްޓޭ ފަދަ ކަމެއް މިހާރު އަހަދު ނުކުރެއެވެ.
ދުވަސްތައް ފާއިތުވަމުން ގޮސް އެއް ދުވަހެއްގެ ހެނދުނުގެ ވަގުތެވެ. ލިބުނު ހަބަރުން ދުނިޔެ ހުއްޓުނު ކަހަލައެވެ. މަސްތުވާތަކެތީގެ މައްސަލައެއްގައި ހައްޔަރު ކުރި ބައެއްގެ ތެރޭގައި ހިމެނޭ އެކަކީ އަހަރެންގެ ދަރިފުޅެވެ.
އަހަރެންގެ ދިރިއުޅުން ބަނަކޮށްލި ވިލާގަނޑަކީ އެއީއެވެ. އަަހަރެންގެ ދަރިފުޅުގެ އެންމެ ޒުވާން އުމުރު އޭނާގެ މަންޒިލަކަށްވީ ޖަލެވެ.
އަހަރެން ކޮންމެ މަހަކު އެއްފަހަރުހެން ދަރިފުޅާ ބައްދަލުކުރަން ޖަލަށް ދަމެވެ. ދަރިފުޅުގެ ފަރާތުން މާޔޫސްކަން ފެނެއެވެ. ނުދަންނަ ނަމްބަރަކުން އެއް ދުވަހު ފޯނަށް ލިބުނު މެސެޖަކުން ހިތް ކުދިކުދި ކޮށްލިއެވެ.
"މަންމާއެވެ. އަހަރެން ފިހާރައަކުން ވައްކަން ކުރުމުން މަންމަގެ އަގު ވެއްޓުނީއެވެ. އެދުވަހު އަހަރެން އިސްލާހު ކުރަން މަސައްކަތް ކުރުމުގެ ބަދަލުގައި މަންމަ ބެލީ މަންމަގެ އަގު ހިފެހެއްޓޭތޯއެވެ. މަންމަގެ ވިޔަފާރި ކުރިއެރުވޭތޯއެވެ. އިތުރު ފައިސާ ހޯދޭތޯއެވެ. އަހަންނާއި ހެދި މަންމަ ބޮޑު ލަދެއްގައި ބެދިފާނެ ކަމަށް މަންމަ ހީކުރިއެވެ. އަދި އެކަން އެހެން ނުވާނޭހެން މަންމަ އަހަރެންނަށް އެތައް ފައިސާއެއް ދެމުން ގެންދިޔައެވެ. އަހަރެން އެ ފައިސާ ބޭނުން ކުރަނީ މަސްތުވާތަކެތި ގަންނަންކަން އެނގިހުރެއެވެ. އެދުވަހު މަންމަ އެފައިސާތައް އަހަރެންނަށް ނުދީ އަހަރެންނަށް ލޯތްބާއި އަޅާލުން ދީގެން އަހަރެން އިސްލާހުކުރަން މަަސަައްކަތް ކުރިނަމަ މިއަދު މި ޖަލުގެ ތޭރިތަކުގެ ފުރަގަހުގައި އަހަރެން ހުންނަން ނުޖެހުނީސް ކަންނޭނގެއެވެ. މަންމާއެވެ. އަހަރެންވެސް ކުރީ ގޯސް އަމަލެެކެވެ. އަހަރެންވެސް ދިރިއުޅުމުގައި ރޯކުރީ ނުބައި އަލިފާންގަނޑެކެވެ. ނަމަވެސް އެ އަލިފާންގަނޑު ނިއްވާލަން މަސައްކަތް ކުރުމުގެ ބަަދަލުގައި މަންމަ އެ އަލިފާންގަނޑަށް އެޅީ ޕެޓްރޯލެވެ. ލޯބިވާ މަންމާއެވެ. ދުނިޔޭގެ ލަދަށްވުރެ މަންމައަށް އަހަރެން މުހިއްމެއް ނުވިއެވެ"
އެ މެސެޖު ކިޔުމަށްފަހު އަހަރެން އަޑުން އަޑު ނަގައި ރުއީމެވެ. އަދި އަހަރެންގެ ދަރިފުޅު މަތިން އިންތިހާއަށް ހަނދާންވިއެވެ. އަހަރެންނަށް ކުރެވުނު ކުށް އަހަރެންނަށް އިހްސާސްވާ ހާލު އަހަރެންނަށް ގިސްލެވެމުން ދިޔައެވެ. އަދި އަހަރެންގެ ފިރިމީހާ ވެސް އެ ނޯޓު ކިޔުމަށްފަހު ރޮމުން ދިޔައެވެ. އަހަރެމެން ދެމީހުން ވިޔަފާރި ކުރިއެރުވުމުގައި މަސްއޫލުވެ އުޅުނީ އަމިއްލަ ދަރިފުޅު މަސްތުގެ ހާލުގައި ވާން އެނގިހުރެ ދޫކޮށްލާފައެވެ.
