ކޮވިޑް19: ސިފައިންގެ މީހަކާއި ކައިވެނިކުރި ޒުވާން އަންހެން ކުއްޖެއްގެ އަސަރުގަދަ ބަސްކޮޅެއް ، ތިޔައީ ލޯބީގެ ނަމޫނާއެއް
ނުރައްކާތެރި ކޮވިޑް19 އާއި ދެކޮޅަށް ކުރަމުންދާ ހަނގުރާމައިގައި އެންމެ ކުރީ ސަފުގައި ތިއްބެވީ ޞިއްޙީ ޚިދުމަތްތެރީންނާއި ގައުމީ ސަލާމަތީ ބާރުތަކެވެ. މިފަރާތްތައް ކުރަމުން އެގެންދަނީ ދީނީ އަދި ޤައުމީ ޖިހާދެކެވެ. އެކަނިވެރިކަމުގެ ތެރެއަށް އާއިލާ ދޫކޮށްލާފައި އަމިއްލަ ފުރާނަ ނުރައްކަލުގެ ތެރެއަށް ހުށައެޅިގެން އެ ފަރާތްތަކަށް ކުރަމުންދާ މަސައްކަތަށް އަހަރެމެންގެ ހިތުގައި އޮތީ ލޯތްބާއި ހެޔޮ ދުޢާއެވެ.
ޚާއްޞައެހީއަށް ބޭނުންވާ ދަރިފުޅާއެކު ވަގުތު ހޭދަ ނުކުރެވި އޭނާގެ ބައްޕަ އެހުރީ ގައުމީ ޚިދުމަތުގައެވެ. މުސްކުޅި މަންމައާއި ބައްޕަ ބަލަމުންދާ ޞިއްހީ ޚިދުމަތްތެރިޔާގެ ހުރިހާ ވަގުތެއް ހޭދަ ކުރަނީ ހޮސްޕިޓަލްގައެވެ. އަލަތު ކައިވެނީގެ މާމުއިހަނދުގެ ދުވަސްތައް ގުނަމުން ދިޔަ އަނބިމީހާއާއި ދުރުގައި ފިރިމީހާ އެހުރީ ޤައުމީ ޚިދުމަތުގައެވެ. ތިޔަބައިމީހުންނަށް ﷲ ހެޔޮ ޖަޒާ ދެއްވާނެތެވެ. ތިޔަބައިމީހުންގެ އާއިލާތައް ﷲ ރައްކާތެރިކޮށްދެއްވާށިއެވެ.
ކައިވެނީގެ މާމުއިހަނދުގެ ދުވަސްތައް ގުނަމުންދިޔަ އަންހެން ކުއްޖެއްގެ ފުރަ ބަންދުގެ އިހްސާސްތައް މިވަނީ ސޯޝަލް މީޑިއާއަށް ދޫކޮށްލާފައެވެ. 21 އަހަރުގެ މިކުއްޖާގެ ކައިވެންޏަށް މަހެއްވީތަނާ ސިފައިންގޭގައި މަސައްކަތް ކުރައްވާ ފިރިމީހާ ޖެހުނީ ޤައުމީ ޚިދުމަތަށް ނުކުންނާށެވެ. މި ޒުވާނާ ބުނެފައިވަނީ ކައިވެނީގެ ޙަފްލާގައި އެކުވެރިންކުރި ސަމާސާތަކުގެ ތެރެއިން ސަމާސާއެއް ޙަޤީޤަތަކަށްވުމާއެކު އެކަން ހަނދާނަށް އަންނަ ކަމަށެވެ.
"ތިޔަ އިނދެވެނީ ސިފައިންގެ ބޭކަލަކާއެވެ. މާދަމާ އެސޮރު ފުރައިގެން ދާންޖެހިދާނެއެވެ. މާމުއިހަނދުގެ ދުވަސްތައް ވަރަށް ލޯބިން ހޭދަކުރާށެވެ!" އެކުވެރީންގެ ސަމާސާ ބަސް މި ޒުވާނާ ހިއްސާކޮށްފައިވެއެވެ.
