އަތޮޅު ތެރޭގެ ޕްރީސްކޫލުތަކުގައި ކިޔަވައިދޭން ފަށަނީ
އަންނަ ހަފްތާއިން ފެށިގެން އަތޮޅު ތެރޭގެ ޕްރީސުކޫލުތަކުގައި ކިޔަވައިދޭން ފަށަން ނިންމައިފިއެވެ.
އެޑިއުކޭޝަން މިނިސްޓްރީ އިން މިކަން އިއުލާނުކޮށް ކުރި ޓްވީޓުގައި ވިދާޅުވީ މިހިނގާ ނޮވެމްބަރު މަހުގެ 15 އިން ފެށިގެން އަތޮޅުތެރޭގެ ސްކޫލްތަކުގެ ފައުންޑޭޝަން ސްޓޭޖާއި ޕްރީ ސްކޫލްތަކަށް ކުދިން ގެންގޮސްގެން އުމުރާ ގުޅޭ ހަރަކާތްތައް ހިންގުމަށް އެ މިނިސްޓްރީއިން ނިންމާފައިވާ ކަމަށެވެ.
ކޮވިޑް-19 އާ ގުޅިގެން މާޗު މަހު ހުރިހާ ސުކޫލުތަކެއް ބަންދު ކުރިއިރު، ފަހުން އެހެން ގްރޭޑުތަކުގައި ކިޔަވައިދިނުން ފަށާފައިވީ ނަމަވެސް ފައުންޑޭޝަން ސްޓޭޖުގެ ކިޔެވުން ނުފަށައެވެ.
މިއަހަރުގެ ފުރަތަމަ ޓާމުގެ ކިޔެވުން އަންނަ މަހުގެ ތިންވަނަ ދުވަހު ނިމޭއިރު ދެވަނަ ޓާމުގެ ކިޔެވުން ފަށާނީ ޖެނުއަރީ 3 ގައެވެ.
2021 ވަނަ އަހަރުގެ ދިރާސީ އަހަރު ފެށުމަށް ނިންމާފައިވަނީ އަންނަ އަހަރުގެ އޮގަސްޓު މަހުގައެވެ.