އެ ދުވަހު އަހަރެން އަޒުމު ކަނޑައެޅީމެވެ. ދަރިފުޅު މިނިވަން ވެގެން އައުމުން އަހަރެންގެ ހުރިހާ ވަގުތެއް އެދަރިފުޅަށް ޓަކައި ހުސް ކުރުމަށެވެ. އެ ދަރިފުޅު އަހަރެންގެ ލޯތްބާ އަޅާލުން ބޭނުންވެއްޖެ ކޮންމެ ހާލަތެއްގައި އަހަރެން އެ ދަރިފުޅުގެ ގާތުގައި ހުރުމަށެވެ.
އަހަރެންގެ ދަރިފުޅު ޖަލުން ދޫކޮށްލިތާ މިއަދު އަހަރެއް ވަނީއެވެ. މިއަދު އަހަރެންގެ ގިނަ ވަގުތު އަހަރެން ހޭދަކުރަނީ އަހަރެންގެ ދަރިފުޅާ އެކުގައެވެ. މިއަދު އަހަރެންގެ ދަރިފުޅަކީ ރީހެބަށް ގޮސް ބަދަލުވެފައިވާ ކުއްޖެކެވެ.
އަހަރެން ހުރިހާ ބެލެނިވެރިންނަށް ދޭން ބޭނުންވާ މެސެޖެއް އެބައޮތެވެ. ދަރިފުޅު ގޯސް މަގުން ދާން ފެށުމުން އެ ދަރިފުޅަށް އަަޅާލުމާއި ލޯބިދީ އެދަރިފުޅަށް ނަސޭހަތް ދޭށެވެ. އެ ދަރިފުޅަށް ފައިސާދީ އޭނާ ގޯސް މަގުންދާން މަގުދައްކާ ސަމުގާއަކަށް ނުވާށެވެ. އެހެން ވެއްޖެ ނަމަ އެދަރިފުޅު ދުވަހަކުވެސް ރަނގަޅެއް ނުވާނެއެވެ.
މިއަދު އަހަރެންނަށް ވިސްނިއްޖެއެވެ. މިއަދު ދުނިޔޭގެ ލަދަށް ބިރުން ފިލާކަށް އަހަރެން ނޫޅޭނަމެވެ. މިއަދު ދުނިޔޭގެ ލަދާއި ދުނިޔޭގައި ވާހާ އެއްޗަކަށްވުރެ އަހަރެންގެ ދަރިފުޅު އަހަރެންނަށް މާ މުހިއްމެެވެ."
މި ވާހަކަ އަޅުގަނޑަށް އެ މަންމަ ކިޔައިދިނީ ގިސްލަމުންދިޔަ ހާލުގައެވެ. މިއަދު އެ ޒުވާނާ އަކީ ހަރުދަނާ ޒުވާނެކެވެ. އެ އާއިލާއަކީ އުފާވެރި އާއިލާއެކެެވެ. އަޅުގަނޑުގެ ދުޢާ އަކީ އެ އާއިލާއަށް އުފާވެރި ފާގަތި ދުވަސްތަކެއް މިންވަރު ކުރެއްވުމެވެ.
Ads by STO
