ބޯޑަރު ހުޅުވާލާނީ ވިޔަފާރިވެރިންނަށް ޓަކައެއް ނޫން، ރައްޔިތުންނަށްޓަކައި: އަލީ ވަހީދު
ބޯޑަރު ހުޅުވާލާނީ ވިޔަފާރި ވެރިންނަށްޓަކައެއް ނޫން، ރައްޔިތުންނަށްޓަކައި ޓޫރިޒަމް މިނިސްޓަރު އަލީ ވަހީދު ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު އަލީ ވަހީދު ވިދާޅުވީ ޓޫރިޒަމް ހުޅުވާލާނީ ރާއްޖޭގައި ބަލި ކޮންޓްރޯލް ވުމުން ކަމަށާއި އެގޮތުން ރާއްޖޭގެ ޓޫރިޒަމް ފަށާނޭ ފޭސްތަކެއް ތައްޔާރު ކުރަމުންދާ ކަމަށެވެ.
އެތަނުން ކޮންމެ ފޭސްއެއްގައި ރާއްޖޭގެ ޓޫރިޒަމް ފޯކަސް ކުރާނެ ދާއިރާތައް އަދި ރައްކާތެރިކަމަށް އަޅާނެ ފިޔަވަޅުތައް ޕްލޭން ކުރެވިފައިވާ ކަމަށް މިނިސްޓަރު ވިދާޅުވިއެވެ. އަދި އެ ޕްލޭން އެކުލަވާލީ، ޓޫރިޒަމް މިނިސްޓްރީއިން ރާއްޖެ ގެނައި ޑޮކްޓަރުންގެ ޓީމުގެ އިރުޝާދާ އެކުގައި ކަމަށް އޭނާ ވިދާޅުވިއެވެ.
މިނިސްޓަރު ވިދާޅުވީ ފަތުރުވެރިކަމުގެ ސިނާއަތުގައި މަސައްކަތްކުރާ ބައެއް ވިޔަފާރިވެރިން ބޯޑަރު ހުޅުވާލަން ބޭނުންވާ ކަމަށާއި ބައެއް ފަރާތްތަކުން ބޯޑަރު ހުޅުވުމާއި ދެކޮޅުހަދާ ކަމަށެވެ. އެހެންނަމަވެސް ސަރުކާރުން ބޯޑަރު ހުޅުވާނީ ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށްފަހު ނޫނީ ބޯޑަރުތައް ނުހުޅުވާނެ ކަމަށް މިނިސްޓަރު ވިދާޅުވި އެވެ.
އަލީ ވަހީދު އިތުރަށް ވިދާޅުވީ އެންމެ އަވަހަށް ވެސް ރާއްޖޭގެ ފަތުރުވެރިކަން އަލުން ފެށޭނީ ޖުލައި މަހު ކަމަށާއި އެއީ މިބަލިމަޑުކަމުން އަރައިގަނެވޭނެ ކަމަށް ލަފާކުރެވޭ އެންމެ ރަނގަޅު ސިނޭރިއޯގައި ކަމަށެވެ. އަދި މޮޑަރޭޓް ކޭސް ސިނާރިއޯ އެއްގައި އޮކްޓޫބަރު މަހުގައި އަލުން ފެށޭނެ ކަމަށް މިނިސްޓަރު ވިދާޅުވި އެވެ.
