ހޯރަފުށީ އެއާޕޯޓް އަންގާރަ ދުވަހު ހުޅުވަން ތައްޔާރު ވަނީ
ހޯރަފުށީ އެއާޕޯޓަށް މި މަހުގެ 16 ވަނަ ދުވަހު ޓެސްޓް ފްލައިޓް ޖައްސައި މިމަހުގެ 17 ވަނަ ދުވަހު ހުޅުވަން މަސައްކަތް ކުރަމުން އަންނަ ކަމަށް ޓްރާންސްޕޯޓް މިނިސްޓްރީން ވިދާޅުވެއްޖެއެވެ.
އެއާރޕޯޓުގެ މަސައްކަތް ނިންމައި ތަނުގެ އިންސްޕެކްޝަނުގެ މަސައްކަތްތައް މިހާރު ކުރިއަށްދާ ކަމުގައި ޓްރަންސްޕޯޓް މިނިސްޓްރީގެ ސްޓޭޓް މިނިސްޓަރު އަހުމަދު ޒުހެއިރު ވިދާޅުވިއެވެ. އެގޮތުން މި މަހު 16ގައި ޓެސްޓު ފްލައިޓް ޖައްސައި 17 ވަނަ ދުވަހު އެއާޕޯޓް ހުޅުވުމަށް ތައްޔާރުވަމުން އަންނަ ކަމުގައި ވެސް ވިދާޅުވިއެވެ.
ނޮވެމްބަރު 17 2020ވާ އަންގާރަ ދުވަހަކީ ރައީސް އިބްރާހިމް މުހައްމަދު ޞާލިހް ވެރިކަމުގެ ހުވާ ކުރެއްވިތާ 2 އަހަރު ފުރޭ ދުވަހެވެ.އެހެންކަމުން އެ ދުވަހުގައި އެއާޕޯޓު ހުޅުވުމުގެ މަސައްކަތް ކުރަމުން އަންނަ ކަމުގައި ޒުހެއިރު ވިދާޅުވިއެވެ.
ހޯރަފުށީ އެއާޕޯޓު ހުޅުވުމުގެ ރަސްމިއްޔާތަށް އެރަށުގައި ވެސް އަންނަނީ މަސައްކަތްތައް ކުރަމުންނެވެ. އެގޮތުން އެ ރަށުގެ ރައްޔިތުން ބައިވެރިވެގެން އެއާފޯޓު އަޅަން ހިއްކި ސަރަހައްދުގައި ގަސް އިންދާ އަދި އެ ސަރަހައްދުގައި ނުނިމި ހުރި މަސައްކަތްތައް ދަނީ ކުރަމުންނެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި ހޯރަފުށީގައި އެއާޕޯޓު އަޅަން ނިންމީ އެރަށުގެ އުތުރުން އެއްފަޅެއްގައި އޮންނަ މާފިނޮޅާއެކު ބިން ހިއްކައިގެންނެވެ. ނަމަވެސް މި ސަރުކާރުން އެއާޕޯޓް ހެދީ އެ ރަށުގެ ދެކުނު ފަރާތުން ފަޅު ހިއްކައގެން އެތަނުގައެވެ. މި އެއާޕޯޓަކީ މި ސަރުކާރުން ހަދައި ނިންމައި ހުޅުވާ ފުރަތަަމަ އެއާޕޯޓެވެ.
