އެޗްޕީއޭގެ ވެބްސައިޓް ހެކް ކުރި މައްސަލަ ފުލުހުން ބަލަން ފަށައިފި
ހެލްތު ޕްރޮޓެކްޝަން އެޖެންސީ(އެޗްޕީއޭ)ގެ ވެބްސައިން ހެކް ކުރި މައްސަލަ ފުލުހުން ބަލަން ފަށައިފިއެވެ.
މިއަދު އެޗްޕީއޭގެ ވެބްސައިޓު ހެކްކޮށް އެ ވެބްސައިޓުގައި ވީޑިއޯއެއް ފެންނަ ގޮތް ވަނީ ހަދައިފައެވެ. އެ ވީޑިއޯގައި ކާކުކަން ނޭނގޭ ގޮތަށް މީހަކު ސަރުކާރަށް އިންޒާރުގެ މެސެޖެއް ދެއެވެ.
ފުލުހުން ބުނީ އެ މައްސަލާގައި ބަލަން ޖެހޭ ކަންކަން ބަލަމުންދާ ކަމަށެވެ.
އެ މެސެޖުގައި ސަރުކާރުގެ ނެޓްވޯކްތައް ހެކްކޮށް، މައުލޫމާތުތައް ލީކްކޮށްލާނެ ކަމަށް އިންޒާރު ދީފައިވެއެވެ.
އަދި ރައްޔިތުންނަށް ފައިދާވާ ގޮތްގޮތަށް ސިޔާސަތުތައް ބަދަލު ނުކުރާނަމަ ސަރުކާރުގެ ނެޓްވޯކުތަކާއި ފައިނޭޝަލް އިންފްރާސްޓްރަކްޗާ ހަލާކޮށްލާނެ ކަމަށްވެސް އެ އިންޒާރުގައި ބުނެފައިވެއެވެ.
ރައީސް އިބްރާހިމް މުހައްމަދު ސޯލިހުގެ ސަރުކާރުން ރައްޔިތުންނަށް އެންމެ ފައިދާވާ ގޮތަށް ކަންކަން ނުކުރާ ކަމަށާއި އިންޑިއާގެ "ފޭޝިސްޓު ސަރުކާރުން" މި ގައުމުގެ މައްޗަށް ވެރިވެގެންފައިވާ ކަމަށް އެ މެސެޖުގައި ބުނެފައިވެއެވެ.
އަދި މަޖިލީހުގެ މެމްބަރުންނަށްވެސް އެ ގައުމުން ފައިސާ ދީފައިވާ ކަމަށް ދޭހަވާ ގޮތަކަށް އެ މެސެޖުގައި ވާހަކަ ދައްކާފައިވެއެވެ.
މީގެ އިތުރުން ރާއްޖޭގެ 99 ޕަސެންޓުގެ ވަޒީފާ ގެއްލިފައިވާ ކަމަށާއި ވަރަށް އަވަހަށް މީހުންނަށް ކާނާގެ ދަތިކަން ކުރިމަތިވެ މަގުމަތިވާން ފަށާނެ ކަމަށްވެސް މެސެޖުގައި ބުނެފައިވެއެވެ.
އަދި ސަރުކާރުގެ ވުޒާރާތަކުން ރައްޔިތުންނަށް އޮޅުވާލައި ދޮގު މައުލޫމާތު ދެމުންދާ ކަމުގެ ތުހުމަތުވެސް ކޮށްފައިވެއެވެ.
އިތުރު ތަފްސީލު އަންނަނީ...
