އިދިކޮޅު ކޯލިޝަނުން ރައީސް ނަޝީދުގެ މައްޗަށް ބޮޑެތި ތުހުމަތު ތަކެއް
އިދިކޮޅު ޕްރޮގްރެސިވް ކޯލިޝަނުން ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ މައްޗަށް ކޮރަޕްޝަނުގެ ބޮޑެތި ތުހުމަތު ތަކެއް ކޮށް، އެމައްސަލަތައް އެސެޓް ރިކަވަރީ ކޮމިޝަނާއި އެންޓި ކޮރަޕްޝަން ކޮމިޝަނަށް ހުށަހަޅަން ނިންމައިފިއެވެ. މި މައްސަލަތައް އެ ކޮމިޝަންތަކަށް ހުށަހަޅަން ނިންމާފައިވާކަން އެކޯލިޝަނުގެ ލީގަލް ޓީމުން މިއަދު ބޭއްވި ނޫސްވެރިންގެ ބައްދަލުވުމެއްގައި ވަނީ ހާމަ ކޮށްފައެވެ.
ދާދިފަހުން ސުލޫކީ ކޮމިޓީގެ ކުރީގެ ގުގައްރިރު ޝުއައިބު އަލީ، ރައީސް ނަޝީދުގެ މައްޗަށް ކޮށްފައިވާ ތުހުމަތުތަކާއި ގުޅިގެން އެކޯލިޝަނުން އެމައްސަލަތައް ކަމާބެހޭ އިދާރާތަކަށް ހުށަހަޅަން ނިންމާފައިވާކަމަށް އެ ކޯލިޝަނުން ބުނެއެވެ.
އެ ތުހުމަތުތަކަށް ބަލާއިރު، އެމްއެމްޕީއާރުސީ ހިޔާނާތުގެ ފައިސާއިން އެންމެ ބޮޑު މަންފާއެއް ލިބުނީ ރައީސް ނަޝީދަށް ކަމަށް ބުނެ އިދިކޮޅުން ކުރާ ތުހުމަތު ހިމެނެއެވެ. އެކަންކަމަށް އެކި ޕޯޑިއަމްތަކުގައި މީގެ ކުރިންވެސް ރައީސް ނަޝީދު އިއުތިރާފް ވެފައިވާ ކަމަށްވެސް އިދިކޮޅުން ތުހުމަތު ކުރެއެވެ.
އެމްއެމްޕީއާރުސީ މައްސަލައިގައި ދައުވާކޮށް ދާދިފަހުން މައްސަލަ ސާބިތުވި ކުރީގެ ނައިބު ރައީސް އަހުމަދު އަދީބަކީ، ކުރީ ސަރުކާރު ފުނޑާލުމަށްޓަކައި ރައީސް ނަޝީދު އިސްކޮށް ހުންނަވައިގެން ސަރުކާރުގެ ތެރޭގައި އެޅުވި ފަންޏެއް ކަމަށާއި، އެކަމަށް މީގެ ކުރިން ނަޝީދު އަމިއްލަފުޅަށް ވަނީ އިއުތިރާފް ވެފައިވާކަމަށް އިދިކޮޅު ކޯލިޝަނުން ތުހުމަތު ކުރެއެވެ.
Ads by STO
