ކުޅުދުއްފުށިގައި ކާނެ އެއްޗެއް ނެތި އުޅޭ މީހުންނަށް އެރަށު ޒުވާނަކު އެހީވަނީ
ކުޅުދުއްފުށި ސިޓީގައި ކާނެ އެއްޗެއް ނެތި އުޅޭ މީހުންނަށް އެރަށު ޒުވާނަކު ކާބޯތަކެތި ފޯރުކޮށްދޭނެ ކަމަށް ބުނެފިއެވެ.
ކުޅުދުއްފުށީގައި އުޅޭ ބިދޭސީން ވެސް ހާލުގައި ޖެހި ސަލާން ޖަހަން މަގުމަތީގައި އުޅޭތީ އެކަމާ ގުޅޭ ގޮތުން "ކުޅުދުއްފުށި އޮންލައިން" އިން ގެނެސްދިން ރިޕޯޓެއް ޝެއާ ކުރަމުން ކުޅުދުއްފުއްޓަށް އުފަން އަހުމަދު މުހައްމަދު ބުނީ އެ ރަށުގައި އެއްވެސް މީހަކު ކާނެ އެއްޗެއް ދިނުމަށް އެދިއްޖެ ނަމަ އޭނާ އަށް ގުޅުމަށެވެ. އަދި ވީވަރަކުން އެ މީހަކަށް އެހީތެރިކަންފޯރުކޮށްދޭނެ ކަމަށް އޭނާ ބުންޏެވެ.
އަހުމަދު ކުޅުދުއްފުށި އޮންލައިނާ ވާހަކަ ދައްކަމުން ބުނީ، ކޮވިޑްގެ ސަބަބުން ނިކަމެތިވެފައިވާ މީހުން ކައުންސިލާއި ޓާސްކް ފޯސްގެ އެހީގައި ފާހަގަކުރަމުންދާ ކަމަށާ ބޭނުންމަކީ ޒަރޫރީ ކާބޯތަކެތި ނުލިބިފައިވާ ފަރާތްތަކަށް ކޮންމެވެސް ވަރެއްގެ އެހީތެރިކަމެއް ފޯރުކޮށްދިނުން ކަމަށެވެ.
އޭނާ ބުނީ މިހާރުވެސް އެފަދަ ފަރާތްތަކަށް ހަދިޔާކުރުމަށް ޕެކްތަކެއް ތައްޔާރުކުރަމުންދާ ކަމަށެވެ. ކާޑުގެ ބާވަތްތަކާއި ތަރުކާރީ އާއި މޭވާގެ ޕެކްތަކާއި އެހެނިހެން ކާބޯތަކެތިވެސް ބޭނުން ޖެހިފައި ތިބި މީހުންނަށް ހަދިޔާކުރަމުންނެވެ.
އަހުމަދަކީ ރަށުގައި ވިޔަފާރި ކުރާ ޒުވާނެކެވެ. އެގޮތުން އޭނާގެ ތިން ފިހާރަ ހުންނައިރު ކޮވިޑްގެ ސަބަބުން އޭގެ ތެރެއިން އެއް ފިހާރަ ވަނީ ބަންދު ކޮށްފައެވެ. އަދި އަނެއް ދެ ފިހާރައިން އަންނަނީ ހިދުމަތް ދެމުންނެވެ. އެގޮތުން އަހުމަދު ހިންގާ "އައުޝާ މާރޓުން" ފިހާރައިން އިއްޔެވެސް ވަނީ އާރކް ޖަމިއްޔާ އާއި ޒިގްޒެގް ޖަމިއްޔާއާ ގުޅިގެން އެހީތެރިކަމަށް ބޭނުންވެފައިވާ ފަރާތްތަކަށް ކާބޯތަކެތީގެ ޕެކް ހަދިޔާކޮށްފައި އެވެ.
