މާލޭގައި ތާށިވެފައި ތިބި މީހުންނަށް ހުޅުމާލެ އިން 500 ކޮޓަރި ހަމަަޖައްސަނީ
މާލޭގައި ތާށިވެފައި ތިބި މީހުންނަށް ހުޅުމާލެ އިން 500 ކޮޓަރި ހަމަަޖެއްސުމުގެ މަސައްކަތް ކުރަމުންދާ ކަމަށް ޓޫރިޒަމް މިނިސްޓަރު އަލީ ވަހީދު ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު އަލީ ވަހީދު ވިދާޅުވީ ދިރިއުޅުމުގެ ހާލަތު ހުރިގޮތުން މިވަގުތު ރަށަށް ދިއުމަށް ގިނަބަޔަކު އެދެމުންދާކަމަށާއި، އެގޮތަށް މީހުން ފޮނުވާނީ މެނޭޖް ކަރަންޓީނެއްގައި ވަކި މުއްދތަކު އެމީހުން ބޭތިއްބުމަށްފަހު ކަމަށެވެ.
މިގޮތަށް ނިންމާފައިވަނީ ރަށްރަށުގައި މިވަގުތު ތިބި ރައްޔިތުންގެ ސަލާމަތާއި ރައްކާތެރިކަމައްޓަކައިކަމަށް މިނިސްޓަރ ވިދާޅުވިއެވެ. އެގޮތަށްދާ މީހުން ރަށަށް ދިއުމުގެ ކުރިން 14 ދުވަހު ކަރަންޓީންކުރުމަށް މާލެ ސަރަހައްދުން ކޮޓަރިތަކެއް ހޯދަމުންދާކަމަށާ، އެކަމަށް ޚާއްސަކޮށްގެން ހުޅުމާޅޭގެ ގެސްތްހައުސްތަކުން 500 ކޮޓަރި މިހާރުވެސް ހަމަޖައްސާފައިވާކަމަށް މިނިސްޓަރ އަލީ ވަހީދު ވިދާޅުވިއެވެ.
މިނިސްޓަރ ޢަލީ ވަޙީދު ވިދާޅުވީ، މާލޭގައި މިވަގުތު ދިރިއުޅެމުންދާ މީހުންގެ ތެރެއިން 5000 އެއްހައި މީހުން އެކި ތަންތަނަށް ފުރައިގެން ދާން ބޭނުންވެގެން އެކަން ހުށަހަޅާފައިވާ ކަމަށެވެ.
"އަޅުގަނޑު ގަބޫލުކުރާގޮތުގައި މާލޭގައި މިބަލިމަޑުކަން މިގޮތަށްއޮއްވާ ރަށްރަށަށް ދިއުމަކީ ރައްކާތެރިކަމެއްނޫން. އެހެން ނަމަވެސް ޒަރޫރީ ހަލަތްތައް ކުރިމަތިވެފައިވާ އެތައް ރައްޔިތުންނެއް ތިބުމުން މި ޕްރޮސެސްވެސް އަޅުގަނޑުމެން ކުރިއަށްގެންދާނަން، މެނޭޖް ކަރަންޓީންއެއްގައި ކަރަންޓީންކުރުމަށްފަހު." މިނިސްޓަރ ޢަލީ ވަހީދު ވިދާޅުވިއެވެ.
މި ނޫސްވެރިންގެ ބައްދަލުވުމުގައި ވާހަކަފުޅުދައްކަމުން ހޯމް މިނިސްޓަރ ޢިމްރާން ޢަބްދުﷲ ވިދާޅުވީ ރަށަށްދާން އެދިފައިވާ 5000 މީހުންގެ ތެރެއިން ފުރަތަމަ އިސްކަންދޭނީ އެންމެ ބޮޑަށް ބޭނުންޖެހިފައިވާ މީހުންނަށް ކަމަށެވެ. އެގޮތުން ފުރަތަމަ ކަރަންޓީންކުރާނީ ބޭސްފަރުވާއަށް މާލެ އައިސްތިބި މީހުންނާއި، އެންމެ ޒަރޫރީ ބޭނުމަށް ޖެހިފައިވާ މީހުންކަމުގައި މިނިސްޓަރ އިމްރާން ވިދާޅުވިއެވެ.