'' އަހަރުމެންގެ ކައިވެންޏަށް މަސް ދުވަސް ހަމަވީއިރު ފިރިމީހާ އަހަރެން ދޫކޮށްފައި ދާންޖެހިއްޖެއެވެ. ގޮތް ނޭނގޭ ހަނގުރާމައަކަށެވެ. މުޅި ދުނިޔެ އެހަނގުރާމައިގައި ބިކަވަމުންދާ ހަނގުރާމައިގެ އިސް ސަފުގައި ހަރަކާތްތެރިވުމަށެވެ. ފިރިމީހާ ގެއިން ނިކުމެގެން ދިޔައީ އަހަރުމެންގެ ލޯ ކުރިމަތީގައި ދުނިޔޭގެ ބޮޑެތި ބާރުތައް ކުޑަކަކޫ ޖައްސުވާލި ލޮލަށް ނުފެންނަ ވައިރަހެއްގެ ކިބައިން މިޤައުމުގެ ރައްޔިތުން ސަލާމަތް ކުރުމަށެވެ." ޒުވާނާގެ އުދާސްތައް ހިއްސާކުރިއެވެ.
އޭނާ ބުނެފައިވަނީ ފިރިމީހާ ޚިދުމަތަށް ދިޔުމަށްޓަކައި ގޭގެ ދޮރުން ނިކުންނަމުން އޭނާއަށް ނަޒަރު ހުއްޓާލާފައި ބުނި ބަސްތައް އަދިވެސް ކަންފަތުގައި ހަރުލާފައި އެބަހުރި ކަމަށާއި އެއީ އެކަނިވާ ކޮންމެ ވަގުތެއްގައި ފޫހިފިލުވައިދޭ ބަސްތައް ކަމަށެވެ. އަދި ދެރަވެ، ރޮވޭ ކޮންމެ ވަގުތެއްގައި ހިތްވަރު ލިއްބައިދޭ ބަސްތައް ކަމަށާއި އެބަސްތަކުގެ ސަބަބުން ލޯބިވާ ފިރިމީހާއާއިމެދު އަބަދާއި އަބަދު ފަޚުރުވެރިވާ ކަމަށް ޒުވާނާ ބުނެފައިވެއެވެ. އޭނާ ވަނީ ފިރިމީހާގެ ބަސްކޮޅު ވެސް ހިއްސާކޮށްފައެވެ.
"ލޯބިވާއެވެ! މިއަދު މިދަނީ ޤައުމުގެ ޙައްޤުގައެވެ. އަހަރެން އުފަންވީ މިލޮބުވެތި ވަޠަނަށްޓަކައެވެ. ވަޠަން އެދި ގޮވާލާ ކޮންމެ ކަމަކަށް ކެރިހުރެ އިޖާބަ ދިނުމަށް އަހަރެން މާތް ﷲ ގަންދީކޮށްފައިވާ ހުވާގެ މަތީގައި ދެމިހުރުމަށް ސާބިތުކަން ދެއްވާތޯ ދުޢާކޮށްދޭށެވެ! މިހަށިގަނޑުގައި ފުރާނަ ހުރިހާ ހިނދަކު ތިޔަ ލޯބިވާ ކަމަނާގެ ނަން މިދުލުން ކިޔާނަމެވެ."
ﷲގެ ހެޔޮ ރަޙުމަތް ފުޅުން މި ދުވަސްވެސް ދާދި އަވަހަށް ނިމިދާނެއެވެ. ތިޔަ ދެމަފިރިން އެކީގައި އުޅެވޭނެ ދުވަސްތަކެއް ﷲ މިންވަރު ކުރެއްވުމަށް އަހަރެމެން އެދެމެވެ. އުފާވެރި މުސްތަގުބަލެއް ތިޔަ ދެމަފިރިންނަށް މިންވަރު ކުރައްވާށިއެވެ. ތިޔައީ ޙަޤީޤީ ލޯބީގެ މިސާލެކެވެ.
