ސުނާމީ ފަދަ ކާރިސާތަކުން ސްކޫލްތައް ރައްކާތެރި ކުރުން މުހިއްމު : އެޑިއުކޭޝަން މިނިސްޓަރ
ސުނާމީ ފަދަ ގުދުރަތީ ކާރިސާތަކުން ސުކޫލުތައް ރައްކާތެރި ކުރުމަކީ މުހިންމު ކަމެއް ކަމުގައި އެޑިއުކޭޝަން މިނިސްޓަރު އާއިޝަތު އަލީ ވިދާޅުވެއްޖެއެވެ.
"ސުނާމީ އެވެއާރނެސް ޑޭ" ގެ ގޮތުގައި ސުނާމީ އަށް ހޭލުންތެރި ކުރުމުގެ ގޮތުން މިއަދު އެ ދުވަސް ފާހަގަ ކުރަމުން އަންނައިރު، މި ދުވަހުގެ މުނާސަބަތުގައި މިނިސްޓަރު ވަނީ ޚިތާބެއް ދެއްވަވާފައެވެ.
މިނިސްޓަރުގެ ޚިތާބުގައި ސުނާމީ ފަދަ ކާރިސާތަކަށް ހޭލުންތެރިކުރުމުގެ މަސައްކަތް ފެށޭ ފުރަތަމަ މަރުކަޒަކީ ސްކޫލްތައް ކަމަށްވުމަކީ މުހިއްމު ކަމެއްކަން ފާހަގަކުރެއްވިއެވެ. އަދި އެއީ ކާރިސާތަކާއި ގުޅޭ މަޢުލޫމާތު އެންމެ ފުރަތަމަ ފޯރުކޮށްދެވޭ ތަންތަނަކީ ސްކޫލްތަކަށްވާތީ ކަމުގައި މިނިސްޓަރު ވިދާޅުވިއެވެ.
ސުނާމީ ފަދަ ކާރިސާތަކުގައި ރައްކާތެރި ބޯހިޔާވަހިކަން ފޯރުކޮށްދޭ މަރުކަޒުތައް ނުވަތަ އިވެކުއޭޝަން ސެންޓަރުތަކުގެ ގޮތުގައި ބޭނުން ކުރަން އެންމެ ރައްކާތެރި ތަނަކީ ސުކޫލުތައް ކަން ފާހަގަކުރައްވިއެވެ.
މިނިސްޓަރ ވަނީ ސްކޫލުތަކުގެ އިސްވެރިންނާއި މުދައްރިސުންނާއި، ބެލެނިވެރިންނާއި ދަރިވަރުންގެ އިތުރުން މުޅި މުޖުތަމައު ވެސް ސުނާމީ ފަދަ ކާރިސާތަކަށް ތައްޔާރުވެ ތިބި ބާރުވެރި ބަޔަކަށްވުމަށް އިލްތިމާސް ކުރައްވާފައެވެ.
