އިގްތިސޯދު ރިވިއު ކުރާ ހިސާބަކަށް އަދި ނުދޭ: އާދަމް ޝަރީފް
ކޮވިޑް-19އާ ގުޅިގެން ރާއްޖޭގެ އިގްތިސާދު ރިވިއުކޮށް ކޮޅަށްޖަހާ ވާހަކަ ދައްކާ ހިސާބަށް އަދި ނުދާ ކަމަށް މަޑުއްވަރީ ދާއިރާ މެމްބަރު އަދި ޕީއެންސީގެ ނައިބް ރައީސް އާދަމް ޝަރީފް އުމަރު ވިދާޅުވެއްޖެ އެވެ.
މަޖިލިހުގެ ޖަލްސާގައި އިގްތިސާދީ ކޮމިޓީ ރިޕޯޓަށް ބަހުސް ކުރައްވަމުން އާދަމް ޝަރީފް ވިދާޅުވީ ރާއްޖެ އަދި އޮތީ އިގްތިސާދު ރިވައިވް ކުރާ ވާހަކަ ދައްކާ ހިސާބަކުނޫންކަމަށެވެ. އަދި މިހާލަތުން އަރައިގަނެވުމުން ދެން އިގްތިސާދު ކޮޅަށް ޖަހާނޭ ގޮތާއި ގުޅޭގޮތުން ވާހަކަ ދެއްކޭނެ ކަމަށް އޭނާ ވިދާޅުވިއެވެ.
އާދަމް ޝަރީފް ވިދާޅުވީ އެންމެ ފުރަތަމަ މަސައްކަތް ކުރަންޖެހޭނީ ރާއްޖޭގައި ތިބި މީހުން ބަނޑުފުރާނަމުއްތި ކުރުމާއި އެމީހުން ސަލާމަތްކުރެވޭނޭ ގޮތަކަށް ކަންކަން ކުރުމަށް ކަމަށެވެ.
"މިހާރު މަޖިލީހުން ތަންކޮޅެއް ވާހަކަ ގިނަ ވެއްޖެ. އެއަށްވުރެއް ބޮޑަށް ރައްޔިތުން ބަނޑުފުރާނަމުއްތި ކުރުމަށް މަސައްކަތް ކުރަންވީ ވަގުތަކީ." އާދަމް ޝަރީފް ވިދާޅުވިއެވެ.
އާދަމް ޝަރީފް ވިދާޅުވީ ދުވަހު މުސާރައަށް މަސައްކަތްކުރާ ފަރާތްތަކާއި މަސްވެރިންނާއި ޓެކްސީ ޑްރައިވަރުންގެ އިތުރުން އަމިއްލައަށް އާމްދަނީ ހޯދާ ފަރާތްކާއި ގިނަ ފަރާތްތަކެއްގެ ވަޒީފާތައް ގެއްލިފައިވާ ކަމަށެވެ. އެހެންކަމުން އެ ފަރާތްތަކަށް ސަރުކާރުން ޕެކޭޖެއް ތައާރަފުކުރަން ޖެހޭ ކަމަށް އޭނާ ވިދާޅުވިއެވެ.
އޭނާ ވިދާޅުވީ މަސައްކަތްކުރަންވީ މާދަމާއަށް ނޫންކަމަށާއި މަސައްކަތްކުރަންވީ ޕެކޭޖެއް ދީގެއް ހާލުގައި ޖެހިފައިވާ ފަރާތްތަކަމަށް އެހީތެރިކަމެއް ފޯރުކޮށްދޭން ކަމަށެވެ.
