އެމެރިކާ އިން ރާއްޖެއަށް ދެ މިލިއަން ޑޮލަރުގެ އެހީއެއް ދީފި
އެމެރިކާ އިން ރާއްޖެއަށް 2 މިލިއަން ޑޮލަރު (31 މިލިއަން ރުފިޔާ)ގެ އެހީއެއް ދީފިއެވެ. މި އެހީ ދީފައިވަނީ އެ ގައުމުގެ އިކޮނޮމިކް ސަޕޯޓް ފަންޑިންގެ ގޮތުގައެވެ.
މިކަން ހާމަކޮށް ފޮރިން މިނިސްޓަރު އަބްދުﷲ ޝާހިދު މިއަދު ކުރެއްވި ޓްވީޓުގައި ބުނެފައިވަނީ ކޮވިޑް19 ބަލިމަޑު ކަމުގެ މިި ދަތި ހާލަތުގައި މި ފަދަ އެހީތަކާއި އެއްބާރުލުން ބޭނުން ވާ ކަމަށެވެ.
މީގެ އިތުރުން މި އެހީ ވެދިން ކަމަށްޓަކައި އެމެރިކާގެ ސެކެޓްރީ އޮފް ސްޓޭޓް މައިކް ޕޮމްޕޭއޯ އަށާއި، އެމެރިކާއިން ސްރީލަންކާ އަދި ރާއްޖެއަށް ކަނޑައަޅާފައި ހުންނަވާ ސަފީރު އެލެއިނާ ޓެޕްލިޓްސްއަށް މިނިސްޓަރު ޝާހިދު ވަނީ ޝުކުރު އަދާކޮށްފައެވެ.
Thank Secretary @SecPompeo and Ambassador Teplitz @USAmbSLM for the USD 2 million in economic support funding announced for #Maldives to assist in COVID-19 economic recovery. We need such support and assistance from our partners to overcome this pandemic. https://t.co/RxChFqML8E
— Abdulla Shahid (@abdulla_shahid) May 2, 2020
އެމެރިކާގެ ސްޓޭޓް ޑިޕާޓްމެންޓުން ހާމަކޮށްފައިވާ ގޮތުގައި މި އެހީގެ ތެރޭގައި ސަރުކާރާއި، ޕްރައިވެޓް ސެކްޓާ ގެ އިތުރުން ފައިނެންޝަލް އިންސްޓިޓިއުަންސް އަށް ބޭނުން ވާ ޓެކްނިކަލް އެހީތެރިކަން ވެސް ހިމެނިގެންދާނެއެވެ.
2004 ވަނަ އަހަރަށް ފަހު އެމެރިކާއިން ރާއްޖެއަށް 30 މިލިއަން ޑޮލަރަށް ވުރެ ބޮޑު އެހީތެރިކަމެއް ވެދީފައިވާކަން ވެސް އެ ޑިޕާޓްމެންޓް އިން ފާހަގަކޮށްފައިވެއެވެ.
ރާއްޖޭގެ އިތުރުން ދުނިޔޭގެ އިތުރު ގިނަ ގައުމުތަކަކަށް އެމެރިކާ އިން ވަނީ އެހީތެރިކަން ފޯރުކޮށްދީފައެވެ.
ކޮވިޑް19 ގެ ބަލިމަޑުކަމުން އަރައިގަތުމަށް ގިނަ ފަރާތްތަކަކުން ރާއްޖެއަށް އެހީވަމުން އަންނައިރު ޖަޕާން ސަރުކާރުން ވަނީ އިއްޔެ ޔުނިސެފް މެދުވެރިކޮށް 5،634،468 މިލިއަން ދިވެހި ރުފިޔާ، އަދި ދިވެހި ރެޑް ކްރެސެންޓް މެދުވެރިކޮށް 2،852،700 މިލިއަން ދިވެހި ރުފިޔާ، ހިލޭ އެހީގެ ގޮތުގައި ދެއްވާފައެވެ.
